زياتكەرلىك مەكتەپتەردىڭ ۇزدىك پەداگوگتەرى وقىتۋدىڭ جاڭا ستراتەگيالارىن, كوشباسشىلىق الەۋەتىن, IT-رەسۋرستارى مەن سىني ويلاۋدى قولدانۋدى, اتا-انالارمەن جانە وقۋشىلارمەن ىنتىماقتاستىق ورناتۋدىڭ تابىستى الگوريتمدەرىن جانە وزگە دە جەتىستىكتەرىن كورسەتتى.
ءۇي تاپسىرماسى رەتىندە ازىرلەنگەن «وقۋشىلارمەن تىلدەسۋ» جانە «اتا-انالارمەن تىلدەسۋ» بەينەفيلمدەرى مۇعالىمنىڭ باسىم داعدىلارى: تىڭداي جانە ەستي ءبىلۋ, پەداگوگيكالىق ماسەلەنى تۇجىرىمداي جانە شەشە ءبىلۋ, ىنتىماقتاستىق جانە سەنىم احۋالىن قالىپتاستىرا بىلۋگە باعىتتالدى. ءاربىر قاتىسۋشى نۇر-سۇلتان قالاسىنا «مەنىڭ پەداگوگيكالىق ۇستانىمىم» اتتى دەربەس كورمەسىن الا كەلدى, سونداي-اق «مەن – تۇلعامىن, مەن – مۇعالىممىن» تاقىرىبىنداعى تانىسقىسىن دايىندادى. ولار ەلورداسىنداعى فيزيكا-ماتەماتيكا باعىتىنداعى مەكتەپتە اشىق ساباقتار وتكىزىپ, شەشەندىك ونەر بويىنشا ادىلقازى القالارىنىڭ تاپسىرماسىن ورىندادى, «پەداگوگيكالىق جاعدايات» رولدىك ويىنىنا قاتىستى.
قازىلار القاسىنىڭ ءتورايىمى سۆەتلانا يسپۋسينوۆا «جىل مۇعالىمى» باستى كاسىبي بايقاۋىنىڭ جەڭىمپازدارى مەن لاۋرەاتتارىن تاڭعاجايىپ جەتىلىك دەپ اتادى.
بايقاۋدىڭ باس جۇلدەسى نۇر-سۇلتاندا قالدى – حالىقارالىق باكالاۆريات مەكتەبىنىڭ حيميا ءپانى مۇعالىمى دينارا بەيسەمباەۆا NIS جۇيەسىندەگى 2020 جىلدىڭ ۇزدىك وقىتۋشىسى اتاندى.
كوكشەتاۋ نزم اعىلشىن ءتىلى مۇعالىمى كاميليا راحىمجانوۆا ءبىرىنشى ورىندى جەڭىپ السا, ەكىنشى ورىنعا پەتروپاۆلدىق دينا قۇداباەۆا لايىق دەپ تانىلدى, ال ۇزدىك ۇشتىكتى اقتوبەلىك ميرات وسپانوۆ تۇيىندەدى.
سونىمەن قاتار ورال قالاسىنان بوريس زەلەنوۆ, وسكەمەننەن رۇستەم قابدىكارىموۆ, شىمكەنت قالاسىنداعى حيميا-بيولوگيا باعىتىنداعى مەكتەپتەن ورالحان وماروۆ لاۋرەات اتاندى.
سۆەتلانا يسپۋسينوۆا مۇعالىمدەردىڭ كاسىبي دەڭگەيىنىڭ جوعارىلاعانىن جانە ناتيجەلەردى قورىتىندىلاۋ كەزىندە ۇپاي ايىرماشىلىعى از بولعانىن اتاپ ءوتتى. قازىلار القاسى قۇرامىندا نازارباەۆ زياتكەرلىك مەكتەپتەرى جەلىسىنىڭ بارلىق ورتالىقتارىنىڭ وكىلدەرى بولدى, ولار ءىس جۇزىندە وتاندىق ءبىلىم بەرۋ جۇيەسىندەگى باستى ادىستەمەلىك ينستيتۋتتاردىڭ ءبىرى بولىپ سانالادى, بۇل كونكۋرسقا قاتىسۋشىلارعا قويىلاتىن تالاپتاردىڭ جوعارى دەڭگەيىن راستايدى.
