پرەزيدەنتتىڭ ايتۋىنشا, سەمەيدە جانە وسى وڭىرگە قاراستى اۋىلداردا 1300-دەن استام مۇمكىندىگى شەكتەۋلى بالا بار. قاجەتتى جاعداي جاسالماعان تار عيماراتتا ورنالاسقان وڭالتۋ ورتالىعى ءبىر ۋاقىتتا 35 بالا عانا قابىلداي الادى. بۇل – شىندىق. مۇنداي جاعداي مۇلدە سىن كوتەرمەيدى. وبلىس اكىمىنە ماسەلەنى دەرەۋ قولعا الىپ, ءتيىستى شارالار قابىلداۋدى تاپسىرامىن.
جاقىندا وبلىس اكىمى دانيال احمەتوۆتىڭ وسكەمەندە وتكەن ەسەپ بەرۋ كەزدەسۋىندە سەمەي قالاسىنىڭ جانار جەڭىسوۆا ەسىمدى تۇرعىنى: «مەن 12 جاستاعى مۇگەدەك بالانى تاربيەلەۋدەمىن. وتكەن جىلى مەملەكەت باسشىسى قاسىم-جومارت توقاەۆ سەمەي قالاسىنا كەلگەندە مۇمكىندىگى شەكتەۋلى ادامدارعا ارنالعان وڭالتۋ ورتالىعى سالىناتىنى تۋرالى ايتقان بولاتىن. وسى باعىتتا قانداي جۇمىستار اتقارىلۋدا؟» دەپ سۇراق قويدى. ءوڭىر باسشىسى ءوز كەزەگىندە پرەزيدەنتتىڭ تاپسىرماسى مىندەتتى تۇردە ورىندالاتىنىن جەتكىزدى. «قازىرگى كەزدە سەمەي قالاسىندا 1 304 مۇمكىندىگى شەكتەۋلى بالا تۇرادى ەكەن. ونىڭ 489-ى مەديتسينالىق وڭالتۋدى قاجەت ەتەدى. ءبىز بۇل ماسەلەدەن حاباردارمىز. وسى پروبلەمانى شەشۋ ءۇشىن 150 ورىنعا شاقتالعان وڭالتۋ ورتالىعىنىڭ قۇرىلىسىن باستاماقپىز. اتالعان جوبانىڭ قۇجاتتارى ساراپتاماعا جىبەرىلگەن, بۇل جۇمىس شامامەن مامىر ايىنا دەيىن سوزىلۋى مۇمكىن. ودان كەيىن قۇرىلىس جۇمىستارىن باستايمىز. بۇل ورتالىق 2023 جىلعا دەيىن پايدالانۋعا بەرىلەدى دەپ سەنىممەن ايتا الامىن. ال ازىرگە قالاداعى مۇمكىندىگى شەكتەۋلى جاندارعا «قاراعايلى» دەپ اتالاتىن تاماشا شيپاجاي قىزمەت كورسەتەتىن بولادى», دەدى وبلىس اكىمى.
شىعىس قازاقستان وبلىسى
