وقۋ-جاتتىعۋ بيىلعى كوكتەمگى سۋ تاسقىنى كەزەڭىندە ىقتيمال توتەنشە جاعدايلاردى جويۋ شارالارىنا ازاماتتىق قورعانىس ورگاندارىنىڭ كۇشتەرى مەن قۇرالدارىن دايىندىعىن تەكسەرۋ, ءىس-ارەكەتتى پىسىقتاۋ ءۇشىن ۇيىمداستىرىلىپ وتىر.
وقۋ-جاتتىعۋدى قازاقستان رەسپۋبليكاسى ىشكى ىستەر ءمينيسترىنىڭ ورىنباسارى يۋ.يلين باسقارىپ, شارالارعا باتىس قازاقستان وبلىستىق, ورال قالالىق جانە اۋداندىق ازاماتتىق قورعاۋ قىزمەتتەرى قاتىسۋدا.
وقۋ-جاتتىعۋ باسشىسىنىڭ ورىنباسارى, باتىس قازاقستان وبلىستىق توتەنشە جاعدايلار دەپارتامەنتىنىڭ باستىعى گەنەرال-مايور جاسۇلان جۇماشەۆ ورتالىق اتقارۋشى ورگان وكىلدەرى كۇش-قۇرالدارىنىڭ وقۋ-جاتتىعۋعا دايىندىق جاي-كۇيى, ولار وتكىزگەن ءىس-شارالار تۋرالى باياندامالارىن تىڭدادى. كەڭەس بارىسىندا تىرشىلىكتى قامتاماسىز ەتۋ نىساندارىنىڭ اپاتسىز جۇمىس ىستەۋىن قامتاماسىز ەتۋ, توتەنشە جاعدايلاردىڭ الدىن الۋ, جويۋ بويىنشا جەدەل شارالار قابىلداۋ, ورىن العان جاعدايدا شىعىن كولەمىن, ادام شىعىنىن ازايتۋ, توتەنشە جاعدايلاردا نىسانداردىڭ قاۋىپسىز جانە تۇراقتى جۇمىس ىستەۋىن قامتاماسىز ەتۋ سەكىلدى تاپسىرما بەردى.
«كوكتەم-2020» كوماندالىق-شتابتىق وقۋ-جاتتىعۋى ورال قالاسىنداعى تۇڭعىش پرەزيدەنت الاڭىندا جەدەل دەن قويۋ جاساعىنىڭ دايىندىعىن قاراۋدان باستالدى. شارالار جوسپارىندا «جايىقجىلۋقۋات» نىساندارىنداعى ىقتيمال اپاتتاردى جويۋ, قالپىنا كەلتىرۋ ءىس-قيمىلدارىن پراكتيكالىق پىسىقتاۋ, تەرەكتى اۋدانىندا اپاتتىق-قۇتقارۋ قىزمەتتەرى مەن قۇرامالارىنىڭ ۇيلەسكەن ءىس-ارەكەتتەرى مەن جولاۋشىلاردى ەۆاكۋاتسيالاۋ, ساياجاي اۋماقتارىندا تۇراتىن حالىقتى قاۋىپسىز جەرگە كوشىرۋ, بايتەرەك اۋدانى بويىنشا شاعان وزەنىندەگى سۋ تاسقىنىنان زارداپ شەككەن تۇرعىنداردى ىزدەستىرۋ, قۇتقارۋ شارالارى سەكىلدى ويىن-جاتتىعۋلارى بار.
«كوكتەم-2020» شاراسى اياسىندا سوڭعى كۇندەرى باتىس قازاقستان وبلىسىنىڭ بارلىق اۋداندارىندا كوكتەمگى سۋ تاسقىنىنا قارسى شارالار تىزبەگىن پىسىقتاعان جيىندار, شارالار وتكەن ەدى. ماسەلەن بايتەرەك اۋدانى اكىمىنىڭ مىندەتىن اتقارۋشى م.زالمۇقانوۆا اۋداندى كوكتەمگى سۋ تاسقىنى كەزەڭىندە بولۋى مۇمكىن توتەنشە جاعدايلاردان قۇتقاراتىن شتابتى باسقارىپ, دەركۇل وزەنىنىڭ سۋ دەڭگەيى قاۋىپتى كوتەرىلگەن جاعدايدا تۇرعىن ۇيلەردى سۋ باسۋدان ساقتاۋ, قۇم سالىنعان قاپشىقتار دايىنداۋ, سۋ سوراتىن قۇرالداردى ازىرلەۋ سەكىلدى شارالاردى پىسىقتاپ شىقتى.
ال رەسپۋبليكالىق جاتتىعۋدىڭ ۇيىمداستىرىلۋى مەن ءوتۋىن باقىلاۋ ءۇشىن وبلىسقا كەلگەن قازاقستان رەسپۋبليكاسى ىشكى ىستەر مينيسترلىگى توتەنشە جاعدايلار كوميتەتى وكىلى پودپولكوۆنيك بەكبولات ابدىقادىروۆ قازتالوۆ اۋدانىنىڭ سۋ تاسقىنىنا ازىرلىگىن تەكسەرىپ, اۋدان اۋماعىمەن وتەتىن قاراوزەن مەن سارىوزەندەگى سۋ دەڭگەيىن كوردى. ءىسساپار بارىسىندا كوكتەرەك اۋىلى ماڭىنان وتەتىن سارىوزەن بويىندا 1967 جىلى سالىنعان ماماي, جاڭاجول اۋىلىنداعى قاراوزەن بويىندا 1981 جىلى سالىنعان اقكول سۋ ساقتاۋ قۇرىلعىلارىمەن تانىستى. ب.ابدىقادىروۆ اۋدان اۋماعىندا سۋ تاسقىنى قاۋپى جوق ەكەنىنە كوزى جەتكەنىن مالىمدەپ, دەگەنمەن دە كەنەت سۋ تاسقىنى بولا قالعان جاعدايدا الدىن-الۋ بويىنشا بىرقاتار تاپسىرما بەردى.
ءدال وسىنداي شارالار تاسقالا اۋدانىندا دا ءوتتى. دەركول وزەنىندە سۋ دەڭگەيى كوتەرىلىپ, تۇرعىن ۇيلەردى سۋ باسپاۋى, مۇز كەپتەلىسى بولماۋى ءۇشىن وزەن بەتىندە مۇز ويىلىپ, بۇرعىلاندى.
ەرتەڭ ازاماتتىق قورعاۋ مەملەكەتتىك جۇيەسىنە قاراستى وبلىستىق قۇرىلىمداردىڭ جانە تىرشىلىكتى قامتاماسىز ەتۋ ۇيىمدارىنىڭ قىزمەتى پىسىقتالاتىن «كوكتەم-2020» وقۋ-جاتتىعۋ شارالارىنىڭ پراكتيكالىق ءبولىمى وتەدى.
باتىس قازاقستان
