«بۇگىنگى كۇنى «قازاقستان رەسپۋبليكاسىنىڭ اۋە كەڭىستىگىن پايدالانۋ جانە اۆياتسيالىق قىزمەت تۋرالى» زاڭعا سايكەس «Bek Air» اۋە كومپانياسىنىڭ ەكسپلۋاتانت سەرتيفيكاتى توقتاتىلدى. مەملەكەتارالىق اۆياتسيا كوميتەتى (ماك, ماسكەۋ ق.) اۋە كەمەسىنىڭ وزدىگىنەن جازاتىن 2 بورت قۇرالىنداعى مالىمەتتەردى جۇكتەپ الدى جانە ماك ماماندارى قورىتىندى دايىنداپ جاتىر. اۋە اپاتىن تەرگەۋدى ءىىم جەدەل تەرگەۋ توبى, ونىڭ بارىسىن قادالاعاۋدى باس كولىك پروكۋراتۋراسى جۇزەگە اسىرادى. سوتقا دەيىنگى تەرگەۋ جالعاسىپ جاتىر. نەگىزگى ەكى نۇسقا قاراستىرىلۋدا. ءبىرىنشىسى – اۋە كەمەسى قاناتتارىنا مۇزدىڭ قاتۋى. حالىقارالىق مامانداردى تارتۋ ارقىلى بۇل نۇسقانى تەكسەرۋ ءۇشىن ۇشاقتى ۇشۋعا دايىندىق بارىسىندا ونى مۇز قاتۋىن بولدىرماۋ ءۇشىن وڭدەۋ پروتسەدۋرالارىنىڭ بۇزىلۋى زەردەلەنىپ جاتىر. ەكىنشىسى – اۋە كەمەسىنىڭ تەحنيكالىق اقاۋى جانە ۇشقىش قاتەلىگى. بۇل نۇسقا اياسىندا شتاتتان تىس جاعداي كەزىندە ەكيپاجدىڭ ارەكەتىنە باعا بەرۋگە باعىتتالعان تەرگەۋ امالدارى جالعاسۋدا. تەرگەۋ قورىتىندىسى بويىنشا ورىن العان قايعىلى جايتقا قاتىسى بار كۇدىكتى تۇلعالارعا شارا قابىلداۋ تۋرالى باق-تا جاريالاۋ ماسەلەسى قابىلدانادى», - دەدى اسقار مامين.
سونىمەن قاتار ۇكىمەت باسشىسى ەڭبەك كودەكسىنە سايكەس, ەڭبەك قىزمەتىمەن بايلانىستى قايعىلى جايتتى تەرگەۋ جونىندەگى ارنايى كوميسسيا قۇرىلعان. توپتىڭ تەرگەۋ قورىتىندىسىنا سايكەس, جۇمىسشىلاردىڭ كىناسى - 0, جۇمىس بەرۋشىنىڭ كىناسى 100 پايىز دەپ تانىلعان. جۇمىس بەرۋشىگە قازا تاپقان جۇمىسشىلاردىڭ وتباسىنا ساقتاندىرۋ تولەمدەرىن جۇزەگە اسىرۋ قاجەتتىگىلى تۋرالى ساقتاندىرۋ كومپانياسىنا حابارلاندىرۋ تاپسىرىلعان. بۇگىنگى كۇنى جەرگىلىكتى اتقارۋشى ورگاندار تاراپىنان زارداپ شەگۋشىلەرگە ماتەريالدىق كومەك كورسەتۋ جۇمىستارى جۇرگىزىلدى. تۇرعىلىقتى جەرلەرى بويىنشا زارداپ شەككەن 46 جولاۋشىعا 1 ميلليون تەڭگەگە دەيىن, قازا تاپقان 12 ادامنىڭ وتباسىلارىنا 4 ميلليون تەڭگەدەن اقشالاي كومەك كورسەتىلگەن. سونىمەن قاتار اتالعان اۋە كومپانياسىنىڭ ورىندالماعان رەيستەرىنە بيلەت ساتىپ العان جولاۋشىلاردىڭ اقشالاي قاراجاتتارىن قايتارۋ بويىنشا سوتقا شاعىم تۇسىرىلگەن.
«مۇنان بولەك, مەملەكەت باسشىسىنىڭ تاپسىرماسىنا سايكەس, 2020 جىلدىڭ ءبىرىنشى جارتىجىلدىعىنىڭ سوڭىنا دەيىن تۇراقتى باعدارلاردا جولاۋشىلار تاسىمالىن جۇزەگە اسىراتىن بارلىق اۋە كومپانيالارى تەكسەرىلەتىن بولادى. تولىقتاي العاندا, مەملەكەتتىك ورگاندار ۇشاق اپاتى كەزىندە زارداپ شەككەندەرگە ماتەريالدىق جانە كونسۋلتاتسيالىق كومەك كورسەتۋ, سونىمەن قاتار اۋە كومپانياسىنىڭ ورىندالماعان رەيستەرى جولاۋشىلارىنىڭ اقشا قاراجاتتارىن قايتارۋ بويىنشا جان-جاقتى شارالار قابىلدانىپ جاتىر», - دەدى پرەمەر-مينيستر.
