ۆەدومستۆو وكىلدەرى جىل باسىنان بەرى 10-نان استام ويىن اپپاراتى, تەرمينالدار جانە باسقا دا قۇمار ويىن قۇرالدارى تاركىلەنگەنىن جەتكىزدى. نۇر-سۇلتان قالاسى بويىنشا ەكونوميكالىق تەرگەۋ دەپارتامەنتىنىڭ 2-ءشى تەرگەۋ باسقارماسىنىڭ باسشىسى ولجاس سۇلەيمەنوۆتىڭ ايتۋىنشا, 2019 جىلى ەلوردادا اقشانى زاڭسىز قولما-قولعا اينالدىرۋ فاكتىسىنە قاتىستى 4 قىلمىستىق توپتىڭ ارەكەتى اشكەرەلەندى. زاڭسىز اينالىمنان 30 ۇيىمنىڭ ءمورى تاركىلەنىپ, مەملەكەتكە كەلگەن شىعىن مولشەرى 2 ملرد تەڭگەنى قۇرادى. قىلمىستىق توپتاردىڭ ىسىنە بايلانىستى ءتيىستى ايعاقتار الىندى.
– 2019 جىلى استانادا ەكونوميكالىق تەرگەۋ دەپارتامەنتىنىڭ وندىرىسىندە 200-گە جۋىق قىلمىستىق ءىس تىركەلىپ, ونىڭ 108-ءى سوتقا جىبەرىلدى. جۇمىس بارىسىندا مەملەكەت بيۋدجەتىنە 2,5 ملرد تەڭگە قايتارىلدى. الدىن الۋ جۇمىستارى اياسىندا ۇلتتىق بانك جانە ەكىنشى دەڭگەيلى بانكتەردىڭ باسشىلارى, سونداي-اق قاۋىپسىزدىك قىزمەت وكىلدەرىنىڭ قاتىسۋىمەن ءتۇسىندىرۋ جۇمىستارى ۇيىمداستىرىلدى. ناتيجەسىندە ءوزارا ءىس-قيمىل جونىندە, سول سەكىلدى قىلمىستىق جولمەن تابىلعان كىرىستى زاڭسىز قولما-قول اقشاعا اينالدىرۋعا جانە كاپيتالدى شەتەلگە شىعارۋعا قارسى بىرلەسكەن جۇمىستارعا بايلانىستى ۇسىنىستار ازىرلەندى, – دەدى و.سۇلەيمەنوۆ.
ەكونوميكالىق تەرگەۋ دەپارتامەنتىنىڭ وكىلدەرى باس قالادا جالعان ۆاليۋتانى شىعارۋدى جولعا قويعان ازامات قولعا تۇسكەنىن ايتتى. انىقتالعانداي, ۇستالعان ادام قاعاز اقشانى ۇيىندە باسىپ جۇرگەن. جالعان كۋپيۋرالار ۇلتتىق ۆاليۋتادان كوشىرىلىپ شىعارىلىپتى. ونى ەلوردادا وتكىزۋدىڭ 34 دەرەگى انىقتالدى. كىنالى ازاماتتىڭ قىلمىسىن دالەلدەيتىن بارلىق ايعاق جينالعان دەدى قۇزىرلى ورگان باسشىسى. قازىر بۇل فاكتىگە قاتىستى قۇجاتتار سوتقا جىبەرىلدى. وسى رەتتە تەرگەۋشىلەر ۇلتتىق بانككە قاۋىپسىزدىك جۇمىستارىن مەيلىنشە كۇشەيتۋگە كەڭەس بەردى.
بۇدان بولەك سپيكەرلەر ارىس جانە وتارداعى اسكەري قويمالاردا وق-ءدارىنى جويۋعا بايلانىستى 1,7 ملرد تەڭگە ۇرلانعانىن جەتكىزدى. نۇر-سۇلتان قالاسى بويىنشا ەكونوميكالىق تەرگەۋ دەپارتامەنتىنىڭ 1-ءشى تەرگەۋ باسقارماسىنىڭ باسشىسى بولات حاميتوۆ يندۋستريا جانە ينفراقۇرىلىمدىق دامۋ مينيسترلىگى «قازتەحنولوگيا» اق باسشىلىعى ارىس جانە وتار قالالارىنداعى اسكەري بولىمدەردە وق-دارىلەردى جويۋ كەزىندە مەتالل قالدىقتارىن ساتۋ ناتيجەسىندە 1,7 ملرد تەڭگەنى ۇرلاعانى انىقتالدى. دەسە دە باسقارما وكىلدەرى اتالعان كاسىپورىن باسشىسىنا قاتىستى قىلمىستىق ءىس ەندى قوزعالعاندىقتان, تەرگەۋ مالىمەتتەرىن ازىرگە جاريالاۋ مۇمكىن ەمەس دەيدى.
