مەيكاتون «TOM: Kazakhstan» – ءبىر جاعىنان كرەاتيۆتى جانە دارىندى جاستاردىڭ, ەكىنشى جاعىنان مۇمكىندىگى شەكتەۋلى ادامدار مەن ولاردىڭ ەڭ جاقىن ورتاسىنىڭ باسىن قوساتىن, ولاردىڭ تۇرمىس-تىرشىلىگىندەگى اۋىرتپالىقتاردان وتۋگە كومەكتەسەتىن تەحنولوگيالىق شەشىمدەردى ويلاستىرۋ ءۇشىن قۇرىلعان حالىقارالىق الەۋمەتتىك جوبا. ياعني مۇندا مەيكەرلەر نيدنوۋەرلەرمەن بىرگە وزدەرىنىڭ يدەيالارىن جۇزەگە اسىرىپ قانا قويماي, مۇگەدەكتەردى قوعامعا بەيىمدەۋگە جانە ولاردىڭ تولىققاندى ءومىرىن ۇيىمداستىرۋعا باعىتتالعان پروتوتيپتەردى جاسايدى.
ء«ابۋ ناسىر ءال-فارابي قايىرىمدى قالا تۇرعىندارىنىڭ كوزقاراستارى تۋرالى تراكتاتىندا ۇرلىق, زورلىقسىز ءبىر-ءبىرىن جاقسى كورەتىن ادامدارمەن قايىرىمدى قالا قۇرىلاتىنىن ايتادى. مەنىڭشە دە ادامداردىڭ ىڭعايلى ءومىر سۇرۋىنە, بارلىعىنا تەڭ مۇمكىندىكتەر جاسايتىن ورتانى قايىرىمدى قالا دەپ ايتادى. سونىڭ ءبىرى – مەيكاتون جوباسى. بۇل بىرىنشىدەن, مۇمكىندىگى شەكتەۋلى ازاماتتارعا وسى قوعامدا ەكەنىن سەزىندىرۋ; ەكىنشىدەن, وسى مەيكاتونعا ولاردىڭ وزدەرىن قاتىستىرا وتىرىپ, ماسەلەلەرىن ءبىلۋ; ۇشىنشىدەن, وسى يدەيالار تەك قانا جوبا جۇزىندە قالىپ قويماي, ولاردى جۇزەگە اسىرۋعا كومەكتەسۋ; تورتىنشىدەن, وسى جوبالاردىڭ دايىندارىن قاجەتتى ادامدارعا بىردەن سىيلاپ, ولاردىڭ كۇندەلىكتى ومىرىنە قولداۋ كورسەتۋ. مۇنىڭ بۇعان دەيىنگى مەيكاتوندارعا قاراعاندا ەرەكشەلىگى – جالپى مۇمكىندىگى شەكتەۋلى ازاماتتارىمىزعا قانداي جاعداي جاساۋعا بولادى, ولاردىڭ قانداي ماسەلەلەرى بار دەگەندى زەرتتەپ, ونى ءتيىستى ورگاندارعا ۇسىنۋ. وسى ارقىلى ءبىز ينكليۋزيۆتى قوعام قالىپتاستىرۋ ءۇشىن تاعى قانداي قادامدار جاساۋعا بولاتىنىن زەردەلەمەكپىز», دەيدى نۇر-سۇلتان قالاسىنىڭ جاستار ساياساتى ماسەلەلەرى باسقارماسىنىڭ باسشىسى داۋلەت كارىبەك.
مەيكاتون «توم: Nur-Sultan» جوباسى نازارباەۆ ۋنيۆەرسيتەتتىڭ يننوۆاتسيالىق كلاستەرىنىڭ Fab Lab زەرتحاناسىندا ونىنشى رەت قولعا الىنعالى وتىر. وعان ون كوماندا مەن مۇمكىندىگى شەكتەۋلى ون ساراپشى قاتىسادى. وتىنىمدەردى قابىلداۋ 2 ناۋرىزدان 1 ساۋىرگە دەيىن جالعاسادى. ءوتىنىمدى 3 جانە 5 ادامنان تۇراتىن توپتارعا نەمەسە جەكە ۇمىتكەرلەرگە بەرۋگە بولادى. جاسقا دا, ماماندىقتارعا دا شەكتەۋ جوق. وتىنىمدەر
www.kazakhstan.tomglobal.org سايتىندا قابىلدانادى.
بيىل مەيكاتون ءۇش كەزەڭمەن وتەدى. ءبىرىنشى Ideathon كەزەڭىندە 11-13 ناۋرىز كۇندەرى كوماندالار قازىلار القاسىنا يدەيالارىن ۇسىنادى. ەكىنشىسى – پروتوتيپتەردى دايىندايتىن Pre TOM كەزەڭى. مۇندا 15 ءساۋىر كۇنى مەيكەرلەردىڭ مۇمكىندىگى شەكتەۋلى جاندارمەن كەزدەسۋى وتەدى. ءۇشىنشى TOM كەزەڭىندە قاتىسۋشىلار قازىلار القاسى الدىندا پروتوتيپتەردى قورعايدى. 72 ساعاتتىق ۇزدىكسىز جۇمىس دەپ اتالاتىن سوڭعى كەزەڭ 15-18 مامىر كۇندەرىنە جوسپارلانعان.
«بۇل مارافوندا ءارتۇرلى سالاداعى مامانداردان قۇرالعان كوماندا بار, ولاردىڭ ارقاسىندا ەرەكشە قاجەتتىلىكتەرى بار ادامداردىڭ مۇمكىندىكتەرى كەڭەيىپ, ال مەيكاتوندارعا قاتىسۋشىلار الەۋمەتتىك كاسىپكەرلىكتە وزدەرىن سىناپ كورۋگە مۇمكىندىك الادى. ماعان مۇمكىندىك بەرگەنى ءۇشىن راحمەت ايتقىم كەلەدى جانە ادامدارعا قۋانىش سىيلايتىن وسىنداي جوبالار كوپ بولسا ەكەن», دەيدى «قازاقستان مۇگەدەكتەر كونفەدەراتسياسى» رقب اتقارۋشى ديرەكتورىنىڭ ورىنباسارى الەكساندر حوركين.
ۇيىمداستىرۋشىلاردىڭ ايتۋىنشا, بىلتىر مەيكاتونعا 7 كوماندا قاتىسىپ, 7 ءپروتوتيپتىڭ ىشىنەن ەكى ءپروتوتيپتى كوماندا جاساقتاپ, نيدنوۋەرۋعا جەكە پايدالانۋعا بەرىلىپتى. ءبىرى جەتىلدىرىلگەن ەلەكتر اربا بولسا, ەكىنشىسى ورتوپەديالىق تۇراقتاندىراتىن, جارتىلاي قاتتى تاڭعىشى, جۇمساق بىلەزىك ورتوزى بار پروتوتيپ, ونى قولدانۋشى قولىنا سۇيەنە وتىرىپ وزدىگىنەن سۇيرەي الادى. ال بيىل كوماندالار سانى 10-عا دەيىن كوبەيتىلمەك.
«بۇل ءىس-شارانىڭ ەرەكشەلىگى – ءبىزدىڭ كوز الدىمىزدا قالاي جانە كىمگە جاسالاتىنىن كورەمىز. مەيكاتوننان كەيىن ادامداردىڭ ءومىرى قالاي وزگەرگەنىن باقىلاي الامىز», دەيدى نۇر-سۇلتان قالاسى اكىمدىگىنىڭ «استانا جاستارى» كمم باسشىسى چينگيز تلەۋلين.
