«باستاپقىدا باق-تا جاريالانعان اقپارات دۇرىس ەمەس بولدى. ونداعى تىزىمدە بارلىعى 7 ەل بولدى. شىن مانىسىندە, شەكتەۋ 21 ەلگە قاتىستى بولاتىن. قازاقستان 49 ەلدىڭ قاتارىنا كىرگەن جەتى ەلدىڭ قاتارىندا كورسەتىلدى, بۇل ەلدەردىڭ ازاماتتارى ساۋد ارابياسىنا كەلگەن سوڭ اۋەجايدا ۆيزا الا الادى», — دەدى ءمينيستردىڭ ءبىرىنشى ورىنباسارى.
ش. نۇرىشەۆ قالعان 14 ەلدىڭ ازاماتتارى الدىمەن ۆيزانى راسىمدەۋگە مىندەتتى ەكەنىن, تەك سودان كەيىن عانا ساۋد ارابياسىنا كەلۋى كەرەكتىگىن ايتتى.
«اقپارات دۇرىس بولمادى, ول تارالىپ كەتتى, بىزدە كوروناۆيرۋس تارالىپ, شەكتەۋ سودان جاسالعانى ءتارىزدى كورىندى», — دەپ ءتۇسىندىردى ش. نۇرىشەۆ.
سونىمەن قاتار شاحرات نۇرىشەۆ قازاقستاندىقتاردى يران مەن وڭتۇستىك كورەيادان ەۆاكۋاتسيالاۋ جوسپارلارى تۋرالى ايتىپ بەردى. ونىڭ ايتۋىنشا, بۇگىندە يراندا قازاقستاننىڭ 170 ازاماتى, وڭتۇستىك كورەيادا 34 600 جۋىق ازاماتى بار.
«يراننان ەۆاكۋاتسيالاۋ ماسەلەسى ازىرگە قارالىپ جاتقان جوق. دەگەنمەن, ءبىزدىڭ ەلشىلىك بارلىق ازاماتتارمەن جۇمىس جاساپ جاتىر. يراننان ەلگە ورالعىسى كەلەتىن جاعدايدا, ولار قاجەتتى كومەكتى كورسەتۋگە ءازىر», — دەدى ش. نۇرىشەۆ.
2020 جىلدىڭ 1 ناۋرىزىنان باستاپ نۇر-سۇلتان – سەۋل جانە الماتى – سەۋل باعىتتارى بويىنشا تۇراقتى رەيستەردىڭ سانى اپتاسىنا 9-دان 3 رەيسكە دەيىن قىسقارتىلدى.
«رەيستەر سانى 9-دان 3-كە دەيىن قىسقارتىلدى, بۇل قايتۋعا نيەت بىلدىرگەن ازاماتتاردىڭ رەيستەردى پايدالانا الۋى ءۇشىن جاسالدى. ەۆاكۋاتسيا – سوڭعى شارا, سوندىقتان قايتۋعا نيەت بىلدىرگەن تۇلعالار ازىرگە ءالى دە ۇشىپ جاتقان رەيستەرمەن ەلگە ورالا الادى», — دەپ ءتۇسىندىردى سىرتقى ىستەر ءمينيسترىنىڭ ءبىرىنشى ورىنباسارى.
