ءماجىلىس دەپۋتاتى, پرەزيدەنت جانىنداعى ادام قۇقىقتارى جونىندەگى كوميسسيا توراعاسى قۋانىش سۇلتانوۆتىڭ توراعالىعىمەن وتكەن جيىندا ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ, ىشكى ىستەر مينيسترلىگىنىڭ وكىلى ارىستانعالي ساپاروۆ تۇرمىستىق زورلىق-زومبىلىققا قارسى شارالاردىڭ ىسكە اسىرىلۋىن بايانداپ, ءسوز سويلەدى.
كوميسسيا وتىرىسىنىڭ جۇمىسىنا زاڭ شىعارۋشى, اتقارۋشى جانە سوت بيلىگى تارماقتارىنىڭ, حالىقارالىق جانە ۇكىمەتتىك ەمەس ۇيىمداردىڭ, بيزنەس-قۇرىلىمداردىڭ وكىلدەرى, زاڭگەرلەر قاتىستى.
تالقىلاۋ بارىسىندا كوميسسيا مۇشەلەرى ادامنىڭ قادىر-قاسيەتىنە قول سۇعىلمايتىنىن, ەشكىمدى ازاپتاۋعا, وعان زورلىق-زومبىلىق جاساۋعا, باسقاداي قاتىگەزدىك نەمەسە ادامدىق قادىر-قاسيەتىن قورلايتىنداي ءجابىر كورسەتۋگە نە جازالاۋعا بولمايتىندىعىن تاعى ءبىر اتاپ ءوتتى. سەنات دەپۋتاتى اندرەي لۋكين بۇگىندە ەلىمىزدەگى وتباسىلاردا قارجىلىق الىمجەتتىك دەگەن تۇسىنىكتىڭ دە قالىپتاسقانىن مالىمدەدى. دەپۋتاتتىڭ ايتۋىنشا, وتباسى اسىراۋشىسى جۇمىس ىستەمەي, وتباسى ماتەريالدىق جەتىسپەۋشىلىك, مۇقتاجدىق كورەدى.
ءسوز سويلەگەن ساراپشىلار «وتباسىلىق-تۇرمىستىق زورلىق-زومبىلىققا قارسى ءىس-قيمىل تۋرالى» جاڭا زاڭ جوباسىن ازىرلەۋدە حالىقارالىق تاجىريبەنى ەسكەرۋ قاجەتتىگىن ەسكەرتتى.
تالقىلاۋعا قاتىسقان ساراپشىلار قاتىگەز قارىم-قاتىناسقا قارسى ءىس-قيمىل سالاسىنداعى پروبلەمالار مەن مىندەتتەردىڭ ۆەدومستۆولىق قانا ەمەس, قوعامدىق, مەملەكەتتىك سيپاتقا يە ەكەنىن, ازاماتتىق قوعامنىڭ بەلسەندى قاتىسۋىمەن بيلىكتىڭ بارلىق تارماقتارىنىڭ كۇش سالۋى, تىعىز ءوزارا ءىس-قيمىلى قاجەت ەكەنىن اتاپ ءوتتى.
كوميسسيانىڭ وتىرىسىندا تۇجىرىمدالعان ونىڭ ۇسىنىمدارى مەملەكەت باسشىسىنىڭ, پارلامەنت پەن ۇكىمەتتىڭ نازارىنا جەتكىزىلەتىن بولادى.
