قورىقشىلارعا قوس كاتەر تارتۋ ەتىلدى

ايماقتار • 25 اقپان، 2020

قورىقشىلارعا قوس كاتەر تارتۋ ەتىلدى

52 رەت كورسەتىلدى

تابيعاتتى قاسكويلەردەن قورعاۋ – ماڭىزدى شارۋا. وڭاي ولجاعا كوز تىگىپ، قول سالاتىندار تابيعات بايلىقتارىنا عانا ەمەس، ونى قورعاۋشى قورىقشىلاردىڭ ومىرىنە قاۋىپ ءتوندىرىپ جۇرگەنى بەلگىلى. وسى ورايدا قورىقشىلاردى قاجەتتى قۇرالدارمەن جان-جاقتى قامتاماسىز ەتىپ، جۇمىس بارىسىندا ۇتقىرلىعىن ۇشتاي ءتۇسۋدىڭ ماڭىزى زور.

گۇلايىم ءداۋىتباي

مۇنايلى ولكەدەگى قىزىلساي مەملەكەتتىك وڭىرلىك تابيعي پاركى ماڭعىستاۋ وبلىسىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسىنا قارايدى. «قىزىلساي» مەكەمەسىنىڭ قىزمەتى – ءتيىستى ەرەكشە قورعالاتىن تابيعي اۋماقتارداعى جانۋارلار دۇنيەسى مەن وسىمدىك تۇرلەرىن قورعاپ، قورشاعان ورتانىڭ ب ۇلىنبەۋى مەن براكونەرلەرگە قارسى جۇمىستار جۇرگىزۋ. مەكەمەنىڭ قۇرامىندا ءبىر وڭىرلىك پارك جانە جەرگىلىكتى ماڭىزداعى التى قاۋمال بار. سولاردىڭ ءبىرى – كاسپي تەڭىزىمەن شەكتەسەتىن «ادامتاس» قاۋمالى. شەكتەۋ اۋماعى – 38 شاقىرىم. تەڭىزگە ەنگەن ارال 0.4 اۋماعى بويىندا ورنالاسقان. اۋماققا كەندىرلى ءمۇيىسىنىڭ سولتۇستىگىندەگى ۇساق ارالدار كىرەدى. اتالعان ارالدا جانە تەڭىز اۋماعىندا رەسپۋبليكالىق دارەجەدەگى كەندىرلى دەمالىس ورنى ورنالاسقان. بۇل اۋماقتار قىزىل كىتاپقا ەنگەن يتبالىقتىڭ شوعىرلانعان اۋماعى جانە بالىقتار مەن ەرەكشە كەزدەسەتىن سۋاستى وسىمدىكتەرى بار. قۇستار ءۇشىن كوكتەمگى جانە كۇزگى مەزگىلدەردە ۇشىپ كەلۋ جانە ۇشىپ كەتۋ مەكەنى. الايدا، قازىرگى تاڭدا قاسكويلەردىڭ تەڭىز ارقىلى ارنايى قايىقتارمەن كەلىپ، بالىقتاردى زاڭسىز اۋلاۋ فاكتىلەرى كورىنىس تاۋىپ وتىر. وكىنىشتىسى، بۇل تەك بۇگىننىڭ ەمەس، بەرتىنگە دەيىن جالعاسىن تاۋىپ كەلە جاتقان قىلمىس. ينسپەكتورلاردىڭ قارسى تۇرۋىنا ارنايى تەحنيكالاردىڭ بولماۋى قولبايلاۋ بولىپ كەلدى. ياعني، اتالعان ارالدا تابيعات بايلىقتارىن قورعاۋ سۋ كولىكتەرىن كوپتەن بەرى قاجەت ەتىپ كەلگەن بولاتىن. جاڭالىققا «تەڭىزشەۆرويل» جشس-مەن كەلىسسوزدەر جۇرگىزۋدىڭ ناتيجەسىندە قول جەتتى. اتالعان كومپانيا «قىزىلساي» مەملەكەتتىك وڭىرلىك تابيعي پاركى» كوممۋنالدىق مەملەكەتتىك مەكەمەسىنە تەڭىزدە تەز جۇرگىش ەكى كاتەردى سىيعا تارتتى. باسقارۋ تاقتاسى اليۋمينيدەن جاسالعان Kazboat ماركالى كەمەلەردىڭ ارقايسىسىنىڭ سىيىمدىلىعى 500 كيلوعا دەيىن جۇك كوتەرە الادى. ەندى تابيعات قورعاۋشىلارعا كۇننىڭ ىستىعى مەن سۋىعىنا قاراماي ءوز قىزمەتتەرىن الاڭسىز اتقارۋعا جاعداي جاسالدى. كومپانيانىڭ بۇل تابيعات قورعاۋشىلارعا العاشقى كومەگى ەمەس ەكەن. ماڭعىستاۋ وبلىسىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسى مەن «تەڭىزشەۆرويل» جشس اراسىنداعى جەمىسىن بەرگەن كەلىسسوزدەر العاش رەت 2019 جىلدىڭ 22 تامىزىندا باستاۋ العان. ول كەزدە «تەڭىزشەۆرويل» جشس «قىزىلساي» مەكەمەسىنە 7 ۆاگون-ءۇي، 22 فوتوتۇزاق پەن 2 درون سىيعا تارتىپتى.

بۇل جولى كاتەرلەردى تابىستاعان شارا اقتاۋ قالاسى «بريز» ياحتا كلۋبىنىڭ اۋماعىندا ءوتتى. وبلىس اكىمدىگىنىڭ، اۋماقتىق ورمان شارۋاشىلىعى جانە جانۋارلار دۇنيەسىن قورعاۋ ينسپەكتسياسى، ەكولوگيا دەپارتامەنتى، «قىزىلساي» مەكەمەسى، باتىس ايماعى كاسپي تەڭىزىندەگى مەملەكەتتىك شەكارا قىزمەتى 22/01 ا اسكەري ءبولىمى، تابيعات پايدالانۋشىلار، بالىق شارۋاشىلىعى قاۋىمداستىعىنىڭ وكىلدەرى قاتىسقان شارادا ماڭعىستاۋ وبلىسىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى دۇيسەن قۇسبەكوۆ قورىقشىلارعا قول ۇشىن بەرگەن جانە الەۋمەتتىك تۇرعىدا ءوڭىردىڭ تۇرمىس جاعدايى مەن تابىس كوزىنە اسا ءمان بەرىپ، ءبىرشاما قىزمەت اتقارىپ جۇرگەن «تەڭىزشەۆرويل» كومپانياسىنا العىسىن بىلدىرسە، «تەڭىزشەۆرويل» جشس ۇكىمەت جانە جۇرتشىلىقپەن بايلانىس ءبولىمىنىڭ باس مەنەدجەرى ريزابەك ارتىعاليەۆ ەكىجاقتى كەلىسىم مەن تابيعاتتى قورعاۋدىڭ ماڭىزىن ءسوز ەتتى.

– بىلتىر قۇنى 45 ملن تەڭگەنى قۇرايتىن قۇرال-جابدىقتاردى سىيعا تارتتىق. ءبىز ءوزىمىز سىيلاعان جابدىقتاردىڭ پايداسى تۋرالى ەستىپ، قۋانىپ قالامىز. وڭىردەگى ەكوجۇيەنى ساقتاۋعا اتسالىسۋ ءبىز ءۇشىن دە ماڭىزدى، – دەدى ر.ارتىعاليەۆ.

زاڭدى بەلىنەن باسىپ، تابيعاتقا ارام قولىن ارالاستىراتىن قاسكويلەرگە قورىقشىلار ەندى قوس كاتەرمەن قارسى شىقپاق. بۇل – وڭىردە ەكوجۇيەنى ساقتاۋدىڭ ساپاسىن ارتتىرا تۇسەتىن بولادى.

ماڭعىستاۋ وبلىسى