قازاقتا اراقتى «اتاڭنان قالعان اس ەمەس», دەپ تە جاتادى. الايدا, كەڭەستىك كەزەڭنەن قالعان بۇل داعدى ءالى دە قوعام ومىرىنەن الاستاعىسى جوق. وتباسىنداعى بەرەكەسىزدىك, جولدارداعى اپاتتار سونىڭ جارقىن سالدارى دەسەك قاتەلەسپەيمىز.
قازاقتا اراقتى «اتاڭنان قالعان اس ەمەس», دەپ تە جاتادى. الايدا, كەڭەستىك كەزەڭنەن قالعان بۇل داعدى ءالى دە قوعام ومىرىنەن الاستاعىسى جوق. وتباسىنداعى بەرەكەسىزدىك, جولدارداعى اپاتتار سونىڭ جارقىن سالدارى دەسەك قاتەلەسپەيمىز.
دۇنيەجۇزىلىك دەنساۋلىق ساقتاۋ ۇيىمى ورتالىق ازيا ەلدەرى اراسىندا قازاقستاندى ىشىمدىكتى ەڭ كوپ تۇتىناتىن ەل رەتىندە كورسەتىپتى. بۇعان سەنۋ دە قيىن. ايتسە دە, حالىقارالىق ۇيىمنىڭ كەلتىرگەن مالىمەتتەرىن نازاردان تىس قالدىرۋعا تاعى بولماس. سونىمەن, اتالعان ۇيىمنىڭ مالىمەتىنە قاراعاندا, ەلىمىزدىڭ ءار تۇرعىنىنا شاققانداعى تۇتىنىلاتىن تازا ەتيل ءسپيرتى جىلىنا 11 ليتر ەكەن. نەگىزىنەن الكوگول ءونىمىن تۇتىنۋ ءار تۇرعىنعا شاققاندا جىلىنا 8 ليتردەن اسپاۋى ءتيىس. ەگەر تۇتىنۋ مولشەرى بۇدان اسىپ كەتسە, وندا ول ۇلتتىڭ ازعىندالۋى مەن قۇلدىراۋىنا الىپ كەلەتىن كورىنەدى. وكىنىشتىسى سول, قازىر ەلىمىزدىڭ اۋىلدىق جەرلەرىندە ىشىمدىك ءىشۋ ءالى دە ازايماي وتىر. توي-تومالاقتاردىڭ ىشىمدىكسىز ءوتۋى وتە سيرەك. وعان قارسى كۇرەس جۇرگىزىلىپ جاتقانىنا ەش كۇمان جوق. بۇل باعىتتا بىرقاتار شارالار دا قاراستىرىلۋدا. ءتىپتى, ماسكۇنەمدەر مەن قايىرشىلارعا قارسى كۇرەس جۇرگىزۋدى اكىمدىكتەرگە بەكىتىپ بەرۋ دە ۇسىنىلىپ وتىر.
قازىر رەسەيدىڭ ءوزى وسى ماسەلەگە قاتىستى كوپتەگەن شارالاردى قولعا الۋدا. زاڭنامالار قابىلداپ, تالاپتى كۇشەيتىپ جاتىر. ماسەلەن, رولگە ماس كۇيىندە وتىرعاندارعا 30 مىڭ رۋبل ايىپپۇل جانە 1,5-2 جىل جۇرگىزۋشى قۇقىنان ايىرۋ كوزدەلگەن. بۇل ەلدە ءاربىر تۇرعىنعا شاققانداعى سپيرتتىك ىشىمدىكتى تۇتىنۋ جىلىنا 10 ليتردەن اسپايدى ەكەن. ويلاناتىن-اق ماسەلە. ال قىتاي سپيرتتىك ونىمدەردى از تۇتىناتىن ەلدەر قاتارىندا تۇر. بۇعان تۇركيا مەن تاجىكستاندى دا قوسۋعا بولادى.
بۇدان شىعاتىن قورىتىندى – تالاپ پەن ءتارتىپتى بارىنشا كۇشەيتىپ, ىشىمدىك اتاۋلىنىڭ قوعامىمىزعا جات ەكەنىن كەڭىنەن ناسيحاتتاۋ. مۇمكىن, سوندا جامان ادەتتەن بىرتىندەپ ارىلاتىن شىعارمىز.
اسقار تۇراپباي ۇلى,
«ەگەمەن قازاقستان».
