الەم • 27 اقپان، 2020

كوروناۆيرۋس: الەمدەگى احۋالعا شولۋ

185 رەتكورسەتىلدى

كوروناۆيرۋس ىندەتى قىتايدان باسقا اۋماقتارعا دا تارالىپ جاتىر. 27 اقپانداعى جاعداي بويىنشا ۆيرۋس 48 ەلگە جەتسە، اۋرۋدىڭ 82 مىڭعا جۋىق جاعدايى راستالدى. دۇنيەجۇزىلىك دەنساۋلىق ساقتاۋ ۇيىمى ءبىر كۇن بۇرىن مالىمدەگەندەي، ۆيرۋس قىتايعا قاراعاندا باسقا ەلدەردە تەز تارالادى.

وتكەن تاۋلىكتە يتالياداعى جاعدايلاردىڭ سانى ۇشتەن بىرگە ءوسىپ، قازىرگى ۋاقىتتا جۇقتىرعاندار سانى 453 ادامدى قۇرايدى. ساقتىق شاراسى رەتىندە ساۋد ارابياسى قاجىلاردىڭ مەككەگە كىرۋىنە ۋاقىتشا تىيىم سالدى.

جالپى الەمدە ۆيرۋس جۇقتىرعان 2 804 ادام قايتىس بولدى.

يتالياداعى جاعدايدىڭ ۋشىعۋىنا اۋرۋحانالار كىنالى مە؟

دەرتكە شالدىققانداردىڭ باسىم كوپشىلىگى – يتاليانىڭ سولتۇستىگىندەگى ونەركاسىپتىك ايماقتاردا، ونىڭ ىشىندە استاناسى ميلان جانە لومبارديادا تىركەلگەن. اۋرۋدىڭ كوپ تىركەلۋى بويىنشا ەكىنشى ورىندا - ۆەنەتسيا جانە وسى قالانى قورشاعان اۋدان تۇر. سوڭعى تاۋلىك ىشىندە يتالياداعى اۋىرعانداردىڭ سانى كۇرت ءوسىپ، سەيسەنبى كۇنى كەشكە 323 ۆيرۋستىڭ تاسىمالداۋشىسى انىقتالسا، 12 ادام قايتىس بولىپ، ۇشەۋى ەمدەلدى.
ەل ۇكىمەتى اۋرۋدىڭ تارالۋىن بولدىرماۋ ءۇشىن قولدان كەلگەننىڭ ءبارىن جاساپ جاتقانىن ايتادى.

ەلدەگى مەكتەپتەر، ۋنيۆەرسيتەتتەر مەن كينوتەاترلار جابىلىپ، بىرنەشە قوعامدىق شارا توقتاتىلدى. جالپى سانى 55 مىڭ ادامنان تۇراتىن بىرنەشە قالا كارانتينگە جابىلدى. كوپشىلىك كوروناۆيرۋستىڭ ءورشۋى يتاليا ەكونوميكاسىنىڭ قۇلدىراۋىنا الىپ كەلۋى مۇمكىن دەپ ۇرەيلەنەدى.

يتاليا پروكۋراتۋراسى لومباردياداعى اۋرۋحانالاردى تەكسەرۋدى باستادى. بۇعان دەيىن باق بەتتەرىندە اۋرۋحانالاردىڭ بىرىندە «سۋپەر-ديستريبيۋتور» بولىپ شىققان ناۋقاستى تەكسەرۋگە سۇيرەگەنى تۋرالى حابارلامالار پايدا بولدى. بۇلاي دەپ ۆيرۋستى باسقالارعا قاراعاندا كوپ ادامعا جۇقتىراتىن پاتسيەنتتەردى اتايدى. بۇل جاعدايدان كەيىن پرەمەر-مينيستر دجۋزەپپە كونتە قىزمەتكەرلەرىنىڭ جاۋاپسىزدىعى ءۇشىن اۋرۋحانا جۇمىسىن سىنعا الدى.

BBC.com حابارلاعانداي، كودونو قالاسىنداعى 150-دەن اسا ناۋقاستىڭ ۆيرۋس جۇقتىرۋىنا 38 جاستاعى ماتتيا ەسىمدى ەر ازاماتتى ايىپتايدى.  ەر ادام قالا اۋرۋحاناسىنا جاتقىزىلعانعا دەيىن ءوزىنىڭ جۇكتى ايەلى مەن دوسىنا جانە بارعا كەلگەن ءۇش قارت ادامعا جۇقتىرعان، سونىمەن قاتار، جارتىلاي مارافوندا جۇگىرىپ، فۋتبول ويناعان دەگەن دەرەك بار. رەسمي مالىمەتتەر بويىنشا، ماتتيا ەسىمدى ازاماتقا ۆيرۋس قىتايدان كەلگەن كەمە يەسىنەن جۇققان. بيلىك باسقا مالىمەتتەردى ازىرگە جاريالاعان جوق.

باسقا ەلدەردەگى احۋال قانداي؟

  • امەريكا قۇراما شتاتتارى مەن وڭتۇستىك كورەيا بىرلەسكەن اسكەري جاتتىعۋلاردى بەلگىسىز مەرزىمگە كەيىنگە قالدىردى. وڭتۇستىك كورەيادا 334 جاڭا جاعداي تىركەلگەن.
  • ساۋد ارابياسى ساقتىق شاراسى رەتىندە شەتەلدىك قاجىلاردىڭ مۇسىلماندىق قاسيەتتى مەككە جانە مەدينا قالالارىنا كىرۋىن ۋاقىتشا توقتاتادى. ساۋد ارابياسىنىڭ سىرتقى ىستەر مينيسترلىگى سونىمەن بىرگە ۆيرۋس قاۋپى بار ەلدەردەن كەلگەن تۋريستەردىڭ ەلگە كىرۋىنە ۋاقىتشا تىيىم سالاتىنىن مالىمدەدى.
  • يراكتا كوپشىلىك ءىس-شارالارعا تىيىم سالىنىپ، مەكتەپتەر، ۋنيۆەرسيتەتتەر مەن دەمالىس ورىندارى جابىلدى. وسىنداي ءىس-شارالار كۋۆەيت پەن باحرەيندە اۋرۋ جاعدايلارى انىقتالعاننان كەيىن ەنگىزىلگەن.
  • قىتايدا سارسەنبى كۇنى كوروناۆيرۋستان 29 ادام قايتىس بولدى - بۇل قاڭتار ايىنىڭ اياعىنداعى ەڭ از قۇربان بولعاندار. ءبىر كۇن بۇرىن 52 ادام قايتىس بولدى.
  • انگليادا ينفەكتسيانىڭ تاعى ەكى جاعدايى تىركەلدى - ۇلىبريتانيادا بارلىعى 15 ناۋقاس بار.
  • جاپونيا پرەمەر-ءمينيسترى سيندزو ابە بەيسەنبى كۇنى ەل ۇكىمەتىنىڭ بارلىق ورتا جانە باستاۋىش مەكتەپتەردى كوكتەمگى دەمالىس اياقتالعانعا دەيىن، ياعني ناۋرىز ايىنىڭ سوڭىنا دەيىن جابۋ تۋرالى ۇسىنىس جاسايتىنىن حابارلادى.

 

كوروناۆيرۋستىڭ تارالۋ حرونولوگياسى:

31 جەلتوقسان: قىتاي دۇنيەجۇزىلىك دەنساۋلىق ساقتاۋ ۇيىمىنا ۋحانداعى ەرەكشە پنەۆمونيانىڭ بىرنەشە جاعدايى تۋرالى ەسكەرتەدى.

7 قاڭتار: قىتاي بيلىگى كوروناۆيرۋستىڭ جاڭا ءتۇرىن انىقتادى.

13 قاڭتار: دۇنيەجۇزىلىك دەنساۋلىق ساقتاۋ ۇيىمى قىتايدان تىس جەرلەردەگى العاش تىركەلگەن تايلاندتاعى جاعداي تۋرالى حابارلادى.

30 قاڭتار: دۇنيەجۇزىلىك دەنساۋلىق ساقتاۋ ۇيىمى جاھاندىق توتەنشە جاعداي باستالدى دەپ حابارلايدى. قىتايدا ءولىم سانى 170-كە جەتتى.

2 اقپان: فيلليپپيندە ۋحان ازاماتىنىڭ ۆيرۋستان كوز جۇمعانىن حابارلايدى.

7 اقپان: كوروناۆيرۋس تۋرالى ەسكەرتپەك بولعان دارىگەر قايتىس بولادى.

15 اقپان: قىتايلىق تۋريست فرانتسيا اۋماعىندا اۋرۋدان كوز جۇمادى، بۇل ەۋروپا اۋماعىندا تىركەلگەن ءبىرىنشى ءولىم دەرەگى.

11 اقپان: ددسۇ جاھانعا جايىلعان ۆيرۋسقا Covid-19 اتاۋىن بەرەدى.

19 اقپان: تاياۋ شىعىس اۋماعىندا ۆيرۋسقا شالدىققان ءبىرىنشى ادام ءولىمى تىركەلدى.

26 اقپان: الەم بويىنشا قايتىس بولعاندار سانى 2800-گە جەتتى. جالپى دەرتكە شالدىققاندار سانى – 80 مىڭداي. سونىمەن قاتار، برازيليا لاتىن امەريكاسىنداعى العاشقى جاعدايدى راستايدى.

سوڭعى جاڭالىقتار

ۇقساس جاڭالىقتار