ۇكىمەت • 28 اقپان، 2020

مۇمكىندىگى شەكتەۋلىلەر ءاردايىم قولداۋ كورەدى

12 رەتكورسەتىلدى

پرەمەر-ءمينيستردىڭ ورىنباسارى ەرالى توعجانوۆ ۇلتتىق قۇرامانىڭ جاپونيادا وتەتىن پاراليمپيا ويىندارىنا دايىندىعى اياسىندا نۇر-سۇلتان قالاسىنداعى پاراليمپيادالىق جاتتىعۋ ورتالىعى قىزمەتىمەن تانىستى، دەپ حابارلادى پرەمەر-ءمينيستردىڭ ءباسپاسوز قىزمەتى.

پاراليمپيادالىق جاتتىعۋ ورتالى­عىندا قازاقستان قۇراما كومانداسىنىڭ وقۋ-جاتتىعۋ جيىندارى، شەتەلدىك كوماندالارمەن بىرلەسكەن جيىندار سونىمەن قاتار، ءتۇرلى سپورتتىق باسەكەلەر وتەدى.

قازاقستان رەسپۋبليكاسىنىڭ پاراليم­پيا­دالىق قۇراما كومانداسىنىڭ قۇرامىنا بارلىعى سپورتتىڭ 13 تۇرىنەن 523 سپورتشى كىرەدى. ەستەرىڭىزگە سالايىق، 2019 جىلدىڭ مامى­رىندا ورتالىقتى ارالاۋ بارىسىندا پرەزيدەنت قاسىم-جومارت توقاەۆ توكيودا وتەتىن پاراليمپيادا ويىندارىندا تا­بىس­تى ونەر كورسەتۋى ءۇشىن قازاقستان قۇرا­ما­سىنا بارلىق ۇيىمداستىرۋ جانە قار­جى­لىق قولداۋ كورسەتىلەتىنىن ايتقان بولا­تىن.

پاراليمپيادالىق جاتتىعۋ ورتالىعى 2018 جىلدىڭ 4 شىلدەسىندە تۇڭعىش پرەزي­دەنت نۇرسۇلتان نازارباەۆتىڭ قاتىسۋىمەن اشىلدى.

قازاقستاندا ازىرگە بالاماسى جوق ورتالىق جازعى جانە قىسقى پاراليمپيادالىق سپورت تۇرلەرى بويىنشا ۇلتتىق قۇراما كوماندالار مەن سپورتتىق رەزەرۆتىڭ ساپالى ءارى كاسىبي جاتتىعۋىنا ارنالىپ سالىنعان. مۇمكىندىگى شەكتەۋلى جاندارعا ارنالعان مۇنداي ورتالىق اقش، ۇلىبريتانيا، جاپونيا جانە وڭتۇستىك كورەيادا عانا بار.

ورتالىق بارلىق قاجەتتى قۇرال-جاب­دىقتارمەن جاراقتالعان.

ە.توعجانوۆقا ورتالىقتى تانىستىرعان ۇلتتىق پاراليمپيادالىق كوميتەتتىڭ تور­­اعاسى قايرات بورانباەۆ ەلىمىزدەگى پار­اليم­پيالىق قوزعالىس قىزمەتى مەن مۇمكىن­دىگى شەكتەۋلى جاندار اراسىنداعى بۇقا­را­لىق سپورتتىڭ دامۋى تۋرالى اڭگىمە­لەپ بەردى. ونىڭ ايتۋىنشا، ورتالىق قۇرىلىسى مەن جابدىقتاۋ بارىسىندا مۇمكىندىگى شەك­تەۋلى جانداردىڭ بارلىق قاجەتتىلىكتەرى ەسكەرىلگەن.

پاراليمپيادالىق جاتتىعۋ ورتالى­عىندا مۇگەدەك سپورتشىلار سپورتتىڭ 14 ءتۇرى بويىنشا جاتتىعا الادى. اي سايىن مۇن­دا شامامەن مۇمكىندىگى شەكتەۋلى 6 مىڭعا جۋىق سپورتشى جاتتىعادى.

ورتالىقتا بەيىمدەلگەن امبەباپ تسيفر­لى ترەناجەرلار مەن توپتىق جاتتىعۋ­لارعا ىڭعايلى ايماقتان تۇراتىن جاتتى­عۋ، ويىن جانە كۇرەسكە ارنالعان ءۇش سپورت­تىق زال جۇمىس ىستەپ تۇر. ءبىر اتاپ وتەر­لىگى، ورتالىقتى جابدىقتاۋعا پاراليم­پيا­داشىلاردىڭ وزدەرى دە اتسالىسقان. ماسەلەن، اربادا وتىرىپ بيلەۋ بويىنشا ەل قۇراماسىنىڭ مۇشەسى ارداق وتارباەۆ وسىنداعى مۇگەدەكتەر ارباسىن جۋاتىن ورىن­نىڭ اۆتورى.

ە.توعجانوۆ پاراليمپيادالىق جات­تىعۋ ورتالىعىنىڭ قازىرگى زامانعا ساي ينفراقۇرىلىمى مەن ماتەريالدىق-تەح­ني­كالىق جابدىقتالۋىنا جوعارى باعا بەردى.

ساپار بارىسىندا پرەمەر-ءمينيستردىڭ ورىنباسارى وتاندىق پاراليمپيادا سپورتىنىڭ تاريحىندا كورۋ قابىلەتى تومەن سپورتشىلار اراسىندا تۇڭعىش رەت ۇيىمداستىرىلعان گولبولدان قازاقستان كۋبوگىنىڭ اشىلۋ سالتاناتىنا قاتىستى.

ە.توعجانوۆ سپورتشىلارعا ارناعان سوزىندە ەلىمىزدە پاراليمپيادالىق سپورتتى دامىتۋدىڭ ماڭىزىن اتاپ ءوتتى. «مۇمكىندىگى شەكتەۋلى جانداردى الەۋمەتتىك قورعاۋ ءاردايىم ەل باسشىلىعىنىڭ با­قىلاۋىندا. مەملەكەت قازىر مۇمكىندىگى شەكتەۋلى جانداردىڭ ءوزىن دامىتۋعا جانە تولىققاندى ءومىر ءسۇرۋى ءۇشىن بارلىق قاجەتتى جاعدايدى جاساپ وتىر. پاراليمپيادالىق جاتتىعۋ ورتالىعىنىڭ اشىلۋى وسىعان دالەل. سىزدەردىڭ ارقايسىڭىزدا جەڭىسكە دەگەن ىنتا-جىگەر جەتكىلىكتى. بىراق جەڭىس تۇعىرىنىڭ جوعارى بيىگىن باعىندىرۋ ءۇشىن بۇگىننەن باستاپ تەر توگۋ قاجەت. سىزدەرگە ەل ءۇشىن جاۋاپتى سىنداردا جوعارى جەتىستىكتەر تىلەيمىن!»، دەدى ە.توعجانوۆ.

ەكى كۇنگە سوزىلاتىن بايراقتى باسەكەگە ەلىمىزدىڭ 5 وڭىرىنەن 40-تان اسا گولبولشى قاتىسىپ جاتىر. گولبول پاراليمپيادا ويىندارىنىڭ باعدارلاماسىنا ەنگىزىلگەن. سپورتتىڭ بۇل ءتۇرى قازاقستانعا 2017 جى­لى كەلگەن. سودان بەرى 3 چەمپيونات ۇيىم­داس­تىرىلدى.

بيىلعى باسەكە كومانداعا حالىقارالىق ارەناعا شىعۋعا جول اشادى.

سوڭعى جاڭالىقتار

ەرلىكتى دارىپتەيتىن قوماقتى قور

رۋحانيات • 05 ماۋسىم، 2020

ۇقساس جاڭالىقتار