جاڭا وقۋ جىلىندا 536 ادام نازارباەۆ ۋنيۆەرسيتەتىنىڭ دايىندىق باعدارلاماسىنا (Foundation) ءتۇستى. بۇل تۋرالى جوعارعى وقۋ ورنىنىڭ ءباسپاسوز قىزمەتى حابارلادى.
«2013 جىلى 536 تالاپكەر نازارباەۆ ۋنيۆەرسيتەتىنىڭ ۋنيۆەرسيتەت الدىنداعى باعدارلاماسىنىڭ تىڭداۋشىلارى بولادى. بۇل ۇمىتكەرلەر نازارباەۆ ۋنيۆەرسيتەتىنە وقۋعا قابىلداۋ ەمتيحاندارىنىڭ بارلىعىن ويداعىداي تاپسىردى», - دەلىنگەن حابارلامادا.
مالىمەتكە سۇيەنسەك, قابىلداۋ ەمتيحاندارىن ەڭ تومەنگى وقۋعا ءتۇسۋ تالاپتارىنا ساي تاپسىرعان تالاپكەرلەردىڭ سانى 800 ادامدى قۇراعان. ال وتكەن جىلى مۇنداي تالاپكەرلەردىڭ سانى 600-دەن اسسا, ودان بۇرىنعى جىلى 500-دەن ءسال عانا اسقان ەكەن.
«وقۋعا تۇسۋشىلەر اراسىندا ەڭ تانىمال بولىپ تابىلاتىندار ينجەنەريا مەكتەبى جانە عىلىم جانە تەحنولوگيالار مەكتەبى, بۇل مەكتەپتەردە وقۋعا قابىلدانعانداردىڭ 43%-ى وقيتىن بولادى, تالاپكەرلەردىڭ قالعان 14%-ى گۋمانيتارلىق جانە الەۋمەتتىك عىلىمدار مەكتەبىندەگى ماماندىقتاردى تاڭدادى», - دەلىنگەن ءباسپاسوز پاراقشاسىندا.
وقۋعا قابىلدانعان ۇمىتكەرلەردىڭ كوپ بولىگى استانادان, الماتىدان جانە شىعىس قازاقستان وبلىسىنان كەلگەن. ەڭ از بولعان ماڭعىستاۋ جانە سولتۇستىك قازاقستان وبلىستارىنىڭ وكىلدەرى.
ءتورتىنشى وقۋ جىلى نازارباەۆ ۋنيۆەرسيتەتى ستۋدەنتتەرىنىڭ جالپى سانى 2100-دەن استامدى قۇرايدى. وسى ءبىلىم ورداسىندا Foundation, باكالاۆريات, ماگيستراتۋرا جانە دوكتورانتۋرا باعدارلامالارى بويىنشا 250 وقىتۋشى مەن پروفەسسورلار ءبىلىم بەرەدى.
ساكەن مايلىباي.
