حوككەي • 15 اقپان، 2020

قحل: «بارىس» جەڭىسكە جەتتى

220 رەتكورسەتىلدى

قۇرلىقتىق حوككەي ليگاسىندا وينايتىن ەلوردالىق «بارىس» «سوچي» كلۋبىن قابىلدادى. «بارىس ارەنا» ستاديونىندا وتكەن تارتىستى باسەكەدە جەرلەستەرىمىز قارسىلاستان باسىم ءتۇستى. ويىن 3-2 ەسەبىمەن اياقتالدى.

ويىن باستالا سالىسىمەن قاۋىپتى شابۋىلمەن ءبىرىن-ءبىرى الما كەزەك مازالاعان كوماندالار ەسەپتى اشا الماي اۋرەگە ءتۇستى. تەك ءبىرىنشى كەزەڭنىڭ اياقتالۋىنا 2 مينۋت ۋاقىت قالعاندا «بارىس» حوككەيشىسى انتون ساگادەەۆ ەسەپتى اشتى. بۇل ونىڭ وسى ماۋسىمدا سوققان 7-شايباسى.

ەكىنشى كەزەڭدە دە ءدال وسىعان ۇقساس جاعداي بولدى. تورەشى ىسقىرىعى شالىنا سالىسىمەن 2 مينۋتتان كەيىن «بارىستىڭ» 14-نومەردەگى ويىنشىسى كيورتيس ۆولك سوققان شايبى قارسىلاس كوماندانىڭ قاقپا باعاناسىنا ءتيىپ، كەرى سەرپىلدى. سوعان قاراماستان شابۋىلشى مۇمكىندىگىن ءتيىمدى پايدالانىپ، شايبانى قاقپاعا توعىتىپ ۇلگەردى. بۇعان مۇز ايدىنداعى تورەشىلەر كۇمانمەن قاراعانداي بولدى. دەسە دە ويىن بارىسىن قايتالاپ كورگەن تورەشىلەر سوققىنى ناتيجەلى دەپ ۇيعارىم جاسادى. وسىلايشا «بارىس» ەسەپتى ەسەلەپ كەتتى. ەكىنشى كەزەڭنىڭ اياقتالۋىنا 6 مينۋت قالعاندا قوناقتاردىڭ ءبىر ويىنشىسى تارتىپسىزدىگى ءۇشىن ەسكەرتۋ الىپ، ەكى مينۋتقا ويىننان شەتتەتىلدى. بۇل – ەلدوردالىق كلۋب ءۇشىن ەسەپتى ارتتىرۋعا ۇلكەن مۇمكىندىك ەدى. بىراق ءبارى ءبىز ويلاعانداي بولمادى. ارىپتەسىنىڭ پاسىنان كەيىن، «بارىس» قاقپاشىسىنا قاراي ۇمتىلعان «سوچي» حوككەي كلۋبىنىڭ 93-نومەردەگى ويىنشىسى سەرگەي شميلەوۆ ەسەپتى قىسقارتتى. تابلودا ەسەپ – 2-1. 

العاشقى ەكى كەزەڭدە جەرلەستەرىمىز ويىننىڭ باسىم بولىگىن شابۋىلدا وتكىزدى. 

ال ويىننىڭ ءۇشىنشى كەزەڭى باستالعانىنا كوپ وتپەسە دە، قوناقتار تارازى باسىن قايتا تەڭەستىردى. بۇل جولى «بارىس» قاقپاشىسىن قارسىلاس كوماندا ساپىنان مالتە ستريومۆالل قاپى قالدىردى. كوپ ۇزاماي «بارىس» شابۋىلدى ۇدەتە ءتۇستى. ناتيجەسىندە دجەسسي بلەكەردىڭ پاسىن ءساتتى پايدالانعان 95-نومەردەگى ويىنشى دميتري شەۆچەنكو ەسەپتى وزگەرتتى. «بارىس» - قايتادان الدا. «سوچي» حوككەيشىلەرى ادۋىندى شابۋىلدار ۇيىمداستىرعانمەن ناتيجەلى ۇپاي الا المادى. سوڭعى كەزەڭنىڭ سوڭعى سەكۋندتارىنا دەيىن بارىن سالعان سوچيلىكتەر ۇيلەرىنە قۇر سۇلدەرى قايتتى. «بارىس» جەڭىسكە لايىق ويىن ورنەگىن كورسەتتى. 

ايتا كەتەيىك، «بارىس» كەلەسى ويىنىن 18 اقپان كۇنى «بارىس ارەنا» ستاديونىندا «سيبير» حوككەي كلۋبىنا قارسى وتكىزەدى.

سوڭعى جاڭالىقتار

ەرلىكتى دارىپتەيتىن قوماقتى قور

رۋحانيات • بۇگىن، 20:12

ەكى قىلمىستىق توپ ۇستالدى

ايماقتار • بۇگىن، 17:45

بالالار ۇيىندەگى ىزگىلىك شاراسى

ايماقتار • بۇگىن، 15:47

ەلتاڭبا تاريحى تالقىلاندى

رۋحانيات • بۇگىن، 14:54

ۇقساس جاڭالىقتار