بۇگىندە قىتايمەن اراداعى شەكارالار جابىلىپ, اۋە, تەمىر جول تاسىمالدارى توقتاتىلعانى ءمالىم. دەگەنمەن, تاسىمال وزگە ەلدەرمەن قالىپتى ءجۇرىپ جاتىر. حالىقارالىق اۋە رەيستەرى قانشالىقتى قاداعالانىپ, جولاۋشىلار سانيتارلىق تەكسەرىستەن ءوتىپ جاتىر؟ وسى ساۋالعا جاۋاپ ىزدەپ دەنساۋلىق ساقتاۋ مينيسترلىگىنىڭ كولىكتەگى تاۋارلار مەن كورسەتىلگەن قىزمەتتىڭ ساپاسى مەن قاۋىپسىزدىگىن باقىلاۋ دەپارتامەنتىنە حابارلاستىق. «مەملەكەتتىك شەكارالاردا, اۋەجايلاردا, تەڭىز پورتتارىندا جانە تەمىر جول وتكىزۋ پۋنكتتەرىندە بايلانىسسىز تەرمومەتريا جۇيەلەرىن قولدانا وتىرىپ, سۇراۋ سالۋ جولىمەن حالىقارالىق رەيستەرمەن كەلگەن ازاماتتارعا سانيتارلىق-كارانتيندىك باقىلاۋ كۇشەيتىلدى. اۋە, تەڭىز كەمەسىنىڭ بورتىندا جانە جولاۋشىلار پويىزىندا كوروناۆيرۋس ينفەكتسياسىنا كۇدىكتى ناۋقاس انىقتالعان كەزدە اۋەجايلاردا, تەڭىز پورتتارىندا جانە تەمىر جول وتكىزۋ پۋنكتتەرىندە ەپيدەمياعا قارسى ءىس-شارالاردى ۇيىمداستىرۋ بويىنشا سانيتارلىق-كارانتيندىك پۋنكتتەردىڭ كەزەكشى ماماندارىنىڭ ءىس-قيمىل الگوريتمدەرى ازىرلەنىپ, بەكىتىلدى. قازاقستاننىڭ باس مەملەكەتتىك سانيتاريالىق دارىگەرىنىڭ 2020 جىلعى 3 اقپانداعى №2 قاۋلىسى بويىنشا بارلىق وتكىزۋ پۋنكتتەرىندە وقۋ-جاتتىعۋ ساباقتارى, ۆەدومستۆولار مەن ۇيىمداردىڭ ماماندارى اراسىندا سەمينارلار وتكىزىلدى. مەملەكەتتىك شەكاراداعى باقىلاۋ ورگاندارىنىڭ قىزمەتكەرلەرىنە كوروناۆيرۋس ينفەكتسياسى تارالۋىنىڭ پروفيلاكتيكاسى جانە الدىن الۋ شارالارى بويىنشا نۇسقاما بەرىلدى. جولاۋشىلار اراسىندا كۆي پروفيلاكتيكاسى بويىنشا داۋىس زورايتقىش بايلانىس ارقىلى جۇرگىزىلۋدە», دەيدى نۇر-سۇلتان قالاسى سانيتارلىق-كارانتيندىك باقىلاۋ ءبولىمىنىڭ باسشىسى ءداريا ازىمباەۆا.
ونىڭ ايتۋىنشا, بارلىق حالىقارالىق رەيستەرمەن كەلگەن جولاۋشىلاردى بورتتان شىعارماستان تەرمومەتريا جۇيەلەرىمەن تۇگەلدەي تەكسەرەدى. ولار 4 تىلدە ارنايى دايىندالعان ساۋالدامانى تولتىرادى. بۇل جولاۋشىلاردىڭ مالىمەتتەرىن تولىق الۋ ءۇشىن كەرەك. ال جولاۋشىلاردىڭ اراسىندا قىتاي ازاماتتارى بولسا, تۇراتىن مەكەن- جايىندا 14 كۇن بويى مەديتسينالىق قاداعالاۋدا بولادى. «قازاقستاننىڭ باس مەملەكەتتىك سانيتاريالىق دارىگەرى ورىنباسارىنىڭ 2020 جىلعى 17 اقپانداعى №5 قاۋلىسى بويىنشا 20 اقپاننان باستاپ قىتاي حالىق رەسپۋبليكاسىنان كەلگەن ادامداردى 14 كۇن بويى وڭىرلىك پروۆيزورلىق ستاتسيوناردا وقشاۋلاي وتىرىپ, كەيىننەن مەديتسينالىق-سانيتاريالىق العاشقى كومەك ۇيىمدارىندا مەديتسينالىق باقىلاۋ ارقىلى تۇرعىلىقتى جەرى بويىنشا شىعارىلعاننان كەيىن 10 كۇن بويى كارانتيندى (كۇن سايىن قوڭىراۋ شالۋ) تەكسەرۋ كوزدەلىپ وتىر. سونىمەن قاتار كوروناۆيرۋستىق ينفەكتسيا تىركەلگەن ەلدەردەن كەلگەن ادامداردى قازاقستاننىڭ شەكاراسىنان وتكەن كۇننەن باستاپ مەديتسينالىق-سانيتاريالىق العاشقى كومەك كورسەتۋ بويىنشا ورتا بۋىندى مەديتسينا قىزمەتكەرىنىڭ ۇيگە كۇندەلىكتى بارۋى ارقىلى 14 كۇن بويى ءۇي كارانتينىن ء(وزىن ءوزى وقشاۋلاۋدى) جانە ودان ءارى 10 كۇن ىشىندە تۇراتىن جەرى بويىنشا مەديتسينالىق باقىلاۋدا (كۇن سايىنعى قوڭىراۋ شالۋ ارقىلى) بولادى», دەيدى د.ازىمباەۆا.
قىتايمەن اراداعى اۋە تاسىمالى توقتاعان 3 اقپاننان باستاپ نۇر-سۇلتان اۋەجايىنا قىتايدىڭ 50 ازاماتى ۇشىپ كەلگەن. ولاردىڭ بارلىعى اۋماقتىق دەپارتامەنتتەرگە مەديتسينالىق باقىلاۋ جۇرگىزۋ ءۇشىن جىبەرىلگەن. قازىرگە دەيىن ولاردىڭ اراسىندا دەنە قىزۋى جوعارى ادامدار بولماعان.
جاقىندا بەيجىڭنەن ءبىر توپ وتانداسىمىز ەلگە ورالدى. ولاردىڭ اراسىندا بەيجىڭدەگى ورتالىق ۇلتتار ۋنيۆەرسيتەتىنىڭ دوكتورانتى, جەرلەسىمىز جۇلدىز بەكباۋوۆا بولدى. «قىتاي استاناسى بەيجىڭگە جينالعان 217 قازاقستاندىق قازاقستان مەن قىتاي ۇكىمەتى, سىرتقى ىستەر مينيسترلىگى جانە قازاقستاننىڭ قىتايداعى ەلشىلىگى قاتارلى مەملەكەتتىك مەكەمەلەردىڭ كىرىسۋىمەن ارنايى بورتپەن 11 اقپان كۇنى نۇر-سۇلتانعا كەلدىك. ءبىز بەيجىڭگە ءتۇرلى قالادان جينالدىق. ارنايى كەستە بولدى. سول بويىنشا ءجۇرىپ-تۇردىق. اۋەجايعا دەيىن ارنايى كولىكپەن باردىق. بورتقا وتىرعانعا دەيىن ەلشىلىك قىزمەتكەرلەرى ءبىزدىڭ قىزمەتىمىزدە بولدى. ۇشاقتا دا ساقتىق شارالارى ەرەكشە جاسالىپتى. بورتسەرىكتەر دە ارنايى كيىم كيگەن. نۇر-سۇلتانعا جەتكەنشە ءبىزدى الىپ قايتۋعا بارعان قازاقستاندىق دارىگەرلەر تەمپەراتۋرامىزدى جارتى ساعات سايىن ولشەپ, جاعدايىمىزدى جەكە-جەكە سۇراپ وتىردى. ماسكالاردى دا ءجيى اۋىستىرىپ تۇردىق. نۇر-سۇلتانعا قونعاننان كەيىن اۋەجايعا كىرگىزگەن جوق. توتەنشە جاعداي كەزىندە شىعاتىن جولمەن شىقتىق. ءبىزدى جەدەل جاردەم قىزمەتكەرلەرى, دارىگەرلەر, ءتارتىپ ساقشىلارىنان قۇرالعان ارنايى توپ قارسى الدى. ءبىزدى ەشكىممەن جاقىنداستىرماعان بويى قالادان 7 شاقىرىم قاشىقتىقتا ورنالاسقان كوپبەيىندى مەديتسينالىق ورتالىق الىپ كەتتى. وندا ءتىزىمىمىز الدىن الا دايىندالعان ەكەن. سول بويىنشا دايىن ورىندارعا ورنالاستىق. مەديتسينالىق قىزمەت ءتيىمدى, جىلدام, ساپالى ۇيىمداستىرىلعان. ءوزىمىزدىڭ زاتتارىمىزدى تۇگەلدەي الىپ قالىپ, دەزينفەكتسيالادى. بارلىعىمىز اناليز تاپسىردىق. باعىمىزعا قاراي كەلگەندەرىمىزدىڭ ەشقايسىسىندا تەمپەراتۋرا كوتەرىلۋ سياقتى بەلگىلەر بولعان جوق. ويتكەنى ءبىزدىڭ بىرەۋىمىز اۋىراتىن بولساق, بارلىعىمىزدى ۇزاق ۋاقىتقا وقشاۋلايتىن ەدى», دەگەن جۇلدىز 3 كۇن وقشاۋلاۋدان كەيىن امان-ەسەن تۋىستارىمەن قاۋىشقانىن ايتىپ قۋاندى.
وسى ورايدا جۇلدىز ءوزىنىڭ ازاماتتىق كوزقاراسىن دا ءبىلدىرۋدى ءجون سانادى. «قازاقستان قىتايدىڭ ەڭ جاقىن كورشىلەرىنىڭ ءبىرى. سوندىقتان ساقتىق شارالارى وتە جوعارى دەڭگەيدە بولۋى كەرەك دەپ ويلايمىن. سولاي بولدى دا. بىزگە كورسەتىلگەن مەديتسينالىق قىزمەتتەردىڭ بارلىعى ساپالى, جوعارى دەڭگەيدە بولعانى قۋانتتى. ۇكىمەتتىڭ قامقورلىعىندا ەكەنىمىزدى, شىنىن ايتساق, جاقسى سەزىندىك. جول شىعىندارى دا ۇكىمەت تاراپىنان تولەندى. شەتەلدە جۇرگەن ازاماتتار وسىنداي قيىن جاعدايدا ءوز ەلىنەن قولداۋ تاپقانى وتە كەرەمەت. سوندىقتان وسى رەتتە ءبىزدىڭ ەلگە جەتۋىمىز ءۇشىن بارىن سالعان قۇزىرلى ورگان قىزمەتكەرلەرىنە راحمەتتەن باسقا ايتارىم جوق», دەيدى ول.
