وسكەمەندەگى س.امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىندە «ەتنيكالىق قازاق ستۋدەنتتەرگە قۇقىقتىق تۇسىندىرمە جۇمىسىنىڭ ماڭىزدىلىعى» تاقىرىبىندا كەزدەسۋ ءوتتى.
دۇنيە ءجۇزى قازاقتارى قاۋىمداستىعى شىعىس قازاقستان وبلىستىق فيليالى جانە «وتانداستار» قورىنىڭ فرونت-ءوفيسى ۇيىمداستىرعان شاراعا جوعارىدا اتالعان وقۋ ورنىندا موڭعوليا جانە قىتاي ەلىنەن كەلىپ ءبىلىم الىپ جاتقان 150-دەن استام ستۋدەنت جاستار قاتىستى.
سونىمەن قاتار جيىنعا وبلىستىق ىشكى ساياسات باسقارماسىنىڭ جاستارمەن جۇمىس ءبولىمىنىڭ باسشىسى ەركەبۇلان بالتابەكوۆ, كوشى-قون پوليتسياسىنىڭ اعا ينسپەكتورى رۋسلان حاسەنوۆ, وبلىستىق الەۋمەتتىك باعدارلامالاردى ۇيلەستىرۋ باسقارماسىنىڭ كوشى-قون ءبولىمىنىڭ باس مامانى دانا قابدۋللينا, وسى ۋنيۆەرسيتەتتىڭ وقىتۋشىلارى ايىمگۇل سەيپۋتانوۆا, بەيبىتگۇل ءشۇرشىتباي قاتىسىپ, وي-پىكىرلەرىن ورتاعا سالدى.
كەزدەسۋدى دۇنيە ءجۇزى قازاقتارى قاۋىمداستىعى وبلىستىق فيليالىنىڭ ورىنباسارى, «وتانداستار» قورىنىڭ فرونت-ءوفيسىنىڭ باس ساراپشىسى حۋانباي اسكەرحان اشىپ, فرونت-ءوفيستىڭ قىزمەتىنە جان-جاقتى توقتالدى.
ول ءوز سوزىندە: «فرونت-وفيس قانداستارعا اقپاراتتىق-قۇقىقتىق كومەك بەرىپ, كوشى-قون سالاسىنداعى زاڭنامالاردى جانە كوشى-قونعا قاتىستى مەملەكەتتىك باعدارلامالاردۆ ءتۇسىندىرىپ, قانداستاردى ەكونوميكالىق تۇرعىدان قولداۋعا نازار اۋدارادى. وزگە مەملەكەتتەردەگى قازاق جاستارىنىڭ تاريحي وتانىندا ءبىلىم الىپ جاتۋىنىڭ ءوزى ۇلكەن ابىروي. بۇل قازاقستاننىڭ شەتتەگى قازاقتارعا دەگەن قامقورلىعىنىڭ ناقتى كورىنىسى» دەدى.
جيىندا ءار سالانىڭ ماماندارى ءوز سالاسى بويىنشا اقپاراتتىق تۇسىندىرمە جۇرگىزدى. جاستار تاراپىنان كوپتەگەن ساۋالدار قويىلدى. ماماندار جاستاردىڭ سۇراقتارىنا ناقتى جاۋاپ بەرىپ, كەي ماسەلەلەر بويىنشا ستۋدەنتتەر جەكە كەڭەس الدى. سونىمەن قاتار بىرقاتار ماڭىزدى ساۋالدار (وبلىس بويىنشا كوشىپ كەلۋ جەڭىلدىگىنىڭ يگەرلۋىنە قاتىستى قانداستاردى قابىلداۋعا قوسىمشا قارجى سۇراۋ, ستۋدەنتتەر تۇراقتى تىركەۋگە ىقتيارحاتقا وقۋ ورنى بويىنشا تىركەلۋ) دقق «وتانداستار» قورىنا جولداناتىن بولدى.
وسكەمەن
