فۋتبولدان اقتوبەنىڭ «اقتوبە» كلۋبى يسلانديانىڭ «برەيدابليك» كومانداسىن ويىننان كەيىنگى پەنالتيدە ۇتىپ, ەۋروپا ليگاسىنىڭ فينالدىق راۋندىنا جولداما الدى.
فۋتبولدان اقتوبەنىڭ «اقتوبە» كلۋبى يسلانديانىڭ «برەيدابليك» كومانداسىن ويىننان كەيىنگى پەنالتيدە ۇتىپ, ەۋروپا ليگاسىنىڭ فينالدىق راۋندىنا جولداما الدى.
ماتچ يسلاند ەلىنىڭ استاناسى – رەيكياۆيكتەگى «لەيگاردالسۆەدليۋر» ستاديونىندا ءوتتى. كەزدەسۋ بىردەن تارتىستى باستالدى. الاڭ يەلەرى كەزدەسۋدىڭ 27-مينۋتىندا ەسەپ اشتى. ونى كوماندا كاپيتانى فيننۋر مارگەيرسسون ءوز ەسەبىنە جازدى. ءسويتىپ, يسلاندتار اقتوبەدە وتكەن ءبىرىنشى ويىننىڭ ناتيجەسىنە جەتتى. بۇدان كەيىن ەسەپتى وزگەرتۋگە ەكى جاقتىڭ دا ءبىراز مۇمكىندىكتەرى بولدى. ايتكەنمەن, الاڭ يەلەرىنىڭ شابۋىلدارى بارىنشا قاۋىپتى بولىپ جاتتى. سولاردىڭ ءبارىن قايتارىپ, قاقپاعا دوپ دارىتپاعان قاقپاشى اندرەي سيدەلنيكوۆ ەرەكشە كوزگە ءتۇستى. سونىڭ ارقاسىندا 1:0 دەگەن ەسەپ ماتچتىڭ سوڭىنا دەيىن ساقتالدى.
بۇدان كەيىن قارسىلاستار 15 مينۋتتىق ەكى كەزەڭنەن تۇراتىن قوسىمشا تايم ويناپ, وندا جەڭىمپازدى انىقتاي المادى. ال ويىننان كەيىنگى پەنالتيدە اقتوبەلىكتەر مەرگەندىك تانىتتى. ەسەپ – 2:1. مۇندا تيمۋر كاپادزەنىڭ سوققان سوڭعى دوبى قازاقستاندىقتاردى كەلەسى كەزەڭگە شىعاردى.
ەسكە سالا كەتەيىك, مۇنىڭ الدىندا اقتوبەدە وتكەن ءبىرىنشى كەزدەسۋدە الاڭ يەلەرى 1:0 ەسەبىمەن جەڭىسكە جەتكەن ەدى. وندا كەزدەسۋدىڭ ەڭ سوڭعى مينۋتىندا پەنالتيدەن گول سوققان مارات حايرۋللين ءوز كومانداسىنا جەڭىس اپەرگەن بولاتىن.
وسىمەن ءبىزدىڭ ەكىنشى كوماندا ەۋروپانىڭ كلۋبتىق فۋتبول ءتۋرنيرىنىڭ فينالدىق كەزەڭىنە جولداما الىپ وتىر.
دامير قوجامقۇل.
