ءتىپتى بىرنەشە جىل بۇرىن قالانىڭ «سولتۇستىك» شاعىن اۋدانىندا №62 جەر ۇيدەگى پاتەرلەردىڭ بىرىندە گازدىڭ اۋاعا تارالۋىنان جارىلىس بولعان. سالدارىنان پاتەرلەردىڭ دە ەسىك-تەرەزەسى قيراپ, 1980 جىلى تۋعان ەر ادام زارداپ شەككەن ەدى.
ءتىلسىز جاۋدىڭ زاردابىن قاڭتار ايىندا قالاداعى جەكەمەنشىك بالاباقشالاردىڭ 4 ءبۇلدىرشىنى مەن تاربيەشىسى دە تارتتى. دەگەنمەن, گاز يىسىنەن ۋلانعان ەكى جاستاعى سابيلەر مەن تاربيەشى قالالىق گيپەرباريالىق وكسيگەناتسيا ورتالىعىنا جاتقىزىلدى. قۋانتارلىعى, ادام شىعىنى جوق. قالالىق توتەنشە جاعداي باسقارماسى مەن «قازترانسگاز» اق وكىلدەرى «قارشىعا» بالاباقشاسىندا ۋلانۋ وقيعاسى گاز كولونكاسىنىڭ اقاۋىنان شىققان دەگەن بولجام جاسادى.
اقپان ايىندا شاھارداعى كوپقاباتتى تۇرعىن ۇيلەردىڭ بىرىندە 26 جانە 28 جاستاعى ەكى اسكەري قىزمەتكەردىڭ ءولى دەنەسى تابىلدى. انىعىندا ولار تۇندە ءۇيدى جىلىتپاق بولىپ, گاز پليتانى قولدانعان. ءسويتىپ وزدەرى ۇيقىعا جاتقان. بەلگىلى ءبىر ۋاقىتتا كوگىلدىر وتىن ءسونىپ, قايتا قوسىلعاندا, ۋلى گاز بولمەلەرگە تاراپتى. قالالىق توتەنشە جاعدايلار دەپارتامەنتىنىڭ باسشىسى نۇربولات دەربىسوۆ داتچيكتەن بولمەدە گازدىڭ ءيىسى بار ەكەنىن انىقتاعانىن ايتادى.
اپاتتى جاعداي مەن قايعىلى وقيعالاردىڭ سەبەبى تۋرالى توتەنشە جاعداي قىزمەتكەرلەرى بۇعان ەڭ اۋەلى تۇرمىستىق سالعىرتتىق, سوسىن تۇرعىنداردىڭ گازبەن جىلىتۋ قوندىرعىلارىن زاڭسىز ورناتىپ الۋى سەبەپ بولىپ وتىر دەيدى.
«قىس مەزگىلىندە تۇرعىندار تەرەزە-ەسىكتەرىن قىمتاپ ۇستايدى. ءۇيدى جىلىتۋ ءۇشىن قوسىمشا ەلەكتر توگىن قوسادى. ونىڭ كوبىسى گاز ارقىلى جۇمىس ىستەگەننەن كەيىن ۋلانۋ پروتسەسى ءورشيدى», دەدى قالالىق تجد باسشىسى نۇربولات دەربىسوۆ.
شىمكەنتتىڭ «سامال», «ىنتىماق», «قازىعۇرت» شاعىن اۋداندارىمەن قاتار بىرقاتار كوشەدە ارنايى قاۋىپسىزدىك شارالارىن ءتۇسىندىرۋ جۇمىستارى جۇرگىزىلگەن. جۇمىس كۇندەرى تۇرعىندار ۇيلەرىندە كوپ بولمايتىندىقتان ماماندار حالىققا كوگىلدىر وتىن جايىندا ۇگىت-ناسيحاتتى ارنايى دەمالىس كۇندەرى جۇرگىزگەن. ناتيجەسىندە, 1 تاۋلىكتە 2 مىڭ ءۇيدى ارالاپ, 3 مىڭ ادام الدىن الۋ جۇمىستارىمەن تانىستى. بۇل تۇرعىدا «قازترانسگاز» مەكەمەسىنىڭ وكىلدەرى دە ارنايى رەيدكە شىققان. قىزمەتكەرلەر تۇرعىنداردىڭ كەلىسىمىمەن ءار ۇيگە كىرىپ, جىلۋ جۇيەسىنىڭ جۇمىس ىستەۋ بارىسىن تەكسەرگەن. گازدان اقاۋى بار ۇيلەرگە ەسكەرتۋ جاساپ, 5 كۇن ىشىندە قايتا جوندەۋىنە مۇمكىندىك بەرىلدى.
الايدا تۇرعىندار ءوز كوزدەرىنە كورىنبەيتىن اقاۋدى ەلەمەي, ونىڭ سوڭى جوعارىداعىداي قايعىلى وقيعالارعا ۇلاسۋدا. جۋىردا شىمكەنت قالالىق توتەنشە جاعدايلار دەپارتامەنتى باستىعىنىڭ ورىنباسارى, ازاماتتىق قورعاۋ پولكوۆنيگى ماديار جاقسىباەۆ تۇرمىستىق گاز قۇرىلعىلارىن پايدالانۋ كەزىندە ءورت قاۋىپسىزدىگى تالاپتارىن بۇزۋ سالدارىنان ورىن العان قايعىلى وقيعالار جانە ونىڭ الدىن الۋ بويىنشا اتقارىلعان جۇمىستار جايلى ءسوز قوزعادى.
باسشىنىڭ ايتۋىنشا, بيىلعى جىلۋ بەرۋ ماۋسىمىندا ۋلى گازدان ۋلانۋدىڭ 10 وقيعاسى تىركەلىپ, 10 ادام قايتىس بولدى, 4 ادام جاراقات الدى. جىلىتۋ ماۋسىمى باستالعالى بەرى تۇرعىن ءۇي سەكتورىندا ءورت قاۋىپسىزدىگىن قامتاماسىز ەتۋ جانە ۋلى گازدان ۋلانۋدىڭ الدىن الۋ ماقساتىندا تج دەپارتامەنتى قالا جانە اۋدان اكىمدىگى, «قازترانسگاز ايماق» اق شىمكەنت قالاسى بويىنشا فيليالىنىڭ قىزمەتكەرلەرىمەن, Nur Otan پارتياسىنىڭ Jas Otan جاستار قاناتىنىڭ ەرىكتىلەرىمەن بىرلەسىپ, ءتۇسىندىرۋ جۇمىستارىن قارقىندى جۇرگىزۋدە. سونىمەن بىرگە «شىمكەنت – تمد ەلدەرىنىڭ مادەني استاناسى» جىلى اياسىندا دەپارتامەنت ءوزىنىڭ وقىتۋ بازاسىندا ءورت قاۋىپسىزدىگى قاعيدالارىن ساقتاۋ, ازاماتتىق قورعانىستى ۇيىمداستىرۋ جانە باسقا دا توتەنشە جاعدايلاردىڭ الدىن الۋ ماسەلەلەرى بويىنشا دەنساۋلىق ساقتاۋ ۇيىمدارى مەن ءبىلىم بەرۋ مەكەمەلەرىنىڭ 43 قىزمەتكەرىن وقىتتى.
قالا تۇرعىندارىنىڭ باسىم بولىگى جەكە سەكتوردا تۇرادى. كوپتەگەن ءۇي ورتالىق جىلۋ قازاندىقتارىنا قوسىلماعان, جەكە گاز قوندىرعىلارىن پايدالانىپ كەلەدى. دەگەنمەن, شەتەلدەن ەنگەن قۇرىلعىلارمەن جۇيەلى تانىسپاعان نەمەسە دۇرىس قولدانا الماۋدىڭ سالدارىنان ۋلانۋ وقيعالارى تىيىلماي تۇر.
وسى رەتتە توتەنشەلىكتەر مەن گاز تاراتۋشى مەكەمەلەر تۇرعىنداردى ساقتىققا شاقىرىپ, گازدىڭ ءيىسى شىققان جاعدايدا بايلانىس تەتىكتەرىنە حابارلاسۋدى سۇرايدى. سونداي-اق قانداي دا ءبىر جوندەۋ جۇمىستارى ءۇشىن ارنايى ماماننىڭ كومەگىنە جۇگىنۋگە شاقىرادى.
شىمكەنت
