ماسەلەن, بىلتىر جۇرگىزىلگەن تەكسەرىس بارىسىندا جەرگە قاتىستى 325 زاڭ بۇزۋ فاكتىسى انىقتالىپ, جەردى زاڭسىز پايدالانۋشىلارعا 23 ميلليون تەڭگە كولەمىندە ايىپپۇل تولەۋ مىندەتتەدى. سونداي-اق اۋىل شارۋاشىلىعى ماقساتىنداعى
320 مىڭ گەكتار جەر مەملەكەت مەنشىگىنە قايتارىلىپ الىندى. ونىڭ 115 مىڭ گەكتارىن سوت ارقىلى ءماجبۇرلى تۇردە الۋعا تۋرا كەلگەن. اۋقىمدى تەكسەرۋ شارالارىنان كەيىن ايماقتاعى 80 مىڭ گەكتاردان استام جايىلىم ءتيىستى ماقساتقا پايدالانىلىپ, ناتيجەسىندە وڭىردە مال باسى ارتا باستادى. جەر باقىلاۋ ينسپەكتورلارىنىڭ مالىمەتىنشە, بۇگىندە بۇل جايىلىمداردا شارۋا قوجالىقتارى 207 جىلقى, 622 ءىرى قارا, 304 ۇساق مال باعىپ وتىر.
قازىر يگەرۋسىز بوس جاتقان جەرلەردى ۇستاپ وتىرۋ مەنشىك يەلەرى ءۇشىن دە ءتيىمسىز. ويتكەنى ولاردىڭ قاراماعىنداعى جەردى اۋىل شارۋاشىلىعى ماقساتىنا پايدالانباعانى ءۇشىن سالىقتى 10 ەسە ارتىق تولەۋگە ءماجبۇر. بىلتىردىڭ وزىندە مۇنداي جەرلەردەن وبلىس بيۋدجەتىنە سالىق تۇرىندە 212 ميلليون تەڭگەدەن استام قارجى تۇسكەن. وتكەن جىلى 220 مىڭ گەكتارعا جۋىق القاپتىڭ پايدالانۋسىز جاتقانى انىقتالعان ەدى. ودان وبلىس بيۋدجەتىنە ناۋرىز ايىنا دەيىن شامامەن 39 ميلليون تەڭگەدەي سالىق ءتۇسۋى ءتيىس. جەردى ءتيىمدى پايدالانۋعا مىندەتتەيتىن قاتاڭ شارالاردىڭ ناتيجەسىندە جانگەلدين, جىتىقارا, بەيىمبەت مايلين اۋداندارىنداعى بىرقاتار شارۋاشىلىق جالپى كولەمى 205 مىڭ گەكتار جەردەن ەرىكتى تۇردە باس تارتقان. مەملەكەت مەنشىگىنە وتكەن جەردىڭ باسىم بولىگىنىڭ قۇنارى تومەن ەكەنىن ايتپاي كەتۋگە بولمايدى. وبلىس باسشىلىعى الداعى ۋاقىتتا ءوڭىردىڭ سولتۇستىك اۋداندارىنداعى تۇگىن تارتساڭ, مايى شىعاتىن قۇيقالى جەرلەردى قاتاڭ باقىلاۋعا الۋدى كوزدەپ وتىر.
ايماقتا كوممەرتسيالىق قۇرىلىس نىسانىن سالۋعا ارنالعان جەر تەلىمدەرى دە مەجەلەنگەن ماقساتتا پايدالانىلىپ جاتقان جوق. جەردىڭ پايدالانىلۋى مەن قورعالۋىن باقىلاۋ باسقارماسىنىڭ باسشىسى نۇرلان ابدۋەۆتىڭ ايتۋىنشا, وتكەن جىلى جۇرگىزىلگەن تەكسەرۋدەن كەيىن 58 جەر تەلىمى سوت ارقىلى مەملەكەت مەنشىگىنە قايتارىلىپ, 137 جەر تەلىمى مەجەلى ماقساتقا پايدالانىلا باستاعان. بيىل كوممەرتسيالىق قۇرىلىس ءجۇرۋى ءتيىس 100 جەر تەلىمى تاعى دا مەملەكەتتىك مەنشىككە قايتارىلۋى مۇمكىن. ونىڭ 70-ءى شاعىن كاسىپكەرلەرگە بولىنگەن جەر تەلىمى.
وڭىردە بيىلدان باستاپ اۋىل شارۋاشىلىعىنا تيەسىلى جەرلەرگە عارىشتىق مونيتورينگ جۇرگىزەتىن قاناتقاقتى جوبا جۇزەگە اسا باستايدى. بۇل تاياۋدا پرەزيدەنت جاريالاعان شاعىن كاسىپكەرلىكتى تەكسەرۋدى شەكتەيتىن موراتوري ەرەجەلەرىن بۇزباي-اق, پايدالانۋسىز جاتقان جەرلەردى باقىلاپ انىقتاۋعا مۇمكىندىك بەرەدى.
الداعى ۋاقىتتا وبلىستا جەر پايدالانۋعا قۇقىق بەرۋ ءۇشىن وتكىزىلەتىن كونكۋرستارعا قاتىستى قابىلداناتىن شەشىمدەردىڭ دۇرىس-بۇرىستىعى دا قاتاڭ باقىلاۋعا الىنادى. ماسەلەن, 2020 جىلدىڭ العاشقى جارتىجىلدىعى ىشىندە سارىكول, فەدوروۆ, قوستاناي اۋداندارىنىڭ اكىمدىكتەرىنە تەكسەرۋ جۇرگىزۋ جوسپارلانىپ وتىر. بۇل ءىس-شارا لاۋازىمدى تۇلعالاردى اكىمشىلىك جاۋاپقا تارتۋ ماقساتىندا ەمەس, اۋداندارداعى جەر قاتىناستارى بولىمدەرىنە قۇقىقتىق-ادىستەمەلىك كومەك كورسەتۋ ءۇشىن جۇرگىزىلمەك.
قوستاناي
