وتكەن جىلى تۇركىستان وبلىسىندا 620,4 مىڭ شارشى مەتر تۇرعىن ءۇي, ياعني 5876 پاتەر پايدالانۋعا بەرىلگەن. بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق قۇرىلىس باسقارماسىنىڭ باسشىسى توقتار ۇسىپاليەۆ مالىمدەدى. وتكەن جىلى 198 ينۆەستيتسيالىق جوبانىڭ 100-ءى جۇزەگە اسىرىلعان. «نۇرلى جەر» مەملەكەتتىك تۇرعىن ءۇي باعدارلاماسىنىڭ اياسىندا 111 نىسان قۇرىلىسى جۇرگىزىلدى. «باسقارمانىڭ اعىمداعى جىلعى جوسپارى - 70 جوبالىق-سمەتالىق قۇجاتتاما ازىرلەۋ, 117 ينۆەستيتسيالىق جوبانى جۇزەگە اسىرۋ, ونىڭ اعىمداعى جىلى 81-ءى پايدالانۋعا بەرۋ جوسپارلانسا, 36 نىسان قۇرىلىسى 2021 جىلعا وتپەلى بولادى. بىرىڭعاي تۇرعىن ءۇي ساياساتىن ىسكە اسىرۋ بويىنشا 2020 جىلى وبلىستا 30 نىساننىڭ قۇرىلىسى جۇرگىزىلۋدە. جىل قورىتىندىسىمەن 28 نىسان پايدالانۋعا تاپسىرىلادى», دەدى باسقارما باسشىسى.
تۇركىستان قالاسىن دامىتۋ بويىنشا بيىل قىركۇيەك ايىندا اكىمشىلىك-ىسكەرلىك ورتالىعىندا 11 نىساننىڭ قۇرىلىسى پايدالانۋعا بەرىلمەك. سونداي-اق رۋحاني-مادەني ورتالىقتا 4 نىساننىڭ قۇرىلىسى تولىق اياقتالادى.
تۇركىستان وبلىسى
