ايماقتار • 20 اقپان، 2020

اقتاۋلىق ەكى وقۋشى نيۋ-يورك ۋنيۆەرسيتەتىنە گرانت جەڭىپ الدى

90 رەتكورسەتىلدى

اقتاۋ قالاسىنداعى نازارباەۆ زياتكەرلىك مەكتەبىنىڭ 12-سىنىپ وقۋشىسى ساعىنبەك تالعات ۇلى مەن ايا سارتباەۆا ابۋ-دابي قالاسىنداعى New York University (NYUAD) جوعارى وقۋ ورنىنىڭ ءبىلىم گرانتىنا يە بولدى. بۇل تۋرالى اتالعان مەكتەپتىڭ ءباسپاسوز قىزمەتى حابارلادى.

ايا – ءبىلىم ورداسىنىڭ ۇزدىك، بەلسەندى وقۋشىلارىنىڭ ءبىرى. ول ءبىلىم ورداسىندا تىلدىك قابىلەتتەرىن شىڭداپ قانا قويماي «تەلەستۋديا» ۇيىرمەسىنە بەلسەندى قاتىستى. سونىمەن قاتار، ءتۇرلى جارىستاردا، پىكىرتالاس كلۋبتارىنا مۇشەلىككە يە. سوڭعى جىلى زياتكەر بۇۇ مودەلى كلۋبىندا بەلسەندىلىك تانىتتى. گرانت يەگەرىنىڭ سوزىنشە، ونىڭ مەكتەپ ومىرىنە، شارالارعا، ۇيىرمەلەرگە بەلسەندى قاتىسۋى ۋنيۆەرسيتەتكە تۇسۋگە ارنالعان سۇحبات بارىسىندا ۇلكەن كومەك كورسەتكەن. جاس زياتكەر

-ۋنيۆەرسيتەت تۋرالى قازان ايىندا الەۋمەتتىك جەلىلەردەن ءبىلدىم. كەيىن قاجەتتى قۇجاتتار تىزىمىمەن تانىسىپ، كاسىبي باعدار بەرۋ كەڭەسشىسىنىڭ كومەگىمەن جيناقتادىق. وتكەن اپتادا ءبىزدى ابۋ-دابيگە سۇحباتقا شاقىردى. سول جەردە 75 مينۋتقا سوزىلعان تاقىرىپتىق ەسسە جازىپ، پروفەسسورلارمەن سۇحباتتاسىپ، ۋنيۆەرسيتەتتپەن تانىستىق. قالانى كورۋگە دە مۇمكىندىك جاسادى. ال بۇگىن جاۋابىن وقۋ ورنىنا شاقىرۋ قاعازى ارقىلى جىبەردى. قۋانىشىمدا شەك جوق، دەيدى ايا سارتباەۆا.

1

ساعىنبەك تالعات ۇلى - زياتكەرلىك مەكتەپتەرىنىڭ بەتكە ۇستار وقۋشىلارىنىڭ ءبىرى. فيزيكا، ماتەماتيكا پانىنەن بىرنەشە حالىقارالىق وليمپيادالار جەڭىمپازى. سونداي-اق، روبوتوتەحنيكا مەن عىلىمي جوبالار بايقاۋىندا دا بوي كورسەتىپ جۇلدەلى ورىنداردان كورىنىپ ءجۇر.

ابۋ-دابيدەگى نيۋ-يورك ۋنيۆەرسيتەتى – اقش- تاعى نيۋ-يورك زەرتتەۋ ۋنيۆەرسيتەتىنىڭ ءبولىمى. 2010 جىلى العاش ستۋدەنتتەرىن قابىلداعان ۋنيۆەرسيتەت ءبولىمى بۇگىندە ينجەنەريا، گۋمانيتاريا-جاراتىلىستانۋ باعىتىنداعى مامانداردى دايارلايدى. ۋنيۆەرسيتەتتىڭ ۇمىتكەرلەردەن تالابى وتە جوعارى. ستاتيستيكالىق دەرەكتەرگە سۇيەنسەك، جىل سايىن اتالعان وقۋ ورنىنا 144 مىڭنان اسا ءوتىنىم كەلىپ تۇسەدى. ونىڭ 4 پايىزى عانا وقۋعا قابىلدانادى ەكەن.

سوڭعى جاڭالىقتار

ۇقساس جاڭالىقتار