قوعام • 20 اقپان، 2020

«سوزىلمالى دەرتكە» ۇشىراعان ورتالىق

76 رەتكورسەتىلدى

مەملەكەت باسشىسى قاسىم-جومارت توقاەۆ 2019 جىلى 26 ساۋىردە سەمەيگە جۇمىس ساپارىمەن كەلگەندە قالاداعى يادرولىق مەديتسينا ورتالىعىنىڭ ءالى كۇنگە دەيىن جۇمىس ىستەمەي تۇرعانىنا الاڭداۋشىلىعىن ءبىلدىرىپ: «ورتالىقتىڭ قۇرىلىسى ابدەن سوزىلىپ كەتتى. بۇل ءتيىستى مەملەكەتتىك ورگانداردىڭ ادام تاعدىرىنا سونشالىقتى جاۋاپسىز قاراپ وتىرعانىن كورسەتەدى. سوندىقتان ايتىس-تارتىستى دەرەۋ توقتاتىپ، ەلگە ءتيىمدى ورتاق مامىلەگە كەلۋ كەرەك» دەي كەلە، وبلىس اكىمى مەن دەنساۋلىق ساقتاۋ مينيسترىنە ورتالىقتى جابدىقتاپ، قىسقا مەرزىم ىشىندە ىسكە قوسۋدى تاپسىرعان بولاتىن.

جىلىنا 3 مىڭ سىرقات قارالۋعا ءتيىس ەدى

پرەزيدەنت جۋىقتا اقوردادا سەمەي قالاسىنىڭ اكىمى ەرماك ءسالىموۆتى قابىلداعاندا دا يادرولىق مەديتسينا ورتالىعىنا باسا نازار اۋدارعانى بەلگىلى.

بىردەن ايتا كەتەيىك، وسىدان 11 جىل بۇرىن، ناقتىلاساق، 2009 جىلدىڭ ماۋسىم ايىندا ەلباسى – تۇڭعىش پرەزيدەنت نۇرسۇلتان نازارباەۆ ۇكىمەتكە سەمەيدەگى وڭىرلىك ديسپانسەر اياسىندا يادرولىق مەديتسينانى دامىتۋ ءۇشىن راديولوگيالىق ورتالىق كلاستەرىن اشۋ قاجەتتىگىن تاپسىرعان-دى. سودان 2012 جىلى ناۋرىز ايىندا سەمەي ءوڭىرىنىڭ يادرولىق سىناق پوليگونىنان زارداپ شەككەن حالقى سان جىل تاعاتسىزدانا كۇتىپ جۇرگەن ەم­دەۋ-ساۋىقتىرۋ ورتالىعىنىڭ قۇرى­لىسى باستالىپ، 2013 جىل­دىڭ جەلتوقسان ايىندا حالىق يگىلىگىنە بەرىلۋى ءتيىس بولاتىن. الايدا سول «بولاتىننىڭ» بولاتىن ءتۇرى كورىنبەيدى ازىرگە.

مەملەكەت تاراپىنان 6 ميلليارد تەڭگە كولەمىندە قارجى بولىن­گەن بۇل ورتالىقتىڭ اۋەل­دەگى ماقسات-مۇراتى قانداي ەدى؟ را­سىندا، قولعا الماق بولعان جوبا-جوسپارلار عاجاپ ەدى. يادرولىق مەديتسينا ورتالىعىنىڭ جوبالىق-سمەتالىق قۇجاتىن جاساعان حالىقارالىق ساراپشىلار: «بۇل الەمدەگى ەڭ وزىق عىلىمي-تاجى­ريبەلىك ورتالىق بولادى. يادرو­لىق مەديتسينانىڭ وزىق ۇلگىسى الەم بويىنشا وسى جەردە قالىپ­تاسادى» دەگەن بو­لاتىن... ال سە­مەيدەگى وڭىر­لىك ونكولوگيالىق ديسپان­سەردىڭ ماماندارى: «بۇل ورتالىق­تىڭ وزگە ورتالىقتاردان ارتىق­شى­لىعى، وسىندا جاسالعان راديو­فارماتسەۆتيكالىق ءدارى-دارمەكتەر ونكولوگيالىق اۋرۋلاردى ەمدەپ جازۋى ءتيىس.

جۇرەك-قان تامىرى اۋرۋلارى، بۇيرەك قىزمەتى مەن ەندوكرينولوگيا بويىنشا دا ورتالىقتا ەم-دوم قابىلداۋ جوسپارلانعان. وسىعان وراي راديونۋكليدتى تەراپيا ءبولىمى اشىلىپ، 15 توسەكپەن جاب­دىقتالماق. بۇل جەردە ديففۋزدى جەمساۋ مەن قالقانشا بەزىنىڭ قاتەرلى دەرتى ەمدەلەدى، ياعني، ەندوكرينولوگيا بويىنشا زاماناۋي تەحنولوگيالاردىڭ كومەگىمەن ساپالى قىزمەت كورسەتىلەدى» دەگەن ەدى...

ەڭ ماڭىزدىسى، ەگەر ورتالىق تەزدەتىپ اشىلعان جاعدايدا اۋىر دەرتكە ۇشىراعان ناۋقاستاردى شەت ەلدىڭ باعاسى ۋداي كلينيكالارىنا جىبەرمەي، وسى جەردە-اق ەمدەۋگە بولادى ەكەن. «راديولوگيالىق ورتالىق بىزگە وتە قاجەت. مۇنداعى تەحنولوگيا تمد ەلدەرىندە جوق. ءبىز ءالى كۇنگە دەيىن جەمساۋ اۋرۋلارىنىڭ قاتەرلى وبىر دەرتىنە ۇشىراعان ءتورتىنشى دەڭگەيلى سىرقاتتاردى وتا جاساۋ ءۇشىن رەسەيگە جىبەرەمىز. ونداي وتالاردى وسىندا جاساۋعا بولادى. راديولوگيالىق مەديتسينا كلاستەرىن سەمەيدە قۇرامىز دەپ وتىرمىز. ويتكەنى، سەمەيدە ەلىمىز بويىنشا ونكولوگيالىق اۋرۋلاردىڭ اسقىنعان ءتۇرى وتە كوپ مولشەردە تىركەلگەن. راديوفارماتسەۆتيكالىق ءدارى-دارمەكتەردى الۋ، ءوندىرۋ ءۇشىن يزوتوپتار زەرتتەلەدى. بۇل ەرتە دياگنوستيكا جاساۋدىڭ كىلتى. مۇندا سىرقاتتار راديويودتەراپياسىن قابىلداۋى كەرەك. بۇل الەم بويىنشا ءوزىنىڭ تيىمدىلىگىن كورسەتىپ وتىر. تمد-دا مۇنداي الەۋەتى جوعارى، دامىعان مەديتسينا ورتالىعى جوق. ءبىز مۇنى ەسكەرۋىمىز كەرەك. سوندىقتان ورتالىقتى تەزدەتىپ ىسكە قوسىپ، حالىق يگىلىگىنە بەرگەنىمىز ءجون» دەگەن بولاتىن بۇرىنعى دەنساۋلىق ساقتاۋ ۆيتسە-ءمينيسترى الەكسەي تسوي 2017 جىلى سەمەيگە ۆەدومستۆوارالىق كوميسسيا قۇرامىندا كەلگەن ساپارىندا.

ادام تاعدىرىن ويىنشىققا اينالدىرعان مەردىگەرلەردىڭ كەسىرىنەن ءالى كۇنگە دەيىن قۇرىلىسى اياقتالماعان ورتالىقتىڭ اشىلۋىن شەت ەلدىڭ قىمبات كلينيكالارىنا بارعىسى كەلمەيتىن ناۋقاس جاندار عانا ەمەس، سول شەت ەلدە ءبىلىم العان اق حالاتتىلاردىڭ وزدەرى دە اسىعا كۇتىپ ءجۇر. «بىزدە «وسى ورتالىقتا جۇمىس ىستەيمىز» دەپ سان جىلدان بەرى سارسىلا كۇتىپ جۇرگەن دارىگەرلەر بار. ولار ەۋروپا مەن ازيانىڭ ۇزدىك كلينيكالارىندا وقىپ كەلگەن. مەردىگەرلەردىڭ جاۋاپسىزدىعىنان وقىتقان ماماندارىمىز جۇمىسقا كىرىسە الماي وتىر. ورتالىقتىڭ ءۇشىنشى قاباتىندا 15 پالاتاعا ارنالعان ستاتسيونار ورنالاسقان. وسى جەردە جىلىنا 600 ونكولوگيالىق سىرقات راديوتەراپيا قابىلداپ، ەم-دوم الار ەدى. ەرتە باستان سىرقاتتارىن انىقتاۋعا جىلىنا تاعى قوسىمشا 3 مىڭ ادام كەلۋى ءتيىس ەدى. ورتالىقتىڭ راديويزوتوپتى دياگنوستيكا جانە تەراپيا ءبولىمىنىڭ ىسكە قوسىلۋىنا وراي ونكولوگيالىق دەرتتەردى ەمدەۋگە قازاقستاننىڭ بۇكىل ايماقتارىنان جانە كورشى ەلدەردەن ادامدار كەلۋى جوسپارلانىپ قويىلعان ەدى. كورشى رەسەيدەگى ءنوۆوسىبىر، بارناۋل قالالارىنداعى دارىگەرلەر دە «ورتالىقتىڭ جۇمىسى قاشان اياقتالادى؟» دەپ سۇراپ قويادى» دەگەن-ءدى سەمەيدەگى وڭىرلىك ديسپانسەر ديرەكتورى مارات ساندىباەۆ ەكى جىل بۇرىن بەرگەن سۇقباتتارىنىڭ بىرىندە.

ماسەلەنىڭ ءبارى جۇيەگە تىرەلىپ تۇر...

«وسىنداي حالىققا، حالىق بولعاندا قاراپايىم حالىققا پايداسى زور ورتالىق قۇرىلىسى نەگە توقتاپ قالدى؟ بۇعان كىمدەر كىنالى؟ ورتالىق قۇرىلىسى ەندى قاشان اياقتالادى؟ اياقتالا ما، اياقتالماي ما ءوزى؟» دەگەن كۇمان مەن كۇدىككە تولى ساۋالداردىڭ قويىلۋى زاڭدى. وسى رەتتە بۇل تاقىرىپ بۇعان دەيىن سان مارتە قاۋزالعاندىقتان ورتالىق قۇرىلىسىنىڭ تەجەلىپ تۇرۋىنىڭ باستى سەبەپتەرىنە، كەمشىلىكتەرگە جول بەرگەن تاراپتارعا قىسقاشا عانا توقتالساق دەيمىز. «داۋدىڭ باسى دايرابايدىڭ كوك سيىرى» دەمەكشى، ىشەكتەي شۇباتىلىپ، ۇزاققا سوزىلعان داۋ-داماي راديولوگيالىق ورتالىققا باعاسى قىمبات مەديتسينالىق قۇرىلعىلاردى ورناتۋ كەزىندە باستالعانى ءمالىم. 2015 جىلدىڭ قاڭتار ايىندا ورتالىق قۇرىلىسىن ءوز موينىنا العان باس مەردىگەر «يرتىشگەسستروي» جشس مەن «مەدتەحنيكا» اكتسيونەرلىك قوعامى اراسىندا كيكىلجىڭ باستالادى. «يرتىشگەسستروي» جشس اۋەلى ورتالىقتى جوعارى دەڭگەيلى مەديتسينالىق جابدىقتارمەن جابدىقتاۋ ءۇشىن قوسالقى مەردىگەر رەتىندە «مەدتەحنيكا» اكتسيونەرلىك قوعامىمەن كەلىسىمگە كەلەدى. الايدا يادرولىق مەديتسينا ورتالىعىنا ءدال مەديتسينالىق قۇرال-جابدىقتاردى اكەلىپ، ورنالاستىرار شاقتا ەكى مەكەمە اراسىندا ارازدىق تۋادى. بۇعان باستى سەبەپ – ورتالىقتاعى سۇيىق راديواكتيۆتى قالدىقتى جيناپ، ساقتايتىن جۇيەنىڭ تالاپقا ساي كەلمەگەندىگى. ءدال قازىرگى ۋاقىتتا دا ورتالىقتىڭ اشىلۋ-اشىلماۋى تىكەلەي وسى جۇيەنىڭ جۇمىسىنا بايلانىستى بولىپ تۇر. ارازدىق سوڭى سوتتاسۋعا ۇلاسادى. شىعىس قازاقستان وبلىستىق مامانداندىرىلعان اۋدانارالىق سوتى 2015 جىلدىڭ 5 ماۋسىمىندا «سۇيىق راديواكتيۆتى قالدىقتى جيناپ، ساقتايتىن جۇيەنى الىپ تاستاۋ قاجەت» دەگەن شەشىم شىعاردى. ءبىر قىزىعى، تۋرا ەكى اي وتكەندە شىعىس قازاقستان وبلىستىق ازاماتتىق جانە اكىمشىلىك ىستەر بويىنشا اپپەلياتسيالىق سوت القاسى كەرىسىنشە «راديواكتيۆتى قالدىقتى جيناپ، ساقتايتىن جۇيەنى پايدالانۋعا بولادى. مەملەكەتتىڭ اقشاسىن وڭدى-سولدى شاشا بەرمەيىك» دەگەنگە ساياتىن شەشىمگە كەلەدى. سوتتاسۋ مۇنىمەن دە توقتامايدى، شىعىس قازاقستان وبلىستىق سوتىنىڭ كاسساتسيالىق سوت القاسى 2015 جىلدىڭ 12 جەلتوقسانىندا «ورتالىقتاعى جۇيەنى الىپ تاستاۋ قاجەت، ايتپەسە قورشاعان ورتا مەن تۇرعىندارعا زيانىن تيگىزۋى مۇمكىن» دەگەن كەسىم ايتادى. ەكى مەكەمە اراسىنداعى داۋ-جانجال ودان ءارى ءورشىپ، ءىس 2016 جىلدىڭ قىركۇيەگىندە جوعارعى سوتتىڭ ازاماتتىق ىستەر جونىندەگى سوت القاسىنا جەتىپ، ولار بارلىق ءىستى قايتا قاراۋدى، قوسىمشا ماتەريالدار جيناقتاۋدى ۇسىنادى. سونىمەن بۇل ءىس 2017 جىلدىڭ 9 قاڭتارىندا شىعىس قازاقستان وبلىستىق سوتىنىڭ ازاماتتىق ىستەر بويىنشا سوت القاسىندا قارالىپ: «يرتىشگەسستروي» جشس-ءىنىڭ «مەدتەحنيكا» اق-ىنا جاساعان ارىز-شاعىمى نەگىزىندە سۇيىق راديواكتيۆتى قالدىقتى جيناپ، ساقتايتىن جۇيەنى الىپ تاستاۋ بويىنشا ارىز-شاعىمى قاناعاتتاندىرىلمايدى» دەگەن شەشىم شىعارىلادى. الايدا بۇل جەردە دە ءبىر كىلتيپان بار. سوت القاسى بۇل شەشىمدى ماسكەۋ قالاسىنداعى فەدەرالدىق مەملەكەتتىك ۋنيتارلىق كاسىپورىندارعا قاراستى «يادرولىق مەديتسينانى جوبالاۋ جانە دامىتۋ جونىندەگى فەدەرالدى ورتالىق» مەكەمەسىنىڭ ساراپشىلارى بەرگەن زەرتتەۋ قورىتىندىسىنا سۇيەنە وتىرىپ شىعارعان ەكەن. بۇل مەكەمەنىڭ ساراپشىلارىن تاۋەلسىز ساراپتاما جاساتۋ ءۇشىن «مەدتەحنيكا» اق-ى جەتەكشىلەرى 2016 جىلدىڭ قاراشا ايىندا شاقىرىپتى. سوڭىنان اتالعان رەسەيلىك ساراپتاما توبىنىڭ قازاقستان رەسپۋبليكاسى اۋماعىندا اككرەديتاتسيادان وتپەگەنى، ليتسەنزياسىنىڭ جوقتىعى، سوندىقتان كاسىپورىن قورىتىندىسىنىڭ زاڭدىق كۇشىنىڭ جوق ەكەندىگى انىقتالادى.

وسى جەردە تاعى ءبىر ماڭىزدى ماسەلەنى ايتپاسقا بولمايدى. 2015 جىلدىڭ 24 قاڭتارىندا قۇرامىندا ماگاتە، ورتالىق ازيا ەلدەرىنىڭ جانە تاعى باسقا دا ءىرى ۇيىمداردىڭ ساراپشىلارى، اتومشى-فيزيكتەر، فيزيكا زەرتحاناسىنىڭ مەڭگەرۋشىلەرى بار ۆەدومستۆوارالىق كوميسسيا سەمەيدەگى ورتالىقتاعى سۇيىق راديواكتيۆتى قالدىقتىڭ قالاي جيناقتالىپ، ساقتالاتىنىن تەكسەرۋگە كەلەدى دە، اتقارىلعان جۇمىسقا مۇلدە كوڭىلدەرى تولمايدى. الايدا وسىعان قاراماستان 2016 جىلدىڭ 26 قاراشاسىندا وبلىستىق قۇرىلىس، ساۋلەت جانە قالا قۇرىلىسى باسقارماسى باستىعىنىڭ سول كەزدەگى ورىنباسارى قانات دىرىنباەۆتىڭ توراعالىعىمەن ماسەلە قايتا قوزعالادى. وبلىستاعى ماماندار شەت ەلدىك ساراپشىلاردىڭ پىكىرلەرىنىڭ دۇرىس ەمەستىگىن ايتىپ، «الاڭدايتىن ەشتەڭە جوق، سۇيىق راديواكتيۆتى قالدىقتاردى ساقتاپ، جيناۋ جۇيەسى تالاپقا ساي» دەگەن تۇجىرىمعا كەلىپ، جۇمىستى جالعاستىرا بەرەدى.

جاعداي وسىلايشا ابدەن ۋشىققان كەزدە وبلىس اكىمى دانيال احمەتوۆ ۇكىمەتكە ۇسىنىس جاساپ، يادرولىق مەديتسينا ورتالىعىن تولىق تەكسەرۋدەن وتكىزۋدى سۇرايدى. ناتيجەسىندە 2017 جىلى سول كەزدەگى دەنساۋلىق ساقتاۋ ۆيتسە-ءمينيسترى الەكسەي تسويدىڭ توراعالىعىمەن رەسپۋبليكالىق ۆەدومستۆوارالىق كوميسسيا قۇرىلىپ، ولار ورتالىقتا ورىن العان كەمشىلىكتەردى جىپكە تىزگەندەي جىلىكتەپ كورسەتىپ بەرگەنى بەلگىلى. كوميسسيا يادرولىق مەديتسينا ورتالىعىنداعى سۇيىق راديواكتيۆتى قالدىقتاردى جيناقتاپ، ساقتايتىن جۇيەنىڭ مۇلدە تالاپقا ساي ەمەستىگىن، رادياتسيالىق قاۋىپسىزدىكتىڭ حالىقارالىق ستاندارتتارىنا سايكەس كەلمەيتىنىن، قوندىرعىلاردىڭ جوبالىق-سمەتاعا سايكەس جاسالماعانىن انىقتادى. مەردىگەر مەكەمەنىڭ بۇل ءىستى قولعا الۋىنا ەشبىر رۇقساتى جوق ەكەنى دە سول كەزدە بەلگىلى بولادى. ءتىپتى، بۇل جۇيەنىڭ شىمكەنتتەن اكەلىنگەنى، بىراق قاي مەكەمە جاساعانى بەلگىسىز ەكەنى دە سول ۋاقىتتا ءمالىم بولعان-دى. سەمەيدەگى يادرولىق مەديتسينا ورتالىعىنداعى تسيكلوترون وپەراتورى داۋرەن بيداحمەتوۆتىڭ سول كەزدە كوميسسيا مۇشەلەرىنە ايتقان مىنا ءبىر ءسوزى ەستە قالىپتى. «جوبادا نەمىستىڭ الەمدىك دەڭگەيدە مويىندالعان «ينۆيرو» كومپانياسىنىڭ قۇرىلعىسى كورسەتىلگەن. مەردىگەرلەر بولسا، يتاليانىڭ «كوميشەر» كومپانياسىنىڭ قۇرىلعىسىن اكەلدىك دەپ وتىر. قازىرگى ۋاقىتتا بۇل جەردە سورعى قۇرالى جوق، جەلدەتكىش پەن باسپالداق، باسقىشتار قاراستىرىلماعان. قالدىقتاردى جيناپ، ساقتايتىن تسيستەرنا تالاپقا ساي ەمەس. دۇرىس ورناتىلماعان. بۇل سۋدىڭ اعىنىنا توتەپ بەرە الماۋى مۇمكىن. ارنايى قۇبىرلار جۇيەسى مەن سۋ قۇبىرى دا قالاي بولسا سولاي شاشىلىپ جاتىر. راديولوگيالىق قاۋىپسىزدىككە ساي ماتەريالدار مۇندا ورناتىلماعان» دەگەن ەدى ول. وبلىستىق دەنساۋلىق ساقتاۋ باسقارماسىنىڭ سول كەزدەگى باسشىسى مارات شورانوۆ 2017 جىلى پارلامەنت ءماجىلىسىنىڭ دەپۋتاتتارى سەمەيگە كەلگەندە باس مەردىگەر اۋەلگى جوبادان مۇلدە اۋىتقىپ، ويىنا كەلگەن قۇرىلعىلاردى ساتىپ الىپ، العاندا دا ءبىر جەردەن ەمەس، ءار جەردەن العانىن، ءتىپتى سۇيىق راديواكتيۆتى قالدىقتى جيناپ، ساقتاۋعا ەش قورىقپاستان جانارماي قۇيۋعا ارنالعان باكتى الا سالعانىن، بۇعان مۇلدە جول بەرۋگە بولمايتىنىن ايتقاندا ەستەن تانا جازداعانبىز. ۇزىن ءسوزدىڭ قىسقاسى، رەسپۋبليكالىق كوميسسيا دا سول جولى پارمەندەرى بولعانىمەن، دارمەندىلىك تانىتىپ، ماسەلەنى تولىق شەشە الماي: «كەمشىلىكتەردىڭ بارلىعىن جويۋدى، قۇرىلىس جۇمىستارىن اياقتاۋدى باس مەردىگەرگە مىندەتتەۋ كەرەك» دەگەن جالاڭ ۇسىنىسپەن ەلورداعا اتتانعانىن بىلەمىز. مىنە، سودان بەرى دە ءۇش جىلعا جۋىق ۋاقىت ءوتتى. ورتالىق قۇرىلىسى سول قالپى تۇر. بۇعان دەيىن تالاي ناۋقاستى اۋرۋىنان ايىقتىرۋعا، دەنساۋلىقتارىن نىعايتۋعا ءتيىس، باعاسى قىمبات مەديتسينالىق قۇرىلعىلار دا شاڭ باسقان قالپى تۇر. شاڭ باسقان دەمەكشى، ورتالىقتاعى ەڭ باعالى قۇرىلعىلاردىڭ ءبىرى – پوزيترونندى-ەمميسسيوندى توموگراف (پەت). مۇنداي قۇرىلعى قازاقستان بويىنشا بەسەۋ ەكەن. ەكەۋى نۇر-سۇلتان قالاسىندا، بىرەۋى الماتىدا جۇمىس ىستەپ تۇرسا، ەكەۋى سەمەيدە شاڭ باسىپ، ورتالىقتى «كۇزەتىپ» تۇر. ال وسى جوبانى ۋاقىتىندا ىسكە قوسا الماعان باس مەردىگەر – «يرتىشگەسستروي» جشس ديرەكتورى الەكساندر يزوتوۆ 2017 جىلى قازاقستان رەسپۋبليكاسىنىڭ قىلمىستىق كودەكسىنىڭ ەكى بىردەي بابىمەن (190 باپ، 4 ءبولىم جانە 222 باپ، 3 ءبولىم) 8 جىل 6 ايعا باس بوستاندىعىنان ايىرىلىپ، مۇلكى تاركىلەنگەن بولاتىن. ا.يزوتوۆپەن بىرگە وبلىستىق قۇرىلىس، ساۋلەت جانە قالا قۇرىلىسى باسقارماسىنىڭ بۇرىنعى ءبولىم جەتەكشىسى قانات مۇقان جانە «يرتىشگەسستروي» جشس ديرەكتورىنىڭ ورىنباسارى ناتاليا افاناسەۆا دا كىنالى دەپ تانىلعان.

ءتۇيىن

سونىمەن، ابدەن جىرعا اينالعان ورتالىق قۇرىلىسى قاشان اياقتالادى؟ قازىرگى جاعدايى قالاي؟ وبلىس اكىمى دانيال احمەتوۆ 2019 جىلى 17 قازاندا ءوزىنىڭ فەيسبۋك الەۋمەتتىك جەلىسىندەگى پاراقشاسىندا سەمەيدەگى راديولوگيالىق ورتالىقتىڭ قۇرىلىسىن اياقتاۋعا باعىتتالعان جول كارتاسى اياسىندا قازاقستاندىق جانە شەتەلدىك ەكسپەرتتەردىڭ قاتىسۋىمەن عيماراتتىڭ تەحنيكالىق، جابدىقتاردىڭ مەديتسينالىق جانە تەحنولوگيالىق زەرتتەۋى جۇرگىزىلگەنىن، جوبالىق-سمەتالىق قۇجاتتاما جاساۋ ءۇشىن «ينسون» جشس-مەن كەلىسىمشارتقا قول قويىلعانىن جازعان بولاتىن. «بۇل ىسكە سونداي-اق، جابدىقتى جەتكىزۋ جانە تەكسەرۋگە ديستريبيۋتورلىق قۇقىعى بار، جەلدەتۋ مەن اۋانى باپتاۋ جۇيەسىن جيناقتاۋ، ىسكە قوسۋ مەن جوندەۋ جۇمىستارىندا تاجىريبەسى مول كومپانيالار جۇمىلدىرىلدى. عيماراتتىڭ ستاتسيونارلىق تۇرعىدا قورعالۋىن ەسەپتەۋ بارىسىنا كۋرچاتوۆ قالاسىنىڭ «رادياتسيالىق قاۋىپسىزدىك جانە ەكولوگيا ينستيتۋتى»، نىساننىڭ رادياتسيالىق قاۋىپسىزدىگىن قامتاماسىز ەتۋ ءۇشىن رەسەيدىڭ «ريپ» جشق قاتىسادى. ورتالىققا قاتىستى 2015 جىلدان بەرى 16 سوت ءىسى قارالدى. 2019 جىلدىڭ 11 ماۋسىمىندا جوعارعى سوتتىڭ ازاماتتىق ىستەر جونىندەگى سوت القاسى قاۋلى شىعارىپ، ونىڭ نەگىزىندە «مەدتەحنيكا» اق سۇيىق راديواكتيۆتى قالدىقتاردى جيناۋ جانە ساقتاۋ جۇيەسىن اياقتاۋعا ءتيىس ەدى. الايدا قوسالقى مەردىگەر جۇمىستى باستاعان دا جوق. بىراق، ءبىز بۇعان قاراماستان قۇرىلىستى سوڭىنا دەيىن جەتكىزىپ، اياقتاۋدى كوزدەپ وتىرمىز» دەگەن-ءدى ايماق باسشىسى. وسى ماقالانى ازىرلەۋ بارىسىندا جاقىندا وبلىستىق قۇرىلىس، ساۋلەت جانە قالا قۇرىلىسى باسقارماسىنا حابارلاسقانىمىزدا: «وبلىس اكىمدىگى دەنساۋلىق ساقتاۋ مينيسترلىگىمەن بىرلەسە نىسان قۇرىلىسىن اياقتاۋ بويىنشا جول كارتاسىن ازىرلەدى. جول كارتاسىنا سايكەس نىسان وبلىستىق قۇرىلىس، ساۋلەت جانە قالا قۇرىلىسى باسقارماسىنىڭ بالانسىنا الىندى. 2020 جىلى نىسان قۇرىلىسىن باستاۋ ءۇشىن وبلىستىق بيۋدجەتتەن 353،5 ميلليون تەڭگە ءبولىندى. قازىرگى ۋاقىتتا دەنساۋلىق ساقتاۋ مينيسترلىگىنە رەسپۋبليكالىق بيۋدجەتتەن قارجى ءبولۋ ءۇشىن بيۋدجەتتىك ۇسىنىم ازىرلەنۋدە. قۇرىلىس-مونتاج جۇمىستارىنا قايتادان كونكۋرس جاريالاۋ جوسپارلانىپ وتىر» دەگەن جاۋاپ الدىق.

سەمەي

 

سوڭعى جاڭالىقتار

ەلدىك نىشاندار تاريحى

قازاقستان • بۇگىن، 18:14

اتىراۋ: ءۇي قاماققا قامالعان قىز

ايماقتار • بۇگىن، 18:00

بيىل اۋىلعا تابيعي گاز جەتەدى

ايماقتار • بۇگىن، 14:29

ۇقساس جاڭالىقتار