سپورت • 28 اقپان، 2020

كوروناۆيرۋستىڭ كەسىرى ءتيۋى مۇمكىن

44 رەتكورسەتىلدى

وتكەن جىلدىڭ جەلتوقسان ايىن­دا قى­تاي­دىڭ ۋحان قالاسىندا پايدا بول­عان دەرتتىڭ سالدارىنان بيىل جا­پونيانىڭ باس شاھارى – توكيو­دا وتەتىن جازعى وليم­پيا ويىن­دارى مەن ەۋروپانىڭ 11 ەلىن­دە ۇيىم­داستىرىلاتىن فۋتبولدان ەۋروپا چەم­پيوناتى كەيىنگە قالدىرىلۋى نەمەسە مۇلدە وتپەي قالۋى مۇمكىن.

جىل باسىنان بەرى قىتايدا وتەتىن وليمپيا ويىندارىنا جولداما بەرۋشى جانە باسقا دا حالىقارالىق تۋرنيرلەر وزگە ەلگە اۋىستىرىلىپ، سپورتشىلارعا جانە سپورتتىق جارىستاردى ۇيىمداستىراتىن ەلدەرگە قيىندىق تۋدىرۋدا. ەندى Covid-19 ۆيرۋسى ءتورت جىلدا ءبىر وتكىزىلەتىن وليمپياداعا جانە ەۋروپا چەمپيوناتىنا دا كەرى اسەر ەتۋى مۇمكىن دەپ بولجانۋدا.

حالىقارالىق وليمپيادا كوميتەتىنىڭ وكىلى ديك پاۋند 2020 جىلعى توكيو وليم­پيا­داسىنىڭ بيىل ءوتۋى نەمەسە وتپەۋى تۋرالى ناقتى شەشىم مامىر ايىنىڭ سوڭىندا حابارلاناتىنىن ايتتى. «قاۋىپتى ەپيدەميا وليمپياداعا دەيىن سەيىلىپ، بارلىق باسەكەلەر ءوز ۋاقىتىندا باستالادى دەپ ۇمىتتەنەمىز. سوندىقتان مامىر ايىنىڭ سوڭىنا دەيىن كۇتۋ كەرەك. ەگەر بارلىعى ءبىز كۇتكەندەي بولماسا، وليمپيادانى وتكىزبەۋ نۇسقاسىن دا قاراس­تىرىپ كورەمىز»، دەيدى پاۋند.

بۇعان دەيىن توكيو-2020 ۇيىمداستىرۋ كو­مي­تەتى وليمپيا ويىندارى ءۇشىن ەرىكتىلەردى دايىنداۋ ماسەلەسى كەشىكتىرىلىپ جاتقانىن ما­لىمدەگەن بولاتىن. ال وسىدان بىرنەشە كۇن بۇرىن لوندون وليمپيادا كوميتەتىنەن بي­­ىل­عى ءتورت جىلدىقتىڭ باستى دوداسىن وتكىزۋگە ۇمىتكەر قالا رەتىندە ۇسىنىسىن قاراپ كورۋدى وتىنگەن بولاتىن. بريتانيا استاناسىن باس­قا­رۋعا نەگىزگى ۇمىتكەردىڭ ءبىرى شون بەيلي ەگەر جا­پونيادا وليمپيادا وتەتىن بولسا، كوروناۆيرۋستان بىرنەشە مىڭ ادام زارداپ شەگەتىنىن اي­تىپ، ءوزىنىڭ الاڭداۋشىلىعىن بىلدىرگەن-ءدى. ۇلىبريتانيا استاناسى بۇعان دەيىن 1908، 1948 جانە 2012 جىلعى جازعى وليمپيا ويىندارىن وتكىزگەن بولاتىن.

سونداي-اق ۋەفا ۆيتسە-پرەزيدەنتى ميكەلە ۋۆا دا 12 ماۋسىم مەن 12 شىلدە ارالىعىندا وتەتىن ەۋرو-2020 ءتۋرنيرى كەيىنگە شەگەرىلۋى نەمەسە بيىل وتپەي قالۋى مۇمكىن ەكەنىن مالىمدەدى. دوپ دوداسىنىڭ 60 جىلدىعىنا بايلانىستى ۋەفا تاريحتا تۇڭعىش رەت ءتۋرنيردى 11 ەلدىڭ 12 قالاسىندا ۇيىمداستىرۋدى كوزدەپ وتىرعان-دى.

«قازىرگى ۋاقىتتا وقيعالار بارىسىن قادا­عالاپ وتىرمىز. ەگەر ۆيرۋس بۇدان ءارى ءورشي بەرسە، امال جوق ءتۋرنيردى كەيىنگە شەگەرۋگە تۋرا كەلەدى. بالكىم ەۋروپا چەمپيوناتى بيىل وتپەۋى دە مۇمكىن. بىراق بىرىنشىلىكتى ءوز ۋاقىتىندا وتكىزۋگە تىرىسامىز»، دەيدى ۋۆۋ.

سوڭعى جاڭالىقتار

ۇقساس جاڭالىقتار