پرەمەر-ءمينيسترىنىڭ ورىنباسارى ە. توعجانوۆ ەلىمىزدىڭ ماسكالارمەن تولىق قامتاماسىز ەتىلەتىنىن ايتتى.
«ارينە, جەكەلەگەن ءدارىحانالاردا بۇگىندە شىنىمەن دە ماسكالار جوق شىعار. ءبىز وعان كەپىلدىك بەرە المايمىز. بۇل تاقىرىپ كوتەرىلگەن العاشقى كۇندەرى قازاقستاندا عانا ەمەس, كوپتەگەن ەلدەردە وسىنداي دۇربەلەڭ ورىن الدى. سوندىقتان, ارينە, بەلگىلى ءبىر تاپشىلىق بولدى. بىراق قازىر بۇل ماسەلەنىڭ بارلىعى تولىعىمەن مەملەكەتتىڭ باقىلاۋىنا الىنعان. ماسكامەن قامتاماسىز ەتۋ ماسەلەسى بۇگىندە كۇن تارتىبىندە تۇر. ءبىزدىڭ ءوز كومپانيالارىمىز بار, سوندىقتان بارلىق مەملەكەتتەر قازىر وسى ماسەلەگە الاڭداۋشىلىق ءبىلدىرىپ وتىر, وزدەرى شىعاراتىن ماسكالاردى جىبەرمەيدى. سول سەبەپتى ءبىزدىڭ بارلىق ءتورت كومپانيا تولىق جۇمىس ىستەپ جاتىر. قازاقستان ماسكالارمەن تولىق كولەمدە قامتاماسىز ەتىلەدى. تاعى دا ايتامىن, ەگەر جەكەلەگەن ءدارىحانالاردا ماسكالار بولماي قالسا, ول قازاقستاندا ءبىزدىڭ بۇعان ءازىر ەمەستىگىمىزدى بىلدىرمەيدى», — دەدى ە. توعجانوۆ.
سونداي-اق ول ناقتى مەملەكەتتىك ورگاندارعا, ەڭ الدىمەن, شەكارا ماڭى جانە كەدەن قىزمەتتەرىنە قازاقستان شەكاراسىنان تىس جەرلەرگە ماسكالاردى شىعارۋعا قاتاڭ تىيىم سالۋ تۋرالى تاپسىرما بەرىلگەنىن حابارلادى. ە. توعجانوۆتىڭ ايتۋىنشا, مۇنداي ارەكەتتەر, ەڭ الدىمەن, قازاقستاننان قىتايعا جەتكىزۋ تۇرعىسىنان ورىن العان.
دەنساۋلىق ساقتاۋ ءمينيسترى ە. ءبىرتانوۆتىڭ ايتۋىنشا, دەنى ساۋ ادامعا ماسكا كيۋدىڭ قاجەتى جوق. ەڭ الدىمەن, ماسكالار ناۋقاستار مەن تاۋلىك بويى ءتۇرلى ينفەكتسيالارى بار پاتسيەنتتەرمەن بايلانىسقا تۇسەتىن مەديتسينا قىزمەتكەرلەرى جۇمىس ىستەيتىن مەديتسينالىق مەكەمەلەردە مىندەتتى تۇردە بولۋى ءتيىس.
ء«بىز مەديتسينا ۇيىمدارىنا ادامداردى قورعاۋ ءۇشىن قور قالىپتاستىردىق. ەگەر ءسىز ءوزىڭىز اۋىرىپ جۇرسەڭىز, تىپتەن قاراپايىم تۇماۋ بولسا دا, اينالاڭىزداعى ادامداردى قورعاۋ ءۇشىن ماسكا تاعىپ ءجۇرۋىڭىز قاجەت. ورىن العان دۇربەلەڭ, بايبالام ۇلكەن شىعىن اكەلۋدە, سەبەبى بولشەك ساۋداداعى بۇكىل كولەمدى ازاماتتار بۇگىندە ساتىپ العان. قوسىمشا ءوندىرۋ ماسەلەسى قارالىپ جاتىر», — دەدى دەنساۋلىق ساقتاۋ ءمينيسترى.
ءوز كەزەگىندە يندۋستريا جانە ينفراقۇرىلىمدىق دامۋ ۆيتسە-ءمينيسترى بەرىك قاماليەۆ قازاقستاندىق كاسىپورىنداردىڭ ونىمدىلىگى تاۋلىگىنە 170 مىڭ ماسكانى قۇراپ وتىرعانىن حابارلادى.
«اي سايىن بۇل كاسىپورىندار 5 ملن دانا ماسكا شىعارادى. ونى 6,5 ملن داناعا دەيىن كوبەيتۋگە مۇمكىندىك بار. سوندىقتان دەنساۋلىق ساقتاۋ مينيسترلىگىمەن بىرلەسىپ, پرەمەر-ءمينيستردىڭ تاپسىرماسى بويىنشا ءبىز ولاردى قامتاماسىز ەتۋمەن اينالىسىپ جاتىرمىز. ولاردىڭ شيكىزاتى جىل سوڭىنا دەيىن جەتكىلىكتى. تەك ءبىر كومپانيادا قحر-دان جەتكىزۋشىلەر شيكىزات ورنىنا مەديتسينالىق ماسكالاردىڭ 50%-ىن بەرۋدى سۇراعان جاعداي بولدى. بۇل ماسەلە شەشىلدى», — دەدى ب. قاماليەۆ.
