اتالمىش فورۋم اياسىندا تۇركىستان وبلىسى مەن وزبەكستان رەسپۋبليكاسىنىڭ وڭىرلەرى اراسىندا ءوزارا ىنتىماقتاستىق تۋرالى 7 كەلىسىم مەن جالپى سوماسى 50 ملن اقش دوللارى بولاتىن 3 ەكسپورتتىق كەلىسىمشارتقا قول قويىلدى. ەكى ەلدىڭ وڭىرلەرىنە ينۆەستيتسيا تارتۋ اياسىندا تۇركىستان وبلىسىنىڭ اكىمى مەن تاشكەنت جانە سىرداريا وبلىستارىنىڭ حوكيمدەرى ىنتىماقتاستىق تۋرالى, تۇركىستان مەن نۇرافشون قالالارىنىڭ اكىمدىكتەرى اراسىندا ەكسپورتتى ءوزارا دامىتۋ تۋرالى كەلىسىمدەرگە قول قويىلدى. اكىمدىكتەر ينۆەستيتسيالىق جوبالاردى بىرلەسىپ جۇزەگە اسىرۋ جانە ەكى قالاداعى تۋريستىك اينالىمدى ءوزارا ۇلعايتۋ تۋرالى ۋاعدالاستى. كەلىسىمدەر ءتۋريزمدى دامىتۋ ماقساتىندا دا جاسالدى. مىسالى, تۇركىستان, تاشكەنت, سامارقاند جانە بۇحار وڭىرلەرى اراسىندا وسى وبلىستاردىڭ تۋريزم نىساندارىن ءبىر باعىتقا قوساتىن تۋريستىك كلاستەردى قۇرۋداعى ىنتىماقتاستىق پەن ءوزارا ءىس-قيمىل تۋرالى ءتورت جاقتى كەلىسىمگە قول قويىلدى. سونداي-اق فورۋم بارىسىندا ەكى ەلدىڭ جەتەكشى كاسىپورىندارىنىڭ كورمەسى ءوتىپ, وندا تۇركىستان وبلىسىنىڭ كاسىپكەرلەرى قاتىسۋشىلاردى ءوڭىردىڭ تۋريستىك باعىتتارىمەن, وندىرىلەتىن ونىمدەرمەن جان-جاقتى تانىستىردى.
