اقتاۋ قالاسىندا تۇراتىن ونەرتاپقىش ءساتتىباي دۇيسەنباەۆ ولشەۋسىز مولشەردە ەلەكتر قۋاتىن ءوندىرىپ بەرۋگە قابىلەتتى ماڭگىلىك دۆيگاتەلدى ويلاپ تاپقانىن جاريالاپ وتىر. بۇل تۋرالى «تۋمبا» ينتەرنەت-پورتالى حابارلادى.
جاڭا دۆيگاتەلدىڭ جۇمىسى ءۇشىن ماشينە مايى بولسا جەتىپ جاتىر.
«دۆيگاتەل ەكى قالاقشا ورنالاسقان ۆالدان قۇرالعان. ولار وزدەرىنىڭ جەكە سالماقتارىنىڭ اسەرىنەن قوزعالادى. ۆالدا سونداي-اق بەرىلىس قوراپشاسىن اينالدىراتىن شىنجىر بەكىتىلگەن شەستەرنيالار بار. قۇرىلعى توك وندىرەتىن گەنەراتورعا جالعانعان», - دەپ سۋرەتتەيدى ونەرتاپقىش ءوزىنىڭ بۇيىمىن.
مۇراتتى جاننىڭ سوزىنە قاراعاندا, ماڭگى دۆيگاتەلدىڭ جۇمىس قاعيداتى كادىمگى مۇناي ايدايتىن تەڭسەلمە قاۋعالاردىڭ تىرلىگىنە كەلىڭكىرەيدى ەكەن.
اپپاراتتىڭ شىعىنى دا ايتارلىقتاي از. «مەن ەسەپتەپ كوردىم, ونى دايىنداپ شىعۋ ءۇشىن 750 مىڭ تەڭگە عانا كەرەك. كەيىن مۇنى وسىنىڭ دا جارتىسىنا ىستەپ بەرۋگە ۋادە ەتكەن كىسىلەر تابىلدى. ال مەنىڭ وزىمدە مۇنداي اقشا جوق. وكىنىشتى», - دەدى دۇيسەنباەۆ.
الايدا, جەرگىلىكتى بيلىك ماڭگىلىك ماشينەنى جاساپ شىعۋعا كومەككە كەلۋگە اسىعار ەمەس. ونەرتاپقىشتىڭ ويىن جۇزەگە اسىرۋعا ىنتىق دەمەۋشىلەر دە كورىنىپ تۇرعان جوق.
سۇلتان بوزايعىر.
