– 2018 جىلى ەلباسى نۇرسۇلتان ءابىش ۇلى نازارباەۆ ءار شىلدەنىڭ ءبىرىنشى جەكسەنبىسىن ۇلتتىق دومبىرا كۇنى دەپ جاريالاعان بولاتىن. وتكەن جىلى ءبىز 1000 دومبىراشى شىعارىپ, ەكى كۇي ورىنداعان ەدىك. بيىل دا وسى داستۇردەن جاڭىلماي, 5 كۇي ورىنداماقپىز. دومبىراشىلاردىڭ 70 پايىزى اۋدان مەكتەپتەرىنىڭ وقۋشىلارى. سوندىقتان دومبىرانىڭ قۇندىلىعىن ارتتىرۋ ماقساتىندا, ءار شاڭىراقتا ۇلتتىق اسپاپتىڭ بولۋىن ناسيحاتتاپ, ء«ار ۇيدە – ءبىر دومبىرا» اكتسياسىنىڭ باستالعانىن جاريالايمىن, دەگەن اۋدان اكىمى ءامىرحان اسانوۆ امانكەلدى ورتا مەكتەبىنىڭ 6-سىنىپ وقۋشىسى ناۋرىزباي توقتاروۆقا دومبىرا سىيلادى. جەرگىلىكتى ونەرپاز, داۋلەسكەر كۇيشى ايتباي مۇزداحانوۆتى ۇلگى تۇتاتىن شاكىرت ناۋرىزباي بىرنەشە كۇي بىلەدى. تاياۋدا اۋدان وقۋشىلارى اراسىندا وتكەن ونەر بايقاۋىندا «ەركە سىلقىمدى» ورىنداپ, ءدۇيىم جۇرتتى ءتانتى ەتتى. قازاقتىڭ قارا دومبىراسىن قولىنا العان تالاپتى جاس:
– ۇيدەگى دومبىرام انگە ارنالعان. كۇي تارتۋعا كەلە قويمايدى. تومەنگى پەرنەلەرى تۇنشىعىپ قالادى. مىنا دومبىراڭىز ناعىز كۇيدىكى ەكەن, سويلەپ تۇر. شىلدەگە دەيىن تاعى بىرنەشە كۇي ۇيرەنىپ, ۇلتتىق دومبىرا كۇنىنە مۇقيات دايىندالامىن, – دەپ اكىمگە راحمەتىن ايتىپ, الداعى ۋاقىتتا ونەرىن دامىتا تۇسەتىنىن, وسى جولدا تىنباي ەڭبەكتەنەتىنىن ايتىپ ۋادە ەتتى.
ءامىرحان اسانوۆ ۇلتتىق ونەر اكتسياسى چەللەندج تۇرىندە وتەتىنىن اتاپ ءوتتى. ول وزىنەن كەيىنگى كەزەكتى اۋدان كولەمىنە بەلگىلى كاسىپكەر, قاشاندا يگى ءىستىڭ باسىنان تابىلاتىن ەلجاندى ازامات نۇرلىبەك بوگەتباي ۇلىنا, اۋدان پروكۋرورى تۇرار احمەدي ۇلىنا, وبلىستىق ءماسليحات دەپۋتاتى ەسىم داۋلەتوۆكە ۇسىندى. كەزەگى كەلگەن نۇرلىبەك بوگەتباي ۇلى دا قاراپ قالعان جوق.
– قۇرمەتتى اعايىن! وسىناۋ يگى باستامانى جاپپاي قولداۋعا شاقىرامىن! دومبىرا – قازاقتىڭ جانى, رۋحى, تاريحى, سالت-ءداستۇرى, بۇكىل ءبىتىم-بولمىسى.
دومبىرا – جاي عانا مۋزىكا اسپابى ەمەس, بۇل – قازاق ءۇشىن تۇتاس ءبىر الەم, شەكسىز عالام. حالىقتا «قازاقتىڭ جانى – دومبىرانىڭ ۇنىندە» دەگەن ءسوز بار. ۇلتتىق كودىمىزدىڭ اينىماس بولىگى, قازاقتىڭ برەندىنە اينالعان اسپابىمىزدى ۇلىقتاۋ – جۇرەگى قازاق دەپ سوققان ءاربىر ازاماتتىڭ بورىشى. سوندىقتان ءار ءۇيدىڭ تورىندە دومبىرا ءىلۋلى تۇرسىن, دەگەن كاسىپكەر شاراعا بەلسەندى ات سالىسقان اۋدان ازاماتتارىنا باعالى سىيلىعى مەن تارتۋ-تارالعىسى دا دايىن ەكەنىن جەتكىزدى.
امانكەلدىلىكتەر يگى باستامانىڭ اۋدان كولەمىندە عانا ەمەس, وبلىس, ءتىپتى ەل كولەمىندە قولداۋ تاباتىنىنا سەنەدى. اكتسيانىڭ تالابى قيىن ەمەس. ءبىرىنشى شارتى دومبىرانى قۇشاقتاپ فوتوسۋرەتكە تۇسەسىز نەمەسە شاما-شارقىڭىز جەتكەنشە كۇي تارتىپ, ءان ايتاسىز. تورىڭىزدە ءىلۋلى تۇرعان دومبىرانىڭ تاريحىن بايانداپ بەرسەڭىز دە بولادى. ءتىپتى ونەردەن قۇرالاقانمىن دەسەڭىز, جاقىنىڭىزعا دومبىرا سىيلاڭىز. ەكىنشى شارتى – وسىنىڭ بارلىعىن تەلەفونىڭىزدىڭ بەينەكامەراسىنا نەمەسە فوتوكامەراسىنا ءتۇسىرىپ, #ارۇيدەدومبىراحەشتەگىن جانە @Sayasat Amangeldi اككاۋنتىن بەلگىلەپ, الەۋمەتتىك جەلىگە سالۋىڭىز قاجەت. ەڭ ۇزدىكتەرگە 3 شىلدە – ۇلتتىق دومبىرا كۇنى قارساڭىندا ارنايى سىيلىقتار بەرىلەدى.
ەگەر امانكەلدىدەگى ق.ابەنوۆ اتىنداعى اۋداندىق مادەنيەت ۇيىنە ءار اپتانىڭ سەيسەنبى, بەيسەنبى كۇندەرى ساعات 17:30-دان كەيىن باس سۇعا قالساڭىز, دومبىرا تارتىپ, كۇي ۇيرەنىپ جاتقان اۋداننىڭ ۇلكەن-كىشىسىن كورەسىز. اياعىڭىزدىڭ ۇشىمەن عانا اقىرىن بارىپ, ءبىر ورىندىققا جايعاسىڭىز دا, كەدەرگى كەلتىرىپ الماي تىنىش قانا تاماشالاڭىز. مۇندا ۇلتتىق دومبىرا كۇنىنە ۇلكەن دايىندىق ءجۇرىپ جاتىر.
قوستاناي وبلىسى
