ايماقتار • 15 اقپان، 2020

جىلىنا 500 مىڭ باس ءىرى قارا ەتىن وڭدەيتىن ەت كومبيناتى سالىنۋى مۇمكىن

69 رەتكورسەتىلدى

الماتى وبلىسىندا جىلىنا 500 مىڭ باس ءىرى قارا ەتىن وڭدەيتىن، شامامەن 20 مىڭ جۇمىس ورنىن قۇراتىن، قۇنى 300 ملن. اقش دوللارى بولاتىن ەت كومبيناتى سالىنۋى مۇمكىن. بۇل تۋرالى وبلىس اكىمى اماندىق باتالوۆتىڭ امەريكالىق ترانسۇلتتىق «Tyson Foods» كومپانياسى مەن ولاردىڭ قازاقستانداعى سەرىكتەسى وندىرىستىك-ينۆەستيتسيالىق «Kusto Group» كومپانياسىنىڭ وكىلدەرىمەن كەزدەسۋى بارىسىندا بەلگىلى بولدى. كەزدەسۋدە اتالعان جوبانى وڭىردە جۇزەگە اسىرۋدىڭ جولدارى مەن مۇمكىندىكتەرى تالقىلاندى، - دەپ حابارلايدى الماتى وبلىسى اكىمىنىڭ ءباسپاسوز قىزمەتى.

الەۋەتتى ينۆەستورلاردى جىلى قارسى العان اماندىق باتالوۆ، ولارعا الماتى وبلىسىنىڭ الەۋمەتتىك-ەكونوميكالىق دامۋىنىڭ نەگىزگى باعىتتارى، سونىڭ ىشىندە ينۆەستيتسيالىق مۇمكىندىكتەرى، ترانسۇلتتىق كومپانيالارمەن بىرگە جۇزەگە اسىرىلىپ جاتقان جوبالار جايلى اڭگىمەلەپ بەردى. سول سياقتى وبلىس اكىمى ينۆەستورلارعا بارلىق قاجەتتى قولداۋلار جاسالاتىنىن، وڭىردە ينۆەستيتسيالىق كليماتتىڭ قولايلى ەكەنىن دە ايتتى. سول سياقتى «الماتى وبلىسىنىڭ وڭىرلىك دامۋ ورتالىعى» جشس ديرەكتورى تامەرلان رازبەكوۆ كورسەتكەن وبلىس جايلى بەينەتانىستىرىلىمنان دا قوناقتار ءبىرشاما مالىمەت الدى. 

ينۆەستورلار اتىنان سيىر ەتىن وندىرەتىن «Tyson Foods Inc» كاسىپورنىنىڭ اعا ۆيتسە-پرەزيدەنتى، باس ديرەكتور شەين ميللەر ءسوز الىپ، ەڭ الدىمەن جىلى قابىلداۋ ءۇشىن جانە جوبانى جۇزەگە اسىرۋعا قاجەتتى مالىمەتتەردى كوپ بەرگەن وسى كەزدەسۋ ءۇشىن العىسىن ءبىلدىردى.

ونىڭ ايتۋىنشا، «Tyson Foods» كومپانياسىنىڭ اينالىمى وتكەن جىلى 42 ملرد. اقش دوللارىنا جەتكەن. كومپانيا 4 باعىتقا ماماندانعان، سونىڭ ەڭ ءىرىسى - سيىر ەتىن وڭدەۋ. كومپانيادا 140 مىڭعا جۋىق قىزمەتكەر ىستەسە، ونىڭ 38 مىڭى – ەت باعىتىندا جۇمىس ىستەيدى.

اقش-تا كومپانيانىڭ 6 ەت كومبيناتى بار، ولاردا جىلىنا 7،5 ملن. باس ءىرى قارا وڭدەلەدى. ونىمدەرى الەمنىڭ 80 ەلىنە شىعارىلادى.

كومپانيانىڭ الماتى وبلىسىندا سالۋعا نيەتتەنىپ وتىرعان زاۋىتى كۇنىنە 2 مىڭ باس ءىرى قارا وڭدەيتىن قۋاتتىلىقتا بولماق. تولىق قۋاتىنا شىققاندا كاسىپورىن جىلىنا 500 مىڭ باس ءىرى قارا وڭدەي الادى. زاۋىت ەكى اۋىسىممەن جۇمىس ىستەيدى، 4 مىڭعا دەيىن جاڭا جۇمىس ورنىن قۇرادى. كاسىپورىن جۇمىسىمەن جالعاسا جۇرەتىن بيزنەستى قوسا العاندا جالپى سانى 20 مىڭعا دەيىن جاڭا جۇمىس ورىندارىن قۇرۋ مۇمكىندىگى بار. جوبانىڭ جالپى قۇنى 300 ملن. اقش دوللارىنا باعالانىپ وتىر.

شەين ميللەر كومپانيانىڭ ءىرى شارۋاشىلىقتارمەن قاتار، شاعىن شارۋا قوجالىقتارىمەن دە بىرىگىپ جۇمىس ىستەۋگە دايىن ەكەندىگىن ايتتى.

جوبانىڭ ءمان-مازمۇنىنا «Kusto Group» كومپانياسى ديرەكتورلار كەڭەسىنىڭ توراعاسى ەركىن تاتيشەۆ تە توقتالىپ، ءوڭىردىڭ مال شارۋاشىلىعىنىڭ الەۋەتى وسى ماڭىزدى ينۆەستيتسيالىق جوبانى ءساتتى جۇزەگە اسىرۋعا مۇمكىندىك بەرەتىنىن ايتتى.

كەزدەسۋدى قورىتىندىلاعان اماندىق باتالوۆ:

- ەلباسى مەن پرەزيدەنتىمىز قاسىم-جومارت توقاەۆتىڭ ماڭىزدى تاپسىرمالارىنىڭ ءبىرى - ەكسپورتقا باعىتتالعان وڭدەۋ كاسىپورنىن اشۋ، جاڭا جۇمىس ورىندارىن قۇرىپ، ينۆەستيتسيا تارتۋ. بۇل باعىتتا ءبىز جۇيەلى جۇمىس جاساپ كەلەمىز. بۇعان دەيىن ايتقانىمداي، ەلىمىزدە ترانسۇلتتىق كومپانيالاردىڭ قاتىسۋىمەن جۇزەگە اسىرىلىپ جاتقان 19 جوبانىڭ 9-ى - ءبىزدىڭ وبلىستا. ەت وڭدەۋ سالاسىن دامىتۋ - باستى باعىتتارىمىزدىڭ ءبىرى. سوندىقتان بۇگىنگى ءسوز بولىپ وتىرعان جوبانىڭ ءىس جۇزىندە ورىندالۋى ءبىز ءۇشىن اسا ماڭىزدى. ءبىز ءوز تاراپىمىزدان بارلىق قاجەتتى قولداۋلاردى كورسەتەمىز. بيزنەستى قولداۋعا باعىتتالعان مەملەكەتتىك باعدارلامالاردىڭ ارقاسىندا بىزدە وعان بارلىق مۇمكىندىك بار. كادر دايارلاۋ ىسىنە دە كومەكتەسەمىز. قاجەتتى ماماندىقتارعا كادرلاردى بيۋدجەت ەسەبىنەن وقىتۋعا جاردەم جاساي الامىز. مەنىڭ ارىپتەستەرىم سىزدەرگە كومبيناتتى سالۋعا بولاتىن ورىنداردى كورسەتەدى. ارينە، تالدىقورعاندا سونداي ءىرى ءوندىرىس اشىلسا كەرەمەت بولار ەدى. جالپى ءبىز سىزدەرگە كوپتەگەن ۆاريانتتاردى ۇسىنا الامىز، سونىڭ ىشىندە الماتى وڭىرىنەن دە قاراستىرۋعا بولادى، - دەگەن ا.باتالوۆ ءوز ورىنباسارلارىنا جوبانىڭ ەگجەي-تەگجەيىن ناقتىلاپ، ونى جۇزەگە اسىرۋ جۇمىستارىمەن اينالىسۋدى تاپسىردى.

امەريكالىق كومپانيانىڭ وكىلدەرى جەرگىلىكتى كادرلاردى اقش-تا جۇمىس ىستەپ تۇرعان وندىرىستەرىنىڭ بازاسىندا وقىتۋعا ءازىر ەكەندىكتەرىن ايتتى.

كەزدەسۋ سوڭىندا اماندىق باتالوۆ ەت وڭدەۋ كاسىپورنى «Tyson Foods Inc» كومپانياسىنىڭ اعا ۆيتسە-پرەزيدەنتى، باس ديرەكتور شەين ميللەرگە جەتىسۋ تۋرالى فوتوسۋرەتتەر كىتابى مەن كارتينا سىيعا تارتتى.

كەزدەسۋگە قر اۋىل شارۋاشىلىعىنىڭ ۆيتسە-ءمينيسترى گۇلميرا يساەۆا، وڭىردەگى 11 ءىرى شارۋا قوجالىقتارىنىڭ باسشىلارى، سونىڭ ىشىندە «جاقسىلىق»، «حيلنيچەنكو جانە ك» شق-لارى، «Dinara - Rance»، «بايسەركە اگرو»، «MPS»، «كازمياسو» جشس جانە تاعى باسقالارى قاتىستى.

سوڭعى جاڭالىقتار

بەنزين باعاسى ارزاندادى

ەكونوميكا • كەشە

14 وتباسىعا قول ۇشىن سوزدى

قازاقستان • كەشە

ۇقساس جاڭالىقتار