جالپى العاندا, حالىقتىڭ تولعانىس-تەبىرەنىسى, قايعى-مۇڭى قوعامنىڭ ءاربىر ازاماتىن بەيجاي قالدىرمايتىنىنا سەنىمدىمىن. پرەزيدەنت ق.توقاەۆتىڭ تاپسىرماسىمەن قۇرىلعان ۇكىمەت كوميسسياسىنىڭ توراعاسى, پرەمەر-ءمينيستردىڭ ورىنباسارى ب.ساپارباەۆ (بۇگىنگى كۇنى جامبىل وبلىسىنىڭ اكىمى) جانە ا.مىرزاحمەتوۆ (جامبىل وبلىسىنىڭ ەكس-اكىمى) كوميسسيا مۇشەلەرىمەن بىرگە قورداي, قاراسۋ, اۋقاتتى, سورتوبە شەكارا باقىلاۋ-وتكىزۋ بەكەتتەرىندە بولدى. سوندا ەلىمىزگە قىرعىزستاننان قايتا ورالىپ جاتقان ادامداردىن ۇزاق-سونار لەگىنە كۋا بولدىق.
بۇل, ارينە قاقتىعىس ورىن العان اۋىلداردا تىنىشتىق ورناپ, قالىپتى تىرشىلىك قايتا باستالعانىنىڭ باستى بەلگىسى ەدى. بۇگىنگى تاڭدا اۋىلدارداعى بارلىق الەۋمەتتىك نىسان, ساۋدا ورىندارى مەن ءدارىحانالار قالىپتى جۇمىس ىستەۋدە. وڭىردە جاعداي تۇراقتى, باقىلاۋدا. كوميسسيا مۇشەلەرى قورداي اۋدانىنداعى قاقتىعىس كەزىندە قايتىس بولعان ازاماتتاردىڭ وتباسىلارىندا بولىپ, كوڭىل ايتىپ شىقتى.
ب.ساپارباەۆ ءوز سوزىندە وتباسى مۇشەلەرىنە قاۋىپسىزدىكتىڭ قامتاماسىز ەتىلگەنىن, مەملەكەت تاراپىنان ءتيىستى قولداۋ كورسەتىلەتىنىن باسا ايتتى. سونىمەن بىرگە كوميسسيا مۇشەلەرى قايتىس بولعانداردىڭ جەرلەۋ راسىمىنە دە قاتىسىپ, اۋىل تۇرعىندارىمەن كەزدەستى. باسقا دا اتقارىلعان ءىس-شارالار بارىسى تۋرالى بۇقارالىق اقپارات قۇرالدارىندا كەڭىنەن ايتىلىپ, جاريالانۋدا.
الايدا جامبىل وبلىسىندا بولعان بۇل كەلەڭسىزدىكتەر تاۋەلسىز ەلىمىزدىڭ مىزعىماس بىرلىگىنە ەشقانداي نۇقسان كەلتىرە المايدى. ءبىز بۇل وقيعادان ساباق الۋىمىز كەرەك.
قازاقستان وسى ۋاقىتقا دەيىن, الەمدىك قوعامداستىق اراسىندا, اۋىزبىرشىلىگى مەن ىنتىماعى, بەيبىتشىلىگى مەن تاتۋلىعى جاراسقان تاۋەلسىز ەل بولىپ تانىلدى. ەلدەگى ۇلتارالىق ىنتىماق پەن بەرەكەلى بىرلىككە, دىنارالىق تاتۋلىققا الەم جوعارى باعا بەرىپ وتىر. «بىرلىك بولماي, تىرلىك بولمايدى» دەگەن قازاقتىڭ بارلىق تاريحى بىرلىكتى, ىنتىماقتى ناسيحاتتايدى. الايدا وكىنىشكە قاراي, جاستار تاربيەسىندە جىبەرىپ العان ولقى تۇستارىمىز دا كوپ سياقتى. سونىمەن بىرگە قوردايداعى وقيعا, مەنىڭشە, ەلىمىزدەگى ۇلتتاردىڭ قارىم-قاتىناسى مەن جاستار تاربيەسىندەگى مەملەكەتتىك يدەولوگيانىڭ كەمشىندىگىن كورسەتتى. سول سەبەپتى اعا بۋىن وكىلدەرى, قۇزىرلى ورگاندار ءوز مىندەتتەرىن ورىنداۋ بارىسىندا ۇلتارالىق قارىم-قاتىناسقا اسا ءمان بەرىپ, ىنتىماقتاستىق پەن بىرلىكتى تۋ ەتىپ ۇستاپ, جاستار تاربيەسىنە ايرىقشا كوڭىل ءبولۋى ءتيىس.
ارينە وسى وقيعا كەزىندە ورىن العان زاڭ بۇزۋشىلىق ارەكەتتەردىڭ سەبەبىن ارنايى ۆەدومستۆوارالىق تەرگەۋ توبى, ساراپشىلار, باسقا دا قۇزىرلى ورگاندار انىقتايدى جانە ول ءوز كەزەگىندە رەسمي تۇردە جاريالانادى دەپ ويلايمىن. قوردايدا ورىن العان جايت قوعامداعى قۇندىلىقتاردىڭ ءمانىن تەرەڭ تۇسىنۋگە مۇمكىندىك بەرەدى. ەلىمىزدىڭ الەۋمەتتىك ەكونوميكاسىنىڭ دامۋ بارىسىندا, دوستىق, بەيبىتشىلىك جانە تۇراقتىلىقتىڭ ماڭىزى زور. سول سەبەپتى ەلباسىمىزدىڭ, مەملەكەت باسشىسىنىڭ ساياساتىن جۇزەگە اسىرۋدا, ارانداتۋشىلىققا ەرمەي, سابىر ساقتاپ, ىنتىماعىمىز بەن بىرلىگىمىزدى جوعالتپايىق, اعايىن!
ابدالى نۇراليەۆ,
پارلامەنت سەناتىنىڭ دەپۋتاتى
