ال 2016 جىلى مادەنيەت باسقارماسى, وبلىستىق عىلىمي-ادىستەمەلىك قىزمەت كورسەتۋ ورتالىعىنىڭ قولداۋىمەن ماڭعىستاۋلىق ونەر شەبەرلەرىنىڭ انتولوگياسى «بابا سارىن باباۋى» دەگەن اتاۋمەن تىڭدارمانعا جول تارتتى.
جاقسى ءىس جالعاسىن تاۋىپ, بيىل ولكەنىڭ ءداستۇرلى مۋزىكالىق مۇرالارىن ونەرسۇيەر كوپشىلىككە جەتكىزۋدى ماقسات ەتكەن جاڭا جوبا «رۋحاني جاڭعىرۋ» باعدارلاماسى اياسىندا جۇزەگە اسىرىلدى. جوعارىدا ايتىلعان ەڭبەكتەردىڭ ناسيحاتتاۋ اۋقىمى تارلىعىنان, سونىڭ ىشىندە ديسكىلەردىڭ تيراجىن كوبەيتۋگە ايتارلىقتاي قارجى قاجەت بولۋىنا وراي ماسەلەنىڭ ەڭ وڭتايلى شەشىمى Maqamsaz.kz سايتىن قۇرۋ بولىپ تابىلعان. ياعني, زاماناۋي قاجەتتىلىك. رەپەرتۋارىن قۇرۋ, IOS جانە اندرويدقا ارنالعان ءموبيلدى قوسىمشاسىن جاساۋعا ەكى جىل ۋاقىت جۇمسالعان سايت اتاۋى Maqamsaz.kz دەپ اتالادى.
ماڭعىستاۋ وبلىسىنىڭ مادەنيەت, تىلدەردى دامىتۋ جانە ارحيۆ ءىسى باسقارماسىنىڭ تاپسىرىسىمەن جاسالعان سايت رەپەرتۋارىنا باس-اياعى 180 شىعارما ەنگەن. وسى ءوڭىردىڭ مۋزىكالىق ورىنداۋشىلىق مەكتەبىنە ءتان بۇل تۋىندىلاردىڭ دەنى كوپشىلىككە بەيمالىم دەسەك قاتەلەسپەيمىز.
– رەپەرتۋارداعى شىعارمالاردىڭ سانى 200-گە دەيىن جەتكىزىلىپ, جىل سايىن تولىقتىرىلاتىن بولادى. بۇل سايتتىڭ ءبىر ەرەكشەلىگى – شىعارمالاردىڭ اۆتورى, ورىنداۋشىلارى تۋرالى تولىق مالىمەت بەرىلەدى. سونداي-اق ءار تۋىندىنىڭ جارىققا شىعۋ تاريحى مەن نوتاسى ورنالاستىرىلعان, دەيدى جوبا اۆتورى سۇلتانبەك قۇدايبەرگەن.
«ماقامى ءماشھۇر ماڭعىستاۋ» اۋەندەرىن سايتتان نە ءموبيلدى قوسىمشادان تىڭداپ, نوتا ارقىلى ۇيرەنۋگە بولادى. Maqamsaz.kz سايتىنداعى تۋىندىلاردى ءان, كۇي, جىر-تەرمە جانە جىر كۇيى دەپ اتالاتىن ءتورت بولىمنەن كورە الاسىز. ولاردىڭ كۇيتاباق, ماگنيتافون كاسسەتاسىنا جازىلعان نۇسقالارى حالىق اراسىنان جينالىپ, تسيفرلى تازالاۋدان وتكەن سوڭ سايتقا سالىنعان. جوبا اۆتورلارىنىڭ ايتۋىنشا, ءداستۇرلى مۋزىكانى نوتاعا تۇسىرۋگە ماشىقتانعان ماماندار – ماڭعىستاۋلىق داۋلەسكەر كۇيشىلەر ايتبەرگەن جاڭبىرشى, ايداربەك وڭايباەۆ, جۇمابەك قادىرقۇلوۆتاردىڭ ەڭبەگى زور.
– ەسىمى اتالعان ازاماتتار بۇل تۋىندىلاردى بىرنەشە كۇن تىڭداپ, نوتاعا ءتۇسىردى. ماڭعىستاۋدىڭ مۋزىكالىق مۇرالارىنىڭ دا نوقتاعا دا, نوتاعا دا باسى سىيمايتىن كىشكەنە «تارپاڭداۋ مىنەزى» بار. سوندىقتان بۇل ەڭبەكتى جاساۋ ءبىراز ۋاقىتتى الدى. ء«تىرىنىڭ مەرەيى, ءولىنىڭ ۇرەيى» ءۇشىن دەپ شارۋانى بىرلەسە اتقارىپ شىقتىق. ءالى دە الدا جاسالار جۇمىس كوپ, – دەدى س.قۇدايبەرگەن.
اتالعان جوبادا 50 اۆتور, 60 ورىنداۋشى قامتىلعان. سونىڭ ىشىندە تىڭدارمان مۇندا ءارى اۆتور ءارى ورىنداۋشى رەتىندە بەگەندىك ۇلى سۇگىر جىراۋدىڭ, ۇزاقباي جىراۋ قازجاندى ۇلى, القۋات قوجابەرگەن ۇلى, شامعۇل ىبىرايىم ۇلى, قاراعۇل قوناش ۇلىنىڭ داۋىسىن ەستي الادى.
جوبا اۆتورلارى الداعى ۋاقىتتا ماڭعىستاۋلىق ونەرپازداردىڭ جىرشىلىق-ورىنداۋشىلىق شەبەرلىگى تۋرالى وقۋ-ادىستەمەلىك قۇرال شىعارۋدى قولعا الماقشى. بۇل باعىتتاعى جۇمىستار اياقتالعان سوڭ جىرشىلار مەكتەبىن قۇرىپ, جوعارىدا ءسوز بولعان وقۋ-ادىستەمەلىك قۇرال ارقىلى وسكەلەڭ ۇرپاققا رۋحاني تاربيە بەرۋ شارالارى جوسپاردا تۇر.
ماڭعىستاۋ وبلىسى
