ءبىز قازاق مەكتەبىندە وقىدىق, قازاق بالالارىنىڭ ورتاسىندا وستىك. مەكتەپتە وقىتاتىن قازاق ادەبيەتى مەن ءتىلىن قازاقتاردان ارتىق بىلمەسەك, كەم بىلگەن جوقپىز. بىزبەن بىرگە ءبىر نەمىس, سوسىن ۋكراين بالاسى دا وقىدى. كوپتەگەن قازاق بالاسى سياقتى ءبىز دە ورىسشاعا يكەمسىزدەۋ بولىپ وستىك. قازاقشا ولەڭدەر مەن اندەردى جۇرتتان بۇرىن جاتتاپ الاتىنبىز. انام ءانيپا كەيبىر قازاق سوزدەرىن دۇرىس ايتپاي, تاتارشىلاسا كۇلەتىن ەدىك. قازاقشا قالاي دۇرىس ايتۋ كەرەكتىگىن ۇيرەتەتىنبىز. ءوزى بارلىق كورشىلەس قازاق ايەلدەرىمەن تاتۋ بولدى. قولى ىسمەر ەدى. ۇزاتىلاتىن قىزدىڭ, تۇسەتىن كەلىننىڭ – بارلىق توي-تومالاق بولاتىن ءۇيدىڭ جاساۋلارىنا مەنىڭ انام بەلسەنە قاتىسىپ جۇرەتىن. ءبىر ۇيدە توي بولسا, ءبىز قۋاناتىنبىز, ويتكەنى شەشەمىز سول ۇيدەن ىلعي ىستىق سورپا-سۋان الا كەلىپ, ءبىزدى ءبىر تويدىراتىن.
قازاقتار مەيىرىمدى حالىق قوي. ەشقاشان ءبىزدى باسقا ۇلتسىڭ دەپ شەتتەتكەن ەمەس. ءبىز بارىمەن دە تۋىستارى سەكىلدى ارالاساتىنبىز. ءبىزدىڭ ەڭ كىشىمىز راميلدەن باسقامىزدىڭ ءبارى قازاقپەن وتاۋ قۇردىق. قىزدارىمىز دا قازاققا تۇرمىسقا شىعىپ, قازىر قازاق وتباسىلارىنىڭ تۇتىندەرىن تۇتەتىپ وتىر.
مەن قازاق ورتاسىندا ءوسىپ, قازاقتارمەن تىعىز ارالاسقانىمدى ءوزىمنىڭ ءبىر باقىتىم دەپ سانايمىن. ءبىز بارلىق قازاق ءداستۇرىن وزىمىزگە قابىلداعانبىز. باسقا حالىقتاردىكىن سىيلاعانىمىزبەن ءدال بىزدىكىندەي ەمەس ەكەن دەپ كەمشىلىك تاۋىپ تۇرامىز. كىشى ءىنىم راميل تاتار قىزىن الدى. سوندا ولاردىڭ قۇدا كۇتۋلەرىنە كوڭىلىمىز تولمادى. بىزدەگى سياقتى ەت اسىپ, استاۋ تولى قازى-قارتا بولماعان سوڭ ءبىز تاتاردىڭ ءبالىش-مالىشتەرىنە قاناعاتتانبادىق. ۇيگە كەلگەن سوڭ قايتادان وزىمىزشە ەت اسىپ ەدىك...
بۇگىنگى العىس ايتۋ كۇنىندە مەن الدىمەن قازاق حالقىنا ريزاشىلىعىمدى بىلدىرگىم كەلەدى. بۇل حالىقتىڭ مەيىرىمى مول, جۇرەگى كەڭ. ەشقاشان ەشكىمگە الاۋىزدىق جاسامايدى. سوندىقتان قازاق حالقى جاساي بەرسىن دەپ تىلەيمىن.
راشيد گاتاۋللين,
«تاتار-باشقۇرت» ەتنومادەني ورتالىعىنىڭ مۇشەسى,
قارت ۇستاز
سولتۇستىك قازاقستان وبلىسى
