اۋىلعا بارعان جاستاردىڭ 2409-ى ءبىلىم, 922-ءسى دەنساۋلىق ساقتاۋ, 56-سى اۋىل شارۋاشىلىعى جانە سپورت, 101-ءى مادەنيەت, 41-ءى الەۋمەتتىك قامسىزداندىرۋ سالالارىنا جۇمىسقا ورنالاسىپتى. سونىمەن قاتار جاستارعا 100 اەك نەمەسە 252,5 مىڭ تەڭگە كوتەرمە جاردەماقى, تۇرعىن ءۇي ساتىپ الۋ ءۇشىن الەۋمەتتىك قولداۋعا 1500 ەسەپتىك ايلىق ەسەپتىك كورسەتكىشتەن اسپايتىن سومادا بيۋدجەتتىك كرەديت بەرىلەتىنى دە بەلگىلى. دەمەك, ولارعا مەملەكەت تاراپىنان بەلگىلى ءبىر مولشەردە (بالكىم, جەتكىلىكتى, بالكىم, جەتكىلىكسىز) جاعداي جاسالىپ وتىر.
ءۇش جىلدان سوڭ قايتىپ كەتەدى
وسى ورايدا مىناداي ساۋالدار تۋىندايدى. مەملەكەت ارنايى قارجى قاراستىرىپ, اۋىلعا جىبەرگەن جاس ماماندار ارتقان سەنىمدى اقتاپ, بارعان جەرىنە تاستاي باتىپ, سۋداي ءسىڭىپ جاتىر ما؟ ەڭسەسى تۇسكەن اۋىلداردىڭ كوگەرىپ, كوركەيۋىنە قانشالىقتى ۇلەس قوستى؟ الدە كەسىمدى مەرزىمدەرىن وتكەرىپ, كەلگەن ىزدەرىمەن كەرى قايتىپ جاتىر ما؟ وكىنىشكە قاراي, سوڭعى كەزدەرى «ديپلوممەن – اۋىلعا!» باعدارلاماسىمەن كەلگەن جاستاردىڭ ءۇش جىل مەرزىمى بىتە سالىسىمەن اۋىلدا تۇراقتاماي قايتادان قالاعا قايتىپ كەتەتىنى جايىندا ءجيى ايتىلىپ ءجۇر. ارينە, بۇعان سەبەپ تە جوق ەمەس. ماسەلەن, وبلىس ورتالىعىنان شالعايدا ورنالاسقان كۇرشىم, كاتونقاراعاي, تارباعاتاي اۋداندارى جانە ابىرالى, شۇبارتاۋ سەكىلدى بۇرىنعى اۋدان ورتالىقتارى اۋىلدارىنىڭ كوپشىلىگىندە ينتەرنەت جوقتىڭ قاسى. بار بولعاننىڭ وزىندە تاسباقانىڭ تىربىڭىنداي وتە باياۋ. ينفراقۇرىلىمنىڭ جوقتىعى, جولدىڭ ناشارلىعى, قىستىڭ قيىندىعى – ءوز الدىنا بولەك اڭگىمە. مۇنداي اۋىلداردا جاستار قايدان تۇراقتاسىن؟ «اۋىلعا كەلگەن جاس مامانداردىڭ كوپشىلىگى ءۇش جىل مەرزىمى وتكەن سوڭ قالاعا كوشىپ جاتقانى جاسىرىن ەمەس. وسىنىڭ سالدارىنان اۋداندا, اسىرەسە مۇعالىمدەردىڭ تاپشىلىعى سەزىلەدى. بۇگىندە كاتونقاراعاي اۋدانىنا فيزيكا, ماتەماتيكا, اعىلشىن, ورىس ءتىلى پاندەرىنىڭ مۇعالىمدەرى قاجەت (21 مامان)», دەيدى كاتونقاراعاي اۋداندىق ءبىلىم بەرۋ, دەنە شىنىقتىرۋ جانە سپورت ءبولىمىنىڭ باسشىسى عاليا كوشەنوۆا.
كاتونقاراعايمەن ىرگەلەس ورنالاسقان, تاعدىر-تالايى ۇقساس, التى اي قاقاعان قىسى بار مارقاكول-كۇرشىم وڭىرىندە دە وسى كەپ. كۇرشىم اۋداندىق ءبىلىم ءبولىمىنىڭ باسشىسى باۋىرجان ەلەۋباەۆپەن سويلەسكەنىمىزدە «ديپلوممەن – اۋىلعا!» باعدارلاماسىمەن نەگىزىنەن اۋداننىڭ تۋمالارى عانا كەلەتىنىن, سىرتتان كەلۋشىلەردىڭ سيرەك ەكەندىگىن ايتتى. ء«بىزدىڭ اۋداندا مەكتەپتەردىڭ كوپشىلىگى, ياعني 83 پايىزى شاعىن كومپلەكتىلى. بۇل مەكتەپتەردە بالا سانىنىڭ ازدىعىنا بايلانىستى سىنىپتار قوسىلىپ وقىتىلادى. ساعات سانى دا از بولادى. جاستاردىڭ تۇراقتاماۋىنىڭ ءبىر سەبەبى وسى دەپ ويلايمىن. جاس ماماندار كەلمەگەن سوڭ زەينەت جاسىنداعى مۇعالىمدەرمەن كەلىسىمشارت جاساسامىز. باسقا امالىمىز دا جوق. قازىر اۋداندا 16 زەينەتكەر مۇعالىم كەلىسىمشارتپەن جۇمىس ىستەپ جاتىر. بۇل بىزگە 16 جاس ماماننىڭ قاجەت ەكەندىگىن كورسەتەدى. اعىلشىن, ورىس ءتىلى جانە ورىس ادەبيەتى, قازاقستان تاريحى, گەوگرافيا, فيزيكا, ماتەماتيكا, حيميا-بيولوگيا, قازاق ءتىلى جانە قازاق ادەبيەتى, ينفورماتيكا پاندەرىنە جاس ماماندار كەرەك» دەگەن ول بۇگىندە كۇرشىم اۋدانىندا ۇزىن-سانى 820 مۇعالىم جۇمىس ىستەيتىنىن, ونىڭ 93-ءى جاس مامان (11 پايىز) ەكەندىگىن جەتكىزدى.
شىعىس قازاقستان وبلىسى
