قىزىلوردا وبلىسى جاڭاقورعان اۋدانىنىڭ شالقيا كەنتى ماڭىنان ەكى ايدان بەرى ءىز-ءتۇزسىز كەتكەن 48 جاستاعى شوپاننىڭ جەرگە كومىلگەن ءمايىتى ءتابىلدىى. بۇل تۋرالى وبلىستىق ىشكى ىستەر دەپارتامەنتى ءباسپاسوز قىزمەتى حابارلادى.
ۇستىمىزدەگى جىلعى 11 تامىز كۇنى جاڭاقورعان اۋداندىق ىشكى ىستەر بولىمىنە شالقيا كەنتىنەن 6 شاقىرىم قاشىقتىقتا جەرگە كومىلگەن ءمايىت تابىلعانى تۋرالى حابارلاما كەلىپ تۇسكەن. پوليتسيا قىزمەتكەرلەرى وقيعا ورنىنا جەتىپ, ولگەن ازاماتتىڭ وسى اۋداننىڭ 1965 جىلى تۋعان تۇرعىنى ەكەنىن انىقتاعان. ونى بەلگىسىز بىرەۋدىڭ باسىنان قاتتى زاتپەن ۇرىپ, ولتىرگەنى دە بەلگىلى بولدى.
مارقۇمنىڭ وتباسى مۇشەلەرى بيىلعى جىلدىڭ مامىر ايىندا اۋداندىق ىشكى ىستەر بولىمىنە ونىڭ جوعالىپ كەتكەنى جونىندە حابارلاما بەرگەن ەكن. سودان بەرى ول ازاماتتىڭ دەرەگى ەش جەردەن شىقپاعان. تەكسەرۋ بارىسىندا بۇل ءمايىتتىڭ سول ازاماتقا ءتان ەكەنى ايعاقتالدى.
پوليتسيا قىزمەتكەرلەرى ورىن العان ءىس بويىنشا ىزدەستىرۋ شاراسىن جۇرگىزىپ, وسى ىسكە قاتىسى بار كۇدىكتى ازاماتتى قولعا ءتۇسىردى. كۇدىكتى ازامات وسى اۋداننىڭ 1991جىلى تۋعان تۇرعىنى بولىپ شىقتى. ول وڭتۇستىك قازاقستان وبلىسى سايرام اۋدانىنداعى ەگىستىك القاپتا جۇمىس جاساپ جۇرگەن جەرىندە ۇستالدى.
كۇدىكتىنىڭ ايتۋىنشا, جابىرلەنۋشى ەكەۋى اۋداننىڭ شەت ايماعىندا قوي باعىپ, جۇمىس جاسايتىن بولعان. كۇدىكتى جابىرلەنۋشىنىڭ جاردەمشىسى بولىپ قىزمەت اتقارعان. وقيعا بولعان كۇنى ياعني, مامىر ايىنىڭ 11-ىندە تۇنگى ۋاقىتتا جابىرلەنۋشى جايلاۋعا ءىشىپ كەلىپ, كۇدىكتى ەكەۋى اراسىندا جانجال تۋعان. ءۇي الدىندا ەكەۋى توبەلەسىپ, كۇدىكتى جابىرلەنۋشىنىڭ باسىنان قاتتى اعاشپەن ۇرىپ قالادى. جابىرلەنۋشى وقيعا ورنىندا كوز جۇمعان سوڭ, كۇدىكتى ونى سول ماڭعا قازىپ, كومىپ تاستايدى.
كۇدىكتى كىسى ولتىرگەنىن ەشكىمگە ايتپاي, قوي باعىپ جۇرە بەرەدى. جابىرلەنۋشىنى سۇراۋشىلارعا. «مۇندا كەلگەن جوق» دەپ جالعان ايتادى. وقيعا بولعان كۇننەن 2 ايدان كەيىن, كۇدىكتى ەشكىمگە ەسكەرتپەي, ءىز-ءتۇسسىز كەتىپ قالادى.
قازىر كۇدىكتى اۋداندىق ىشكى ىستەر ءبولىمىنىڭ ۋاقىتشا ۇستاۋ اباقتىسىندا وتىر. ونىڭ ۇستىنەن قىلمىستىق كودەكستىڭ 96-بابى 1-بولىگىمەن قىلمىستىق ءىس قوزعالىپ, تەرگەۋ امالدارى ءجۇرىپ جاتىر. ەگەر سەزىكتىنىڭ ءىسى تولىق دالەلدەنسە, وندا وعان سوت شەشىمىمەن 6 جىلدان 15 جىلعا دەيىن باس بوستاندىعىنان ايىرۋ جازاسى كەسىلۋى مۇمكىن.
قۇرىش نۇرىمبەت.
