كۇنى كەشە جەتىساي اۋدانىنداعى اعىنساي جانە ۇتىرتوبە اۋىلىنىڭ 300-گە جۋىق وتباسى كوپتەن كۇتكەن «كوگىلدىر وتىنعا» قول جەتكىزدى. اۋداندىق تۇرعىن ءۇي, كوممۋنالدى-شارۋاشىلىق ءبولىمى قىزمەتكەرلەرىنىڭ مالىمەتىنشە, الداعى ۋاقىتتا ج.ەراليەۆ اۋىلدىق وكرۋگىنە قاراستى كوكتوبە اۋىلىنا دا گاز بەرۋ جۇمىستارى جۇرگىزىلىپ جاتىر.
سونداي-اق تولەبي اۋدانىنداعى 9 ەلدى مەكەنگە تابيعي گاز بەرىلە باستادى. تۇركىستان وبلىسى اكىمىنىڭ ورىنباسارى مەيىرجان مىرزاليەۆ پەن اۋدان اكىمى باۋىرجان وماربەكوۆ ەلدى مەكەندەردە بولىپ, تۇرعىنداردىڭ قۋانىشىنا ورتاقتاستى. رەسپۋبليكالىق بيۋدجەت ەسەبىنەن 1 ملرد 988 ملن تەڭگەگە تاسارىق اۋىلدىق وكرۋگىندەگى تاسارىق, جامبىل, حانارىق, وڭتۇستىك جانە قاراتوبە اۋىلدىق وكرۋگىندەگى مايبۇلاق, قوستوبە, قاراتوبە, بالدىبەرەك, توڭكەرىس ەلدى مەكەندەرىنە گاز قۇبىرىنىڭ قۇرىلىسى 2017-2019 جىلدار ارالىعىندا جۇرگىزىلگەن بولاتىن. بۇگىندە 9 ەلدى مەكەن بويىنشا 1542 ابونەنتتىڭ 793-ىنە تەحنيكالىق شارتتار الىنىپ, ىشكى گاز قۇبىرلارى جۇرگىزىلگەن. كۇنى كەشە پايدالانۋعا بەرىلگەن گاز جۇيەسىن قوسقاندا, اۋدان كولەمىندەگى 55 ەلدى مەكەننىڭ 48-ءى تابيعي گاز جۇيەسىمەن قامتىلماق.
«اۋداندا قوعالى جانە قاسقاسۋ اۋىلدىق وكرۋگتەرىنىڭ 7 ەلدى مەكەنىن تابيعي گازبەن قامتاماسىز ەتۋ ءۇشىن جوبالاۋ-سمەتالىق قۇجاتتاماسى ازىرلەنىپ, ساراپتامانىڭ وڭ قورىتىندىسى الىندى. سمەتالىق قۇنى 1,269 ملرد تەڭگەنى قۇرايدى. جوبانى قارجىلاندىرۋ ءۇشىن 2020 جىلعا ارنالعان رەسپۋبليكالىق جانە وبلىستىق بيۋدجەتكە ۇسىنىلىپ, قارجىلاندىرۋ كۇتىلۋدە. جوبا قاناعاتتاندىرىلعان جاعدايدا تولەبي اۋدانىنىڭ 55 ەلدى مەكەنىنىڭ 118 600 تۇرعىنى 100% تابيعي گازبەن قامتاماسىز ەتىلەتىن بولادى», - دەيدى اۋداننىڭ گازعا جاۋاپتى ماماندارى.
دەگەنمەن, وبلىستاعى كەي اۋىل تۇرعىندارى گاز جەتكىزىلگەنىمەن, ۇيلەرگە «كوگىلدىر وتىن» بەرىلمەي وتىرعانىن ايتۋدا. اۋىلعا گاز جەتكىزىلگەن, ۇيدە جوق. بۇل ماسەلە تۇرعىندار مەن «قازترانسگازايماق» اق-ى اراسىندا جۇرگىزىلەتىن قارجىلىق-تەحنيكالىق جۇمىستاردىڭ باياۋلىعىنان نەمەسە ءبىر جۇيەگە قويىلماعانىنان تۋىنداپ وتىرعانىن ايتۋشىلار كوپ. ياعني جەرگىلىكتى اكىمدەر اۋىلدارعا گاز جەتكىزىپ, مىندەتىنەن قۇتىلدى, ەندىگى ماسەلە جاۋاپتى مەكەمە مەن تۇرعىنداردىڭ وزدەرىنە بايلانىستى بولىپ وتىر.
