ب.ساپارباەۆ 2020 جىلى جامبىل وبلىسىندا جالپى قۇنى 114 ملرد تەڭگە بولاتىن 18 ينۆەستيتسيالىق جوبانى ىسكە اسىرۋ جوسپارلانعانىن ايتتى. سونىمەن قاتار ءتيىمدى ينۆەستيتسيالىق ساياسات اعىمداعى جىلدىڭ قورىتىندىسى بويىنشا ونەركاسىپتىڭ 5 پايىزدىق ءوسىمىن قامتاماسىز ەتۋگە مۇمكىندىك بەرەتىنىن جەتكىزدى. ەڭ ۇلكەن قۋاتتى جوبالاردى «ەۋروحيم مينەرالدى تىڭايتقىشتار», «قازفوسفات», «Qazaq soda», «KORSEM» جانە «TALAS INVESTMENT COMPANY» كومپانيالارى جۇزەگە اسىرادى. «2025 جىلعا دەيىن جالپى قۇنى 2,7 ترلن تەڭگە بولاتىن 66 جوبا ىسكە اسىرىلادى, سول ارقىلى 11,4 مىڭ جاڭا جۇمىس ورنىن قۇرۋ كوزدەلۋدە», دەدى اكىم.
جيىندا ءوڭىر باسشىسى جەرگىلىكتى بيلىكتىڭ كۇن تارتىبىندە «تاراز «حيمپارك» ارنايى ەكونوميكالىق ايماعىن دامىتۋ مىندەتى تۇرعانىن, ونى شەشۋ ءۇشىن جەتى جوبانى ىسكە اسىرۋعا 648,3 ملرد تەڭگە كولەمىندە ينۆەستيتسيا تارتىلاتىنىن, ناتيجەسىندە بۇل 2 مىڭنان استام جاڭا جۇمىس ورنىن اشۋعا مۇمكىندىك بەرەتىنىن جەتكىزدى. «وڭدەۋشى ونەركاسىپتى دامىتۋ ماقساتىندا 12 كاسىپورىن جاڭعىرتىلادى, تاعى تورتەۋى زاماناۋي يننوۆاتسيالىق تەحنولوگيالاردى ەنگىزەدى. وبلىس تۇرعىندارىنىڭ 60 پايىزدان استامى اۋىلدىق جەرلەردە تۇراتىن ايماقتىڭ ەرەكشەلىگىن ەسكەرسەك, اگرارلىق سەكتوردى دامىتۋعا بارىنشا كوڭىل ءبولۋدىڭ ماڭىزى جوعارى. جوسپارلانعان ينۆەستيتسيادان باسقا سالانىڭ مۇقتاجدىقتارى ءۇشىن 21 ملرد تەڭگە كولەمىندە سۋبسيديا بولىنەدى. اعىمداعى جىلدىڭ باستى مىندەتتەرىنىڭ ءبىرى – ەگىستىك القاپتارىن 705 مىڭ گەكتارعا, ال سۋارمالى جەر كولەمىن 8 مىڭ گەكتارعا كەڭەيتۋ», دەدى ب.ساپارباەۆ.
ءوز سوزىندە وبلىس اكىمى ەگىس القاپتارىن رەنتابەلدى, مايلى جانە بۇرشاقتى داقىلدارمەن ءارتاراپتاندىرۋ, جەرگىلىكتى قانت زاۋىتتارىن بارىنشا جۇمىلدىرۋ ءۇشىن قىزىلشا شارۋاشىلىعىن دامىتۋعا كوڭىل ءبولۋ قاجەتتىگىن دە ايتتى. تاعى ءبىر ماسەلە, نەگىزگى باعىتتاردىڭ ءبىرى رەتىندە پايدالانۋسىز جاتقان 70 مىڭ گەكتار جەردى ەگىستىك جەر رەتىندە اينالىمعا ەنگىزۋدى, مەحانيكالاندىرىلعان جاساقتىڭ كومەگىمەن القاپتاردى سۋلاندىرۋ جەلىلەرى مەن كانالدارىن,
5 سۋ قويماسىن رەتكە كەلتىرۋدى, 5 مىڭ گەكتارعا جاڭا سۋ ۇنەمدەۋ تەحنولوگيالارىن ەنگىزۋ كەرەگىن دە جەتكىزدى. ماقسات – يمپورتتى تومەندەتۋ جانە ءوڭىردى جەرگىلىكتى ازىق-ت ۇلىكپەن قامتاماسىز ەتۋ.
وسى ماقساتتا جامبىل وبلىسىندا ىسكە اسىرىلىپ جاتقان اۋىل تۇرعىندارىنىڭ تابىسىن ارتتىرۋ ماقساتىنداعى قاناتقاقتى جوبانىڭ بەرەرى مول. بۇل جامبىل ءوڭىرى ءۇشىن عانا ەمەس, رەسپۋبليكا ءۇشىن دە ماڭىزدى. جوبانىڭ العاشقى قادامدارى جاسالىپ, 7886 اۋلا نەسيەگە قول جەتكىزسە, 194 اۋلاعا شارۋاشىلىق تەحنيكاسى الىنعان. اكىم بۇل جۇمىستاردىڭ ءارى قاراي جالعاساتىنىن ايتتى. جيىندا اۋىل تۇرعىندارىنىڭ ورتاشا تابىسىن 41,6 مىڭ تەڭگەدەن 104 مىڭ تەڭگەگە دەيىن ارتتىرۋ, ال 2,2 مىڭ شارۋانى ءوزىن ءوزى جۇمىسپەن قامتىعاندار ساناتىنان جەكە كاسىپكەرلەر ساناتىنا اۋىستىرۋ ماسەلەسى دە ايتىلدى.
جامبىل وبلىسىندا جول ماسەلەسى دە كۇردەلى. دەگەنمەن, اعىمداعى جىلى جامبىل وبلىسى اۋماعىنداعى 692 شاقىرىم اۆتوموبيل جولدارىن جوندەۋ جوسپارلانۋدا ەكەن. بەردىبەك ساپارباەۆتىڭ ايتۋىنشا, 668 شاقىرىم اۆتوجول ورتاشا جوندەۋدەن ءوتىپ, 6,1 شاقىرىمدىق جول قايتا جاڭارتىلسا, 18 شاقىرىمدىق جاڭا جول سالىنادى. سونداي-اق جولاۋشىلار تاسىمالىنىڭ ساپاسىن ارتتىرۋ ماقساتىندا 100 جاڭا اۆتوبۋس ساتىپ الۋ, ەلەكتروندى بيلەتتەۋ جۇيەسىن ەنگىزۋ دە جوسپارلانعان.
وسى ۋاقىتقا دەيىن تۇرعىندار ءۇشىن اۋىز سۋ ۇلكەن ماسەلە بولىپ كەلدى دەسەك, بيىل 70-تەن استام اۋىل اۋىز سۋمەن قامتاماسىز ەتىلمەك. بۇل تۇرعىنداردى تازا اۋىز سۋمەن قامتاماسىز ەتۋ كورسەتكىشىن 57,3 پايىزدان 77 پايىزعا دەيىن جەتكىزۋگە مۇمكىندىك بەرەدى. سونداي-اق وبلىس اكىمى 48 مىڭ تۇرعىنى بار 35 ەلدى مەكەندى گازداندىرۋ جۇمىسىنىڭ جۇرگىزىلەتىنىن دە جەتكىزدى. سونىمەن قاتار بيىل وبلىس اۋماعىندا بالاما ەنەرگيا كوزدەرىن وندىرەتىن ءتورت ستانسانى ىسكە قوسۋ جوسپارلانىپ وتىر. اعىمداعى جىلى جامبىل وبلىسىندا 14 جاڭا مەكتەپ سالىنىپ, 3 ورىن تاپشىلىعى بار, 1 اپاتتى جانە 1 ءۇش اۋىسىمدى مەكتەپتىڭ ماسەلەلەرىن شەشۋ جوسپارلانۋدا. بيىل 285 مەكتەپ جىلى سانيتارلىق جۇيەلەرمەن جابدىقتالادى. ناتيجەسىندە, بۇل ماسەلە تولىق شەشىلەدى. بارلىق مەكتەپ بەينەباقىلاۋ جۇيەسىمەن قامتىلادى. دەنساۋلىق ساقتاۋ سالاسىندا 18 جەدەل جاردەم كولىگىن ساتىپ الۋ, مەديتسينالىق جابدىقتاۋ دەڭگەيىن 92 پايىزعا جەتكىزۋ, مىندەتتى الەۋمەتتىك مەديتسينالىق ساقتاندىرۋدى ەنگىزۋ بويىنشا جۇمىستى بەلسەندى جالعاستىرۋ جوسپارلانۋدا جانە وڭىردە 91 سپورت الاڭشاسى سالىنادى. 1200-دەن استام جاسقا گرانت بەرىلىپ, جەڭىل اتلەتيكالىق جانە گيمناستيكالىق مانەجدەر قۇرىلىسى باستالادى.
تۇرعىنداردىڭ دەنى نەگىزىنەن تۇرعىن ءۇي, جول سالۋ, اۋىز سۋ, گاز تارتۋ ماسەلەلەرىن ايتتى. شۋ اۋدانىنىڭ تۇرعىنى تۇرسىنباي ابدۋللاەۆ شۋ ۆوكزالىنان كۇنىنە 40 شاقتى پويىزدىڭ وتەتىنىن, الايدا كەلەسى جولعا جەتۋ اسىرەسە قارت كىسىلەر ءۇشىن قيىن ەكەنىن ايتىپ, اكىمنەن وسى ماسەلەنى شەشىپ بەرۋىن سۇرادى. جامبىل اۋدانىنىڭ تۇرعىنى جامبىل بايماحانوۆ جەرلەردى جەكەمەنشىكتەن قايتارىپ الۋ ماسەلەسىن كوتەرسە, مويىنقۇم اۋدانىنان كەلگەن جامبىل اعىباەۆ تالاس گازىنىڭ مويىنقۇم مەن تالاس اۋداندارىنىڭ ورتالىعىنان شىعىپ جاتقانىن, الايدا ءالى كۇنگە دەيىن مويىنقۇم اۋدانىندا كوگىلدىر وتىن جوق ەكەنىن جەتكىزدى. ال بايزاق اۋدانىنىڭ تۇرعىنى ساحا ماناتوۆ بايزاق, مەركى, شۋ اۋداندارىنان 102 شارۋانىڭ قانت قىزىلشاسىنىڭ ماسەلەسىمەن قالاعا كەلگەنىن ايتىپ, قانت قىزىلشاسىن ەگۋشىلەرگە قولداۋ بولسا دەگەن نيەتىن جەتكىزدى. سونىمەن قاتار تاراز قالاسىنىڭ تۇرعىنى دوسجان ناربەكوۆ «كوكتەم» تۇرعىن ءۇي الابىندا 5 جىل بۇرىن جەكە قارجىعا جارىق تارتقانىن, ەندى ونىڭ باعانالارى قۇلاپ جاتقانىن, سۋ دا جوق ەكەنىن جەتكىزدى.
تۇرعىنداردى تىڭداعان ب.ساپارباەۆ كوپشىلىكتىڭ كوتەرگەن ماسەلەسىنە زەردەلەۋ جۇمىستارى جۇرگىزىلەتىنىن, ەشقانداي ماسەلە نازاردان تىس قالمايتىنىن ايتتى. ال كوپشىلىكتىڭ «كوپ بالالى انالارعا باسپانا سالىپ بەرۋ ماسەلەسى جالعاسىن تابا ما؟» دەگەن ساۋالىنا اكىم «كوپ بالالى انالاردى قولداۋ ءۇشىن بۇل جۇمىستاردى جالعاستىرامىز», دەپ جاۋاپ بەردى.
جامبىل وبلىسى
