ايماقتار • 27 اقپان، 2020

سەنىڭ جىرىڭ ماڭگىلىك قۇدىرەتتى...

61 رەتكورسەتىلدى

قىزىلجار قالاسىنداعى ع.مۇسىرەپوۆ اتىنداعى وبلىستىق بالالار جانە جاسوسپىرىمدەر كىتاپحاناسى ابايدىڭ 175 جىلدىعىنا ارنالعان ايماقتىق اقىندار ءمۇشايراسىن وتكىزدى.

كىتاپحانا ديرەكتورى، ۇلتجاندى قارىنداسىمىز كوگەرشىن بەردىعۇلوۆا جەكە باستاماسىمەن وبلىستىق ەرىك اسقاروۆ اتىنداعى اقىندار مەكتەبىنىڭ باسشىسى جارقىن جۇپارحاننىڭ كومەگىمەن اقشا بەر دەپ ەشكىمگە الاقان جايماي، وزدىگىنەن دەمەۋشى تاۋىپ، وسى شارانى ۇيىمداستىرعان ەكەن. وسىنداي باستاما كوتەرسە باسقا كىتاپحانالار قانەكي...

مۇشايراعا كوكشەتاۋ، نۇر-سۇلتان، قاراعاندى، قوستاناي، پاۆلودار جانە قىزىلجاردان ون ەكى اقىن قاتىستى. جالپى، قاتىسۋشىلار سانى كوپ ەكەن، بىراق ءبىرىنشى كەزەڭدە ولار ىرىكتەلىپ، ەكىنشى كەزەڭگە جەتكەنىنىڭ سانى وسى بولعان. ءمۇشايرانى وبلىستىق مادەنيەت باسقارماسىنىڭ باستىعى قۇرالبەك اتامۇراتوۆ اشتى. قۇتتىقتاۋ سوزدەر ايتقانداردىڭ قاتارىندا وبلىستىق مەشىتتىڭ باس يمامى كەنجەتاي دۇيسەنباي بولدى. سوڭعىسى وسى مۇشايراعا دەمەۋشىلىك تە كورسەتكەندەردىڭ ءبىرى ەكەن. ول ابايدىڭ اقىندىق ءىلىمىن كەڭەستىك يدەولوگياعا سايكەس كەلەتىن تۇسىنىك دەڭگەيىندە ەمەس، ەندى كەڭ قۇلاشتى كوزقاراسپەن، جان-جاقتى قاراۋ كەرەكتىگىن ايتقان بەلگىلى ابايتانۋشى مەكەمتاس مىرزاحمەتتىڭ ءسوزىن اۋىزعا الدى. ەگەر اباي ىلىمدەرىنە كەڭدىكپەن قارايتىن بولساق ونىڭ ءدىندى ءتۇسىنۋ دەڭگەيىنىڭ جانە ونىڭ حالىق ومىرىنە، مادەنيەتىنە پايدالى تۇسىن تەرەڭ تانيتىن بولار ەدىك دەدى ول. شىنىندا، مۇحتار اۋەزوۆتىڭ اباي جولىندا ساياساتقا سايكەستەندىرىپ جازعان: «قاعبام وزگەرىپ، شىعىسىم باتىسقا اينالىپ بارا جاتىر» دەگەنىنە بۇگىنگى تاڭدا سىني كوزقاراسپەن قاراپ، اقىننىڭ ءۇنى شىعىس ويشىلدارىمەن ۇندەسىپ جاتقانىنا تەرەڭىرەك كوڭىل اۋدارۋدىڭ قاجەت ەكەندىگى ءسوزسىز. 

«سىلكىندىرىپ الەمدى ءدۇبىر ءوتتى، ءدۇبىر ءوتتى – عالامات عۇمىر ءوتتى. مىڭ قۇبىلىپ تۇرسا دا مىناۋ زامان، سەنىڭ جىرىڭ ماڭگىلىك قۇدىرەتتى». «بۇلدىر عاسىردىڭ بەلەسىن كورگەن قىراعىم، كوكىرەگىمنىڭ جاعىپ ەڭ قالاي شىراعىن. پايعامبار تەكتەس پاراساتىڭمەن جازعان ەڭ قالام ۇشىمەن قازاقتىڭ تۇنىق بۇلاعىن...»  نەمەسە «جارىق نۇردان جارىق ساۋلە تامىپ تۇر...» دەگەن سياقتى حالىقتىڭ سۋسىنىن قاندىرعان ادەمى جىر جولدارى اعىلدى بۇل كەشتە...

ءمۇشايرادا باس جۇلدەنى پاۆلودارلىق جارقىنبەك امانتاي ۇلى، ءبىرىنشى ورىندى قىزىلجارلىق ابىلايحان ءاشىمحان، ەكىنشى ورىندى قاراعاندىلىق سالاتانات ەرلانقىزى جانە ءۇشىنشى ورىندى كوكشەتاۋلىق قۋانىش وسپانوۆ الدى. باسقا قاتىسۋشىلاردىڭ بارىنە دە قىزىلجارلىق اقىن-جازۋشىلاردىڭ اتىنداعى سىيلىقتار بەرىلدى.

مۇشايراعا اتاقتى اقىن داۋلەتكەرەي كاپ ۇلى، بەلگىلى جازۋشى – جۋرناليست جاراسباي سۇلەيمەنوۆتەر باستاعان توپ ادىلقازىلىق ەتتى. ۇزىلىستەردە جەرگىلىكتى ونەرپازدار اباي اندەرىن شىرقادى.

 

قىزىلجار

سوڭعى جاڭالىقتار

عاسىر زۇلماتى

قوعام • كەشە

ۇقساس جاڭالىقتار