تانىم • 27 اقپان، 2020

ۇمىت قالعاندار كىمنەن قورقادى؟

360 رەتكورسەتىلدى

جاڭا جىلدان باستاپ مۇعالىمدەردىڭ جالاقىسى 30 پايىزعا ءوستى. مادەنيەت پەن سپورت سالاسىنداعى بيۋدجەتتىك مەكەمە قىزمەتكەرلەرى دە بۇل جاقسىلىقتان شەت قالعان جوق. وسى سالانىڭ ايماقتارداعى قىزمەتكەرلەرىنىڭ جالاقىسى 35 پايىزعا، ال رەسپۋبليكالىق دەڭگەيدەگى مەكەمەلەردىڭ جالاقىسى 50 پايىزعا دەيىن كوتەرىلدى. ارينە، ءبىلىم مەن مادەنيەتتىڭ مەرەيى ۇستەم بولىپ، وسى سالانىڭ وتىمەن كىرىپ، ك ۇلىمەن شىعىپ جۇرگەن جانداردىڭ ريزىق-نەسىبەسى ارتقانى بارشانى قۋانتقانى انىق.

دەگەنمەن دە وسى تۇستا ءبىر ماماندىق يەلەرى ۇمىت قالدى. ول – مەكتەپ كىتاپ­حاناشىلارى. ولاردىڭ جۇمىس ىستەيتىن جەرى – مەكتەپ، ياعني، ءبىلىم بەرۋ سالاسىنىڭ قىزمەتكەرى سانالادى، ال ماماندىعى جاعىنان مادەنيەت سالاسىنا جاقىنداۋ. بىراق مەكتەپ كىتاپحاناشىلارىنىڭ جالاقىسى وزگەرىسسىز قالدى. ءسويتىپ ايلىقتارى ءوسىپ، اقپان ايىنان باستاپ ەكى سالا جۇمىسشىلارىنىڭ داۋىستارى جارقىن-جارقىن شىعىپ جاتقاندا مەكتەپ كىتاپحاناشىلارى ەكى جاقتىڭ دا جاقسىلىعىنان قۇر قالىپ، كىمگە شاعىنارىن بىلمەي، اڭقايىپ قالعان جايلارى بار. شىنىندا نە ىستەۋ كەرەك؟ جالاقىسى وسكەن جاندارمەن ءبىر سالادا، ءبىر مەكەمەدە قىزمەت ەتىپ جۇرسە دە بارلىعىنا جاسالعان شاراپات نەگە ولاردى اينالىپ ءوتتى؟

جالپى، مەكتەپ كىتاپحاناشىسى دەگەن كىم؟ ولار مەكتەپكە قاراي ما، جوق، مادەنيەت سالاسىنىڭ كىتاپحانالار جۇيەسىنە قاراي ما؟ ايلىقتارىن مەكتەپتەن الىپ جۇرسە دە جاڭا جىلدان باستاپ نەگە جالاقىسى وسكەندەردىڭ قاتارىنان تابىلمادى؟ سوندىقتان ەڭ الدىمەن مەكتەپ كىتاپحاناشىسىنىڭ مار­تەبەسىن انىقتاپ الۋ كەرەك سياقتى. نەگىزى جوعارى وقۋ ورىندارىندا كىتاپحاناشى ماماندىعى ارنايى وقىتىلادى. بىراق مەكتەپ كىتاپحاناشىلارىنىڭ قازىرگى ستا­تۋسى تەحنيكالىق قىزمەتكەرلەرمەن بىر­دەي. ەڭ الدىمەن مەكتەپتەگى كىتاپحانا مەڭگەرۋشىسى، بالالارعا كىتاپ بەرۋشى، وقۋ­لىقتاردى تۇگەندەۋشى جانە سونىمەن بىرگە ديرەكتور بۇيىرسا، ەدەن جۋشى، اينەك ءسۇرتۋشى، باسقا دا بارىپ كەل، شاۋىپ كەل جۇمىستاردى اتقارىپ كەتە بەرەدى. مەكتەپ كىتاپحاناشىلارى ديرەكتوردىڭ ايتقانىنان شىعا المايتىنىن، تەك سونىڭ بۇيرىعىمەن عانا ءجۇرىپ-تۇراتىنىن وسى ماقالانى دايىنداۋ بارىسىندا انىق بايقادىق.

«مەكتەپ كىتاپحاناشىلارىنىڭ جالاقىسى نەگە وسپەدى؟» دەگەن ماسەلەنى زەرتتەۋ بارىسىندا ءدال وسى جايت بويىنشا اكىمگە حات جازعان ءبىراز كىتاپحاناشىلاردىڭ اتى-جوندەرىن، تەلەفون نومىرلەرىن تاپتىق. ارينە، ويىمىز وسى ماسەلەنى بيلىكتىڭ نازارىنا جەتكىزىپ، كىتاپحاناشىلارعا كومەكتەسۋ ەدى. بىراق اكىمگە «جالاقىمىزدى كوتەرىڭىز» دەپ حات جازعان كىتاپحاناشىلارعا حابارلاسقانىمىزدا ءبارى كۇمىلجىپ ەشتەڭە ايتا المادى. ايتپاق تۇگىلى «مەنىڭ تەلەفون ءنومىرىمدى سىزگە كىم بەردى؟»، «گازەتكە مەنىڭ اتى-ءجونىمدى جازباقشىسىز با؟» دەپ وزىمىزگە دۇرسە قويا بەردى. ءۇزىپ-ج ۇلىپ بىردەڭە ايتقاندارى كەيىننەن قايتادان تەلەفون شالىپ «الىپ جۇرگەن جالاقىمىز 80-90 مىڭ تەڭگە عانا، ونىڭ وزىنە دە زار بولىپ قالامىز با؟ ەشتەڭە جازباي-اق قويىڭدارشى. جازساڭدار دا مەنىڭ اتى-ءجونىمدى قوسپاڭدار. ءتىپتى، ماعان حابارلاستىم دەپ تە جازباڭدار. تىنىشتىق كەرەك» دەپ، جىلارمان بولدى. ارينە، اكىمگە حات جازعاندار ماسەلەسىن اقپارات قۇرالدارىنا ايتۋ، ايتپاۋى ءوز ەركىندەگى شارۋا عوي. بايسالدى تۇردە «كەشىرىڭىز، ايتا المايمىن» دەسە دە ەشكىم زورلاپ اۋزىنا ءسوز سالماس ەدى. ءتىپتى، جاعدايدى ءتۇسىندىرىپ بەرىپ، «اتى-ءجونىمدى كورسەتپەي-اق قويىڭدارشى» دەسە دە، وعان داۋىمىز بولماس ەدى. دەگەنمەن دە كىتاپحاناشىلاردىڭ داۋسىنداعى ۇرەي ءبىزدى قاتتى ويلاندىردى. كىتاپحاناشىلار كىمنەن قورقادى؟

وتكەن اپتادا ءبىلىم بەرۋ سالاسىنىڭ قىزمەتكەرلەرىمەن كەزدەسكەن جامبىل وبلىسىنىڭ اكىمى بەردىبەك ساپارباەۆ مەكتەپ ديرەكتورلارى ءوزىن مەنەدجەر ەمەس، سول مەكەمەنىڭ قوجايىنى سياقتى سەزىنەتىنىن اشىق ايتتى. «وقۋ ورىندارىنىڭ كەيبىر باسشىلارى «مەنىڭ مەكتەبىم»، «مەنىڭ ۇستازدارىم»، «مەنىڭ شاكىرتتەرىم» دەگەن سياقتى تىركەستەردى قولدانىپ، وزدەرىن ۇيىمداستىرۋشى ەمەس، مەنشىك يەسى سەكىلدى سەزىنەدى. مەكتەپ – مەملەكەتتىكى، ال ديرەكتور – اۋىسىپ وتىراتىن باسقارۋشى بولۋى ءتيىس» دەدى ب. ساپارباەۆ.

شىنىندا ءبىزدىڭ كەيبىر مەكتەپتەردىڭ ديرەكتورلارى، اسىرەسە، اۋىلداعى ءبىلىم وشاق­تارىنىڭ باسشىلارى وزدەرىن «قۇدايداي» سەزىنەدى. كىتاپحاناشىلار مىنە، سول ديرەكتورلاردان قورىقسا كەرەك. ارينە، اكىمدەر «مەكتەپ كىتاپحاناشىلارىنىڭ دا جالاقىسىن وسىرەمىز» دەپ ۋادە بەرگەن كورىنەدى. بىراق سول كىتاپحاناشىلار ەندى جالاقى ءوسىرۋ ماسەلەسىن سوڭىنا دەيىن جەتكىزىپ، تابانداپ تۇرا الا ما، جوق، الدە ديرەكتور ءبىر اقىرعاننان-اق «وسىعان دا شۇكىرشىلىك» دەپ جەر سيپاپ كەتە بەرە مە؟..

سوڭعى جاڭالىقتار

iPhone 12 Pro رەندەرى شىقتى

تەحنولوگيا • كەشە

ۇقساس جاڭالىقتار