سونىڭ ءبىرى – «بەستەرەك» جوباسىنىڭ اياسىندا مىڭنان استام پەداگوگ-پسيحولوگ كەزەڭ-كەزەڭىمەن دايىندىقتان وتۋدە. دايىندىقتان كەيىن ماماندار «تاۋەكەل توبىنا» جاتاتىن بالالار مەن ولاردىڭ اتا-انالارىمەن تىعىز جۇمىس ىستەپ, قولداۋ كورسەتۋدە.
وسى سىندى ناقتى جۇمىستاردىڭ ناتيجەسىندە وتكەن جىلى سۋيتسيد كورسەتكىشى 32%-عا ازايعان. ال الدىڭعى جىلى وبلىستا 106 سۋيتسيد تىركەلىپ, ونىڭ 41-ءى قايعىلى جاعدايدا اياقتالعان بولاتىن. بۇل دەرەكتەر قوجا احمەت ياساۋي اتىنداعى حقتۋ-دە باستالعان 76 ساعاتتىق تاجىريبەگە باعىتتالعان پيلوتتىق جوبا اياسىنداعى كۋرس بارىسىندا ءمالىم ەتىلدى.
جاسوسپىرىمدەر اراسىنداعى وزىنە قول جۇمساۋ ارەكەتتەرىنىڭ الدىن الۋ, پسيحولوگتاردى تاجىريبەلىك ادىستەمەلەرمەن تانىستىرۋ ماقساتىندا باستالعان جاڭا جوبا وڭىردەگى مەكتەپ ديرەكتورلارى مەن ولاردىڭ تاربيە جونىندەگى ورىنباسارلارى جانە پسيحولوگتاردىڭ باسىن قوستى. ۋنيۆەرسيتەت عالىمدارى مەن وبلىستىق ادامي الەۋەتتى دامىتۋ باسقارماسىنىڭ باسشىلىعى, پروكۋراتۋرا وكىلدەرى دە قاتىستى. كۋرس بارىسىندا ۇستازدار 2 اپتا بويى الەمدىك تاجىريبەگە باعىتتالعان پسيحولوگيالىق امالدارمەن تانىسادى. جينالعان ماماندار مەن ساراپشىلار وسى باعىتتاعى عىلىمي تاجىريبەلەرىمەن بولىسەدى.
