ەلورداداعى «قازاقستان مەديا ورتالىعىندا» قازاقستان رەسپۋبليكاسى پرەزيدەنتى جانىنداعى ورتالىق كوممۋنيكاتسيالار قىزمەتىنىڭ ۇيىمداستىرۋىمەن ۇلتتىق تاريحتى زەردەلەۋ تاقىرىبىنا ارنالعان ءباسپاسوز بريفينگى بولىپ ءوتتى.
ەلورداداعى «قازاقستان مەديا ورتالىعىندا» قازاقستان رەسپۋبليكاسى پرەزيدەنتى جانىنداعى ورتالىق كوممۋنيكاتسيالار قىزمەتىنىڭ ۇيىمداستىرۋىمەن ۇلتتىق تاريحتى زەردەلەۋ تاقىرىبىنا ارنالعان ءباسپاسوز بريفينگى بولىپ ءوتتى.
ۇلتتىق تاريح عىلىمىن رەفورمالاۋ جولدارىن ءتۇسىندىرۋ, تاريحشى عالىمداردىڭ قىزمەتىن ۇيلەستىرۋ, تولىققاندى تاريحي كوزقاراستى قالىپتاستىرۋ ماقساتىندا اتقارىلىپ جاتقان ىستەردەن حاباردار ەتۋدى كوزدەگەن باسقوسۋعا بەلگىلى تاريحشىلار مەن قوعام قايراتكەرلەرى قاتىسىپ, ءوز وي-پىكىرلەرىن ءبىلدىردى.
شارا نەگىزىنەن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى عالىمدارىنىڭ قاتىسۋىمەن وتكەندىكتەن, وسى ۇجىمنىڭ تىندىرعان جانە الدا اتقارار جۇمىستارى اڭگىمە وزەگىنە اينالدى.
مۇندا «قازاقستان تاريحشىلارىنىڭ ۇلتتىق كونگرەسى» جۇمىس ىستەۋدە. «وتان تاريحى» سەرياسىمەن 20 تومدىق ەڭبەك شىعارىلماق. وتكەن جىلى لەۆ نيكولاەۆيچ گۋميلەۆتىڭ 100 جىلدىق مەرەيتويىنا ارنالعان حالىقارالىق عىلىمي فورۋم ۇيىمداستىرىلعان بولاتىن. ۋنيۆەرسيتەت ۇجىمى «گۋميلەۆ الەمى» جانە «ەۋرازيا ماسەلەلەرى» سەرياسىمەن جيىرمادان استام كىتاپ, قازاقشا وقۋ قۇرالدارىن باسىپ شىعاردى. سونىمەن قاتار, وقىرمانعا تۇڭعىش رەت داڭقتى عالىمنىڭ ءومىر جولى مەن عىلىمي شىعارماشىلىعىنا ارنالعان «لەۆ گۋميلەۆ» ەنتسيكلوپەدياسى ۇسىنىلدى. سونداي-اق, ەلىمىزدە تۇڭعىش رەت ۋنيۆەرسيتەت قابىرعاسىندا قازاقستان حالقى اسسامبلەياسى كافەدراسىنىڭ تۇساۋى كەسىلسە, يۋنەسكو كافەدراسىن اشۋ ماسەلەسى قاراستىرىلۋدا. قازاقستان تاريحشىلارىنىڭ ۇلتتىق كونگرەسى اياسىندا الىس جانە جاقىن شەتەلدەگى 25 ەلگە تارالاتىن حالىقارالىق عىلىمي-تانىمدىق جۋرنال جارىق كورمەك.
ۇلت تاريحىن تۇگەندەۋگە قاتىستى قويىلعان جۋرناليستەردىڭ سۇراقتارىنا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى, تاريح عىلىمدارىنىڭ دوكتورى ەرلان سىدىقوۆ, كورنەكتى پۋبليتسيست, قازاقستان ۇلتتىق جاراتىلىستانۋ عىلىمدارى اكادەمياسىنىڭ اكادەميگى عادىلبەك شالاحمەتوۆ, مەملەكەتىمىزدىڭ ەلتاڭباسى اۆتورلارىنىڭ ءبىرى, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى كافەدراسىنىڭ پروفەسسورى جانداربەك ءمالىبەكوۆ, «ەۋرازيا» گۋمانيتارلىق عىلىمي-زەرتتەۋلەر ورتالىعىنىڭ ديرەكتورى, تاريح عىلىمدارىنىڭ دوكتورى زيابەك قابىلدينوۆ پەن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى مايدان قۇسايىنوۆ جان-جاقتى جاۋاپ بەردى.
بەرىك سادىر,
«ەگەمەن قازاقستان».
