تاراپتار قازاقستان مەن كانادا اراسىنداعى ساۋدا-ەكونوميكالىق, ينۆەستيتسيالىق جانە مادەني-گۋمانيتارلىق ىنتىماقتاستىقتىڭ قازىرگى احۋالى مەن پەرسپەكتيۆالارىن تالقىلاپ, حالىقارالىق ۇيىمدار اياسىنداعى ىقپالداستىقتى قاراستىردى, سونداي-اق, حالىقارالىق كۇن تارتىبىندەگى وزەكتى ماسەلەلەر بويىنشا پىكىر الماستى.
قاسىم-جومارت توقاەۆ دجاستين تريۋدوعا ءىلتيپات ءبىلدىرىپ, ەكونوميكا, ينۆەستيتسيا تارتۋ, اۋىل شارۋاشىلىعى جانە تەحنولوگيا سالالارىنداعى ەكىجاقتى قاتىناستاردى ودان ءارى دامىتۋدىڭ ماڭىزدىلىعىن اتاپ ءوتتى.
– ءبىز كانادامەن تىعىز قارىم-قاتىناس ورناتتىق. ىنتىماقتاستىعىمىزدىڭ قازىرگى دەڭگەيىن جوعارى باعالايمىز. ەلدەرىمىز اراسىنداعى ءوزارا ىقپالداستىقتىڭ اياسىن ودان ءارى كەڭەيتە تۇسەمىز دەپ ۇمىتتەنەمىز, – دەدى قازاقستان پرەزيدەنتى.
مەملەكەت باسشىسى ۋران سالاسىنداعى كانادالىق «Cameco» كومپانياسىنىڭ جۇمىسىنا وڭ باعا بەرىپ, كانادا بيزنەسىنە قاجەتتى بارلىق جاعدايدى جاساۋدى جالعاستىرا بەرۋگە دايىن ەكەنىن راستادى.
دجاستين تريۋدو كەزدەسۋگە مۇمكىندىك تۋعىزعانى ءۇشىن قازاقستان پرەزيدەنتىنە العىس ءبىلدىرىپ, ەكى مەملەكەت اراسىنداعى كوپجىلدىق دوستىق پەن سەرىكتەستىككە توقتالدى.
– ەكى ەل اراسىنداعى ەكونوميكالىق ىنتىماقتاستىقتا كوپتەگەن ورتاقتىق بار. ءبىز ەنەرگەتيكا سالاسىنداعى بىرقاتار جوبا بويىنشا ىقپالداستىق ورناتتىق. كووپەراتسيالارىمىزدى ودان ءارى نىعايتۋعا نيەتتىمىز, – دەدى كانادانىڭ پرەمەر-ءمينيسترى.
كانادا ۇكىمەتىنىڭ باسشىسى ساياسي جانە ەكونوميكالىق رەفورمالاردى جۇزەگە اسىرۋ جونىندەگى قازاقستان پرەزيدەنتىنىڭ كۇش-جىگەرىن جوعارى باعالاپ, ازاماتتىق قوعام مەن دەموكراتيانى دامىتۋ سالاسىنا قولداۋ كورسەتۋگە دايىن ەكەنىن جەتكىزدى.
كەزدەسۋ سوڭىندا قاسىم-جومارت توقاەۆ پەن دجاستين تريۋدو ءبىر-ءبىرىن ءوزارا ساپار الماسۋعا شاقىردى.
