ءوڭىر تۇرعىندارىن جۇمىسپەن قامتۋ ماقساتىنداعى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلامالارمەن 96 مىڭعا جۋىق ادام قامتىلىپ, جوسپار 20,6%-عا ارتىعىمەن ورىندالعان. «وسى باعدارلاما اياسىندا ءبىرىنشى رەت ءوز ءىسىن اشۋعا نيەت بىلدىرگەن 8 مىڭعا جۋىق ازاماتقا 200 ايلىق ەسەپتىك كورسەتكىش مولشەرىندە مەملەكەتتىك گرانت ۇسىنىلىپ, جەكە ءىسىن اشۋعا مۇمكىندىك بەرىلدى», دەدى وبلىس اكىمى.
سونداي-اق بىلتىر از قامتىلعان وتباسىلاردى الەۋمەتتىك قولداۋ بويىنشا اۋقىمدى جۇمىس جۇرگىزىلگەن. اتاۋلى الەۋمەتتىك كومەككە 70ملرد تەڭگەدەن استام قاراجات بولىنگەن. بۇل سوما وزگە جىلدارمەن سالىستىرعاندا اناعۇرلىم قوماقتى. سونىڭ ناتيجەسىندە وبلىس حالقىنىڭ ۇشتەن ءبىر بولىگى نەمەسە ءار وتباسى ورتا ەسەپپەن ايىنا 100-120 مىڭ تەڭگە كولەمىندە الەۋمەتتىك كومەكپەن قامتىلعان. «كومەك الۋشىلاردىڭ 60 پايىزى كوپبالالى وتباسىلار ساناتىنان. وسىنداي قولداۋدىڭ ارقاسىندا 6 690 وتباسى الەۋمەتتىك كومەك ەسەبىنەن ءوز ءىسىن اشۋعا جانە ءوز تابىسىن ارتتىرۋعا مۇمكىندىك الىپ, 43 مىڭ جۇمىسسىز ازامات اتاۋلى الەۋمەتتىك كومەك اياسىندا جۇمىسپەن قامتىلدى», دەدى ومىرزاق شوكەەۆ.
بيىلعى جىلى الەۋمەتتىك قولداۋدا ەلەۋلى وزگەرىستەر ەنگىزىلگەنى ءمالىم. قازىردىڭ وزىندە جاڭا وزگەرىستەر بويىنشا 100 مىڭنان استام وتباسى جاردەماقى العان.
ايتا كەتەيىك, تۇركىستان وبلىسىنىڭ اكىمى ومىرزاق شوكەەۆ 2019 جىلدىڭ قورىتىندىسى بويىنشا حالىق الدىندا ەسەپ بەرۋ كەزدەسۋى ءوتىپ جاتقانىن حابارلاعان بولاتىنبىز.
