اتالعان جۇيەدە جاريالانعان قۇجاتقا قاراعاندا, 19 اقپاندا تۇنگى ساعات 11-لەردىڭ شاماسىندا 10216 اسكەري ءبولىمنىڭ كىشى سەرجانت, كەزەكشىنىڭ كومەكشىسى ا. بالعىنباي كەزەكشى اعا لەيتەناتتىڭ دەمالىپ جاتقانىن پايدالانىپ, ونىڭ قالتاسىنان قارۋ-جاراق ساقتايتىن بولمەنىڭ كىلتىن العان. وسىدان كەيىن ول دابىل قوندىرعىسىن ءوشىرىپ, بولمەدەن 30 دانا كالاشنيكوۆ اۆتوماتىن, 27 دانا ماكاروۆ تاپانشاسىن جانە اتالعان قارۋلارعا ارنالعان وقتاردى العان. كىلتتى قايتادان كەزەكشىنىڭ قالتاسىنا سالىپ قويعان ول قارۋ-جاراقتاردى الىپ بەلگىسىز باعىتقا كەتىپ قالعان. بۇل تۋرالى بولىمدەگىلەرگە بۇگىن تاڭەرتەڭگى ساعات 7-دە بەلگىلى بولعان.
قازىرگى ۋاقىتتا اتالعان اسكەري بولىمدە وسىعان قاتىستى تەكسەرۋ امالدارى ءجۇرىپ جاتىر. كۋاگەرلەردىڭ ايتۋىنشا, شىمكەنت پەن بادام اراسىنداعى جولدى پوليتسەيلەر مەن اسكەريلەر كۇزەتۋگە كوشكەن. ءتىپتى كەيبىرەۋلەر شۇعىل-ىزدەستىرۋ شارالارىنا تىكۇشاقتىڭ دا قاتىستىرىلىپ جاتقانىن ايتۋدا.
ءتۇس قايتا قورعانىس مينيسترلىگى وسىعان قاتىستى رەسمي اقپارات تاراتتى. وندا كىشى سەرجانت بالعىنبايدىڭ كەزەكشىلىك اۋىسىمى كەزىندە ءوز بەتىنشە اسكەري ءبولىمدى تاستاپ كەتكەنى, وسىدان كەيىن بولىمدە قارۋ-جاراقتىڭ جەتىسپەيتىندىگى بەلگىلى بولعانى كورسەتىلگەن. اقپاراتتا سونداي-اق, كۇشتىك قۇرىلىمدار مەن اسكەري پوليتسيانىڭ قاجەتتى شۇعىل-ىزدەستىرۋ جانە قاۋىپسىزدىك شارالارىن جۇرگىزىپ جاتقانى جازىلعان.
