قازاقستاندىق دەلەگاتسيانى سىرتقى ىستەر ءمينيسترىنىڭ ورىنباسارى مارعۇلان بايمۇحان, ليتۆالىق دەلەگاتسيانى سىرتقى ىستەر ۆيتسە-ءمينيسترى داليۋس چەكۋوليس باسقاردى.
كەزدەسۋ بارىسىندا تاراپتار ەكىجاقتى ىنتىماقتاستىق كەڭ اۋقىمدى ماسەلەلەرىنىڭ جان-جاقتى تالقىلادى. اتاپ ايتقاندا, ەلدەر اراسىندا سەنىمدى ساياسي ديالوگتىڭ ورناتىلعانى, ال حالىقارالىق كۇن تارتىبىندەگى كوپتەگەن ماسەلەلەر بويىنشا ۇستانىمداردىڭ تولىعىمەن سايكەس كەلۋى ەرەكشە ايتىلىپ ءوتتى. بۇل رەتتە, ءارتۇرلى حالىقارالىق الاڭداردا ءوزارا قولداۋ كورسەتۋ ەكى ەل ىنتىماقتاستىعىنىڭ وزىندىك ستيلىنە اينالدى.
سونداي-اق دەلەگاتسيالار پرەزيدەنتتىك, پارلامەنتتىك جانە ۆەدومستۆولىق دەڭگەيدەگى ءوزارا ساپارلار كەستەسىن بىرلەسە پىسىقتاۋ ۇسىنىسىن تالقىلادى. جوسپارلانعان كەزدەسۋلەردى مازمۇندىق جاعىنان تولىقتىرۋ بويىنشا كەشەندى دايىندىق جۇمىستارىن باستاۋ تۋرالى كەلىسىمگە قول جەتكىزىلدى.
بۇگىنگى تاڭدا ەكى ەلدەگى پارلامەنتتىك «دوستىق توپتارى» دەڭگەيىندە قولداۋ كورسەتىلىپ وتىرعان قازاقستان مەن ليتۆا اراسىنداعى پارلامەنتارالىق ديالوگتى دامىتۋعا جانە كەڭەيتۋگە ەرەكشە نازار اۋدارىلدى. تاراپتار ەكىجاقتى بايلانىستاردىڭ وسى سەگمەنتىنىڭ ماڭىزدىلىعىن تاعى دا راستادى.
ساياسي كونسۋلتاتسيالاردىڭ كۇن تارتىبىندەگى ەڭ ماڭىزدى تارماقتاردىڭ ءبىرى ساۋدا-ەكونوميكالىق ىنتىماقتاستىق بولدى. قازىرگى ۋاقىتتا ليتۆا قازاقستاننىڭ ەۋرووداق ەلدەرىندەگى ەڭ ءىرى ساۋدا سەرىكتەستەرىنىڭ وندىعىنا كىرەدى. قازاقستان, ءوز كەزەگىندە, ليتۆانىڭ 15-ءشى ساۋدا سەرىكتەسى بولىپ تابىلادى.
ناتيجەسىندە, سىرتقى ساياسي مينيسترلىكتەر اراسىندا ەكونوميكالىق ديپلوماتيا شەڭبەرىندەگى ءوزارا ارەكەتتەستىكتىڭ قارقىندىلىعىن ارتتىرۋ تۋرالى كەلىسىمگە قول جەتكىزىلدى.
كونسۋلتاتسيالارعا قاتىسۋشىلار قازاقستان مەن ليتۆا اراسىنداعى ترانزيتتىك-كولىكتىك ىنتىماقتاستىق بۇرىنعىداي باسىمدىققا يە سالا بولىپ تابىلاتىنىن ايتىپ ءوتتى. اتاپ ايتقاندا, تاراپتار قازاقستاننىڭ اقتاۋ مەن قۇرىق تەڭىز پورتتارى جانە كلايپەدا تەڭىز پورتى اراسىندا بايلانىس ورناتۋ مۇمكىندىگىن تالقىلادى. بۇدان باسقا, 2020 جىلعى 18-22 مامىر ارالىعىندا ليتۆادا كولىك سالاسىنداعى ىنتىماقتاستىق جونىندەگى جۇمىس توبى مەن حالىقارالىق اۆتوموبيل تاسىمالدارى بويىنشا ارالاس توپتىڭ 4-ءشى وتىرىسى وتەتىنى جايىندا ايتىلدى.
سونىمەن قاتار, تاراپتار ەكى ەل اراسىندا تىكەلەي اۋە قاتىناسىن اشۋ سۇراعىنىڭ وزەكتىلىگىن, سونداي-اق «نۇر-سۇلتان - ۆيلنيۋس - نيۋ-يورك» تۇراقتى ترانسكونتينەنتالدىق اۋە باعىتىن كەلەشەكتە قۇرۋ ماسەلەسىنىڭ ماڭىزدىلىعىن اتاپ ءوتتى. بۇل رەتتە, تاراپتار تۋريستىك قارىم-قاتىناستاردىڭ, سونىڭ ىشىندە مەديتسينالىق ءتۋريزمنىڭ قازىرگى جاعدايى مەن دامۋ بولاشاعىن دا تالقىلادى.
سونىمەن بىرگە, ديپلوماتتار, ءبىلىم جانە مەديتسينا سالاسىنداعى بايلانىستاردى ودان ءارى جانداندىرۋعا كەلىستى. وسى رەتتە, ليتۆالىق تاراپقا قازاقستاندىق ستۋدەنتتەرگە 200 گرانت بولىنگەنى ءۇشىن العىس ءبىلدىرىلدى.
قازاقستان مەن ەۋرووداق اراسىنداعى ۆيزالىق رەجيمدى جەڭىلدەتۋ پروتسەسىندە ليتۆانىڭ كومەك كورسەتۋى كونسۋلتاتسيالاردىڭ ايتارلىقتاي ماڭىزدى اسپەكتىسى بولدى.
قازاقستاندىق ديپلومات بالامالى ەنەرگەتيكا سالاسىندا زاماناۋي جابدىقتار, سونىڭ ىشىندە كۇن باتارەيالارىن جاساپ شىعاراتىن ليتۆالىق BOD Group كومپانياسىنىڭ باسشىلىعىمەن جەكە كەزدەسۋ وتكىزدى. ارنايى پرەزەنتاتسيا بارىسىندا وعان جاسىل ەنەرگەتيكا سالاسىنداعى ەڭ جاڭا ازىرلەمەلەر, ەنەرگيا ۇنەمدەۋشى تەحنولوگيالار وبلىسىنداعى سوڭعى جەتىستىكتەر, شەت ەلدەردەگى بيزنەس-جوبالاردى ىسكە اسىرۋدىڭ ناتيجەلەرى ۇسىنىلدى. كەزدەسۋدىڭ قورىتىندىسى بويىنشا BOD Group-تىڭ قازاقستان نارىعىنا شىعۋ بولاشاعىن ءىس جۇزىندە زەردەلەۋ تۋرالى كەلىسىمگە قول جەتكىزىلدى.
ليتۆالىق ءسۇت قاۋىمداستىعىنىڭ باسشىلىعى جانە ليتۆانىڭ جەتەكشى ءسۇت وندىرۋشىلەرىمەن بولعان كەزدەسۋ بارىسىندا م.بايمۇحان ولاردى ساۋدا سەرىكتەستىگىن دامىتۋعا جانە قازاقستانداعى شەتەلدىك ينۆەستورلارعا ارنالعان ارتىقشىلىقتاردى كەڭىنەن قولدانۋعا شاقىردى.
