بايگەگە قاتىسۋعا 2019 جىلى قازاقستاندىق تەلەارنالارىنىڭ ەفيرىنە شىققان تەلەجوبالار قاتىسا الادى. كونكۋرسقا قاتىسۋ ءۇشىن وتىنىمدەردى رەسپۋبليكالىق جانە ايماقتىق تەلەارنالار, كاسىبي تەلەۆيزيالىق كونتەنت شىعاراتىن ستۋديالار مەن كومپانيالار ۇسىنا الادى.
«تۇمار» ۇلتتىق تەلەۆيزيالىق بايگەسىنىڭ نوميناتسيالارى:
- ۇزدىك تەلەۆيزيالىق سەريال
- ۇزدىك الەۋمەتتىك جوبا
- ۇزدىك دەكەرتى فيلم
- ۇزدىك توك-شوۋ
- ۇزدىك ويىن-ساۋىق باعدارلاماسى
- ۇزدىك اقپاراتتىق باعدارلاما
- ۇزدىك تەلەجۇرگىزۋشى
- ۇزدىك تەلەجۋرناليست
- ۇزدىك رەجيسسەرلىك جۇمىس
- ۇزدىك ايماقتىق تەلەارنا
«تۇمار» ۇلتىق تەلەۆيزيالىق بايگەسى 2017 جىلى قازاقستان رەسپۋبليكاسى اقپارات جانە قوعامدىق دامۋ مينيسترلىگىنىڭ باستاماسىمەن قۇرىلعان. اتالمىش ۋاقىت ارالىعىندا وتاندىق تەلەجۋرناليستيكاسىنىڭ 36 مامانى ەكسكليۋزيۆتى مۇسىنشەنىڭ يەسى اتاندى.
جەڭىمپازداردىڭ قاتارىندا جۋرناليستيكانىڭ «جىلىگىن شاققان» مايتالماندارمەن قاتار, جاس تا بولسا وسى سالانىڭ ۇلكەن ۇمىتىنە اينالعان جانە ءوزىنىڭ كاسىبي بىلىكتىلىگىن كورسەتە بىلگەن جاستار دا بار.
جوبا قۇرىلعان جىلداردان باستاپ بايگەگە قاتىسۋعا بارلىعى 898 ءوتىنىم قابىلداندى, ولاردىڭ ىشىنەن 138 ءوتىنىم باس جۇلدە - بايگەنىڭ باستى سىيلىعى جەزدەن جانە اينەكتەن جاسالعان «تۇمار» مۇسىنشەسى ءۇشىن تالاسقا تۇسكەن بولاتىن.
ءتورتىنشى «تۇمار» سىيلىعى ەرەكشە بولادى - وتكەن جىلدارداعى قازىلار القاسى مەن كاسىبي قوعامداستىقتىڭ ۇسىنىستارىن ەسكەرە وتىرىپ, ۇيىمداستىرۋشى كوميتەتى, بيىل ءار جەڭىمپازعا «تۇمار» مۇسىنشەسىنە قوسا ءبىر ميلليون تەڭگە كولەمىندە قارجىلاي سىياقى تاعايىنداۋ تۋرالى شەشىم قابىلدادى.
سونىمەن قاتار بايقاۋ تاريحىندا العاش رەت قازىلار القاسىنىڭ قۇرامىندا قازاقستاندىق تەلەۆيزياسىنىڭ كاسىبي ماماندارىمەن قاتار, حالىقارالىق دەڭگەيدەگى ساراپشىلار دا بوي تۇزەيدى.
