ايماقتار • 28 اقپان، 2020

اۋىر سىناق، قيىن سۇراق

31 رەتكورسەتىلدى

سارسەنبى كۇنى پەتروپاۆل قالاسىندا اۋا رايى ەرەكشە مىنەز كورسەتىپ، بۇرشاق ارالاس جاڭبىر جاۋدى. ونىڭ ۇستىنە قاتتى جەل تۇرىپ، كوكمۇزداققا اينالعان قالا كوشەلەرىندە جاياۋ جۇرگىنشىلەردى ۇشىرىپ جىبەرۋ قاۋپى تۋدى.

وسىنىڭ كەسىرىنەن پەتروپاۆل اۋرۋحانالارىنىڭ جاراقات بولىمدەرىنە 39 ادام جۇگىنگەن. ءبىر قىزىعى، نۇر-سۇلتان قالاسىندا مۇندايدا الدىن الا ەسكەرتۋ جاسايتىن 112 قىزمەتى پەتروپاۆلدا شاباندىق كورسەتىپ، تەك ەكىنشى كۇنى عانا مەكتەپ وقۋشىلارىنا ساباق بولمايتىندىعىن جاريالادى.

جالپى، بيىل سولتۇستىك قازاقستاندا قالىپتاعى قىس بولعان جوق. قاڭتار ايىنىڭ قاقاۋعا ءتيىستى كۇندەرى دە قۇلاق توڭعىزبايتىن بىرسىدىرعى عانا سالقىن بولدى. ال اقپان ايى قالىپتاعى ناۋرىز ايىنا ۇقساپ، جىلىمىق بولىپ، اراسىندا قار دا ەرىپ، ول كەشكە جانە تۇندە قاتىپ، كوك مۇزعا اينالىپ  جاتتى. مۇنىڭ قانداي سەبەبى بار ەكەنىن ەشكىم بىلمەيدى. قالاداعى توسىن اپاتقا ۇشىراعان ادامدار الدىمەن اپارىلاتىن №3 اۋرۋحانانىڭ جاراقات ءبولىمىنىڭ مەڭگەرۋشىسى ۆ.گريباشەۆتىڭ ايتۋىنا قاراعاندا، بارلىعى 94 ادام ەمدەلۋدە ەكەن. سولاردىڭ نەگىزگى بولىگى كوكتايعاقتىڭ كەسىرىنەن تۇسكەندەر. 

وسى كۇندەرى رەسپۋبليكالىق قانا ەمەس، وبلىستىق ماڭىزى بار اۆتوجولدار دا تەگىس جابىلدى. الايدا بۇرىن جولعا شىعىپ كەتكەن رەسپۋبليكالىق جولدارداعى جولاۋشىلار قيىنشىلىقتاردى باستارىنان كەشۋدە ەكەنىن جول پوليتسياسىنىڭ اعا ينسپەكتورى ب.بايعاسكينا حابارلادى. ونىڭ ايتۋىنا قاراعاندا، ماعجان جۇماباەۆ اۋدانىنىڭ اۋماعى ارقىلى وتەتىن «چەليابى-ءنوۆوسىبىر» اۆتوجولىندا 60-تان استام كولىك جۇرە الماي، كەپتەلىپ قالعان.

ء«بىزدىڭ پاترۋلدىك پوليتسيا قىزمەتكەرلەرى اتالعان اۆتوكولىكتەردىڭ وتۋىنە مۇمكىندىكتەر تۋدىرۋدا. وعان قاجەتتى بارلىق جۇمىستار جاسالۋدا. ازىرگە وبلىس اۋماعىندا جول كولىك وقيعالارى تىركەلگەن جوق» دەدى ول باق-قا ارناعان سوزىندە.

ءدال وسى كۇنى وبلىستىق اكىمدىكتىڭ وتىرىسى بولىپ، وندا نەگىزگى ماسەلە رەتىندە بيىلعى كوكتەمدەگى قارعىن سۋىنان قالاي ساقتانۋ ماسەلەلەرى تالقىلاندى. بيىلعى قالىڭ جاۋعان قاردىڭ كەسىرىنەن وبلىس بويىنشا 92 ەلدى مەكەن مەن پەتروپاۆلدىڭ شەتكى اۋماقتاعى 250-گە جۋىق  ءۇيىن سۋ باسۋى مۇمكىن. كازگيدرومەت ماماندارىنىڭ ايتۋىنشا، بۇگىنگە دەيىن جاۋعان قاردىڭ قالىڭدىعى كەي جەرلەردە  48 سم-گە دەيىن جەتەدى. سونىڭ سالدارىنان قار سۋىنىڭ مولشەرى نورمادان ەكى ەسە جوعارى بولماق. وتكەن جىلداردىڭ تاجىريبەسىن ەسكەرە وتىرىپ، سۋ باسۋ قاۋپى جوعارى ەلدى مەكەندەردىڭ 60-ىنىڭ ماڭىندا توپىراقتان بوگەت جاسالىپ جاتىر. «قازگيدرومەت» رمم سقوف ديرەكتورى قىمبات مەرعاليەۆانىڭ ايتۋىنا قاراعاندا: «قازىر وبلىستىڭ وزەن-كولدەرىندە سۋ مولىنان جينالعان. سەرگەەۆ سۋ قويماسى 95 پروتسەنتكە تولى، بۇل 2017 جىلدىڭ كورسەتكىشكە سايكەس كەلەدى. بيىلعى قىس ەرەكشە جىلى بولعاندىقتان، كوكتەم ەرتە كەلىپ، مۇز تەز ەريدى. ناۋرىزداعى ورتاشا اۋا تەمپەراتۋراسى -6 گرادۋستى قۇرايدى. بۇل نورمادان 1 گرادۋسقا جوعارى». 

ال وبلىستىق توتەنشە جاعدايلار دەپارتامەنتىنىڭ باستىعى راميل كامالوۆتىڭ ايتۋىنا قاراعاندا: «بيىل سلەتى وزەنىنىڭ بويىنداعى ءۋاليحانوۆ اۋدانىنىڭ  قۋلىكول مەن قاراتال اۋىلدارىن سۋ باسۋ قاتەرى مول. ويتكەنى، بۇل وزەنگە جينالاتىن ەرىگەن سۋدىڭ مولشەرى نورمادان 1،5 ەسە كوپ. وسىعان بايلانىستى اۋدان اكىمدىگى الدىن الا تەحنيكانىڭ دايىندىعىن تەكسەرىپ، قاجەت جاعدايدا كورشى وبلىستىڭ كومەگىنە جۇگىنۋگە دايىندالۋى قاجەت». 

وبلىس اكىمى قۇمار اقساقالوۆ تا بۇل ماسەلەگە قاتتى الاڭدايتىنىن ءبىلدىردى. ول ءوزىنىڭ سوزىندە: «بيىلعى كوكتەم قيىن بولماق. 2017 جىلعى جاعداي قايتالانباس ءۇشىن جۇمىلا شارا قولدانۋىمىز قاجەت. اۋىر تەحنيكانى دايىنداڭىزدار. ءبىزدىڭ تەحنيكامىز جەتپەسە، كورشى وڭىرلەردەن سۇراڭىزدار»، - دەدى.

قالاي دەسەك تە، بيىلعى كوكتەم وبلىس پەن اۋدان باسشىلارىنىڭ ىسكەرلىگىنە ۇلكەن سىناق بولعالى تۇر. تەك ىسكەر باسشىلار عانا قيىندىقتى ەڭسەرە الاتىندىعى داۋسىز.

 

سولتۇستىك قازاقستان وبلىسى   

سوڭعى جاڭالىقتار

ۇقساس جاڭالىقتار