اكادەميك جابايحان ءابدىلديننىڭ ماقالاسى «ۆوپروسى فيلوسوفي» جۋرنالىندا جارىق كوردى
الەم-جالەم الەمدە قيلى-قيلى كەزەڭنىڭ قيىنشىلىقتارىنا بوي الدىرماي, وقىرمانىنىڭ كوزايىمىنا اينالىپ كەلە جاتقان بىرەگەي باسىلىمدار جوق ەمەس. بار. بىراق كوپ تە ەمەس.
اكادەميك جابايحان ءابدىلديننىڭ ماقالاسى «ۆوپروسى فيلوسوفي» جۋرنالىندا جارىق كوردى
الەم-جالەم الەمدە قيلى-قيلى كەزەڭنىڭ قيىنشىلىقتارىنا بوي الدىرماي, وقىرمانىنىڭ كوزايىمىنا اينالىپ كەلە جاتقان بىرەگەي باسىلىمدار جوق ەمەس. بار. بىراق كوپ تە ەمەس. 1947 جىلدان بەرى ماسكەۋدەن اي سايىن ءۇزىلىسسىز شىعىپ كەلە جاتقان «ۆوپروسى فيلوسوفي» جۋرنالى سول ساناۋلىلاردىڭ ساناتىندا. ە.اگاتسي (يتاليا), ان تسينيان (قىتاي), يۋ.حابەرماس (گەرمانيا), ر.حاررە (انگليا), ۆ.لەكتورسكي (رەسەي) سىندى اتاقتى فيلوسوف-عالىمدار شوعىرلانعان حالىقارالىق رەداكتسيالىق كەڭەسىنىڭ قۇرامىنان-اق وسى عىلىمي- تەوريالىق جۋرنالدىڭ بەدەلىنىڭ اسا جوعارى ەكەنىن اڭعارۋعا بولادى. بۇگىن ءبىز بۇل جۋرنالعا تەكتەن-تەك نازار اۋدارىپ وتىرعان جوقپىز. باسىلىمنىڭ ۇستىمىزدەگى جىلعى 5-سانى ءبىزدىڭ وتانداسىمىز قازاقستان ۇلتتىق عىلىم اكادەمياسىنىڭ اكادەميگى, الەمدىك دەڭگەيدەگى فيلوسوف جابايحان مۇباراك ۇلى ءابدىلديننىڭ «زاماناۋي عىلىمي-تەوريالىق تانىمنىڭ لوگيكاسى» دەپ اتالاتىن كولەمدى ماقالاسىمەن اشىلعانىن وقىرمانعا جەتكىزسەك دەيمىز.
عۇمىر بويعى ىزدەنىستەرىنىڭ قورىتىندىسى دەۋگە دە بولاتىن بۇل ەڭبەگىندە اۆتور ءوزىنىڭ كوپ جىلدىق زەرتتەۋلەرىنە سۇيەنە وتىرىپ, وسى زامانعى عىلىمي تانىمنىڭ ديالەكتيكاسى مەن لوگيكاسىنا قاتىستى وي-تۇجىرىمدارىن ورتاعا سالادى, زاماناۋي عىلىمنىڭ دامۋىنداعى ۇلكەن سەرپىلىستەردىڭ عىلىمي-تەوريالىق تانىم لوگيكاسىنىڭ وزگەرۋىنە تىكەلەي بايلانىستى ەكەنىن دالەلدەيدى. «جابايحان مۇباراك ۇلى – قازاقستان فيلوسوفياسىن دامىتۋدا ايرىقشا ءرول اتقارعان تۇلعا. ونىڭ ەڭبەكتەرى رەسەيلىكتەرگە دە جاقسى تانىس. ول – ديالەكتيكا سالاسىنداعى اسا ءىرى مامانداردىڭ ءبىرى, فيلوسوفيا تەورياسىنىڭ ماڭىزدى پروبلەمالارىن زەرتتەۋگە ارنالعان عاجايىپ ەڭبەكتەردىڭ اۆتورى. ونىڭ جەتەكشىلىگىمەن ديالەكتيكالىق لوگيكا جانە ديالەكتيكا تاريحى تۋرالى كوپتومدىق ىرگەلى ەڭبەكتەر جارىق كوردى. ديالەكتيكالىق لوگيكانىڭ قازاقستاندىق مەكتەبىنىڭ قالىپتاسۋى مەن ورلەۋى ونىڭ ەسىمىمەن تىعىز بايلانىستى» دەپ جازىلعان رەداكتسيا اتىنان بەرىلگەن ماقالانىڭ اڭداتپاسىندا.
جۋرنالدىڭ وسى سانىندا, سونداي-اق, ج.م.ءابدىلديننىڭ ءۇستىمىزدەگى جىلى جارىق كورگەن شىعارمالار جيناعىنىڭ ون تومدىعى تۋرالى ماقالا دا جاريالانعان. ماقالا اۆتورى گ. لوباستوۆ ج.ءابدىلديننىڭ ەسىمى قازاقستاننان تىسقارى جەرلەردە دە جاقسى ءمالىم ەكەنىن, ونىڭ تاڭدامالى ەڭبەكتەرىنىڭ تانىمنىڭ ديالەكتيكالىق ادىستەرىن نەگىزدەۋگە باعىتتالعانىن, بۇكىلالەمدىك فيلوسوفيالىق كونگرەستەرگە تۇراقتى قاتىسىپ كەلە جاتقان عالىمنىڭ الەمدىك فيلوسوفيانىڭ جانە الەۋمەتتىك-ساياسي شىندىقتىڭ جاعدايى مەن پروبلەمالارىن تالداۋعا ارنالعان باياندامالارى مەن ماقالالارىنىڭ اسا قۇندىلىعىن اتاپ كورسەتەدى.
ءبىزدىڭ ەلىمىزدىڭ باسەكەگە قابىلەتتى دامىعان مەملەكەتتەردىڭ قاتارىنا قوسىلۋدى مۇرات تۇتىپ, سول جولدا ايانباي تەر توگىپ جاتقانى امبە جۇرتقا ايان. بۇل – بوس ءسوز, جالاڭ ۇران ەمەس, ناقتى مۇمكىندىكتەرگە نەگىزدەلگەن تەرەڭ مازمۇندى ۇلى ماقسات. ونىڭ ورىندالاتىنىنا سەنەسىڭ. ءويتكەنى, ۇلتتىڭ باسەكەگە قابىلەتتى ەكەنىن ايشىقتاپ, قازاقتىڭ اتىن شىعارىپ جۇرگەن ۇل-قىزدارى از ەمەس. «ۆوپروسى فيلوسوفي» جۋرنالىنداعى الەم ويشىلدارىنىڭ اراسىنان ءوز ورنىن ويىپ العان اتاقتى عالىم ج.م.ءابدىلدين تۋرالى ماقالالاردى دا وقي وتىرىپ, قازاق ەلىنىڭ, قازاق عىلىمىنىڭ قارىشتاپ دامىپ كەلە جاتقانىنا تاعى ءبىر كوز جەتكىزەسىڭ.
جاراسباي سۇلەيمەنوۆ,
«ەگەمەن قازاقستان».
