نۇر-سۇلتان قالاسىنىڭ ەمحانالارىندا دەنساۋلىقتى قالپىنا كەلتىرۋ جانە وڭالتۋ قىزمەتى بۇرىن دا بولعانىمەن, بارىنە بىردەي قول جەتىمدى ەمەس ەدى.
قازىرگى ۋاقىتتا ءمامس ارقاسىندا بۇل قىزمەتتىڭ ءتۇرى كوبەيتىلگەن. №2 قالالىق ەمحانانىڭ ديرەكتورى ءلاززات رىسپەكوۆا ءمامس اياسىندا وتكەن جىلى بالالاردى وڭالتۋعا 28 تەگىن جولداما بەرىلسە, 2020 جىلدىڭ قاڭتار ايىندا 34 بالا وڭالتۋ قىزمەتىنە جۇگىنگەندىگىن ايتتى.
«فيزيوتەراپەۆتىك قىزمەت پەن ماسساج جاساۋ بۇرىن اقىلى ەدى. ال, قازىر بۇل قىزمەتتەر حالىقتىڭ بارىنە تەگىن كورسەتىلەدى. بىزگە 74 ملن تەڭگەگە جۋىق قاراجات ءبولىنىپ, جارتى جىلداي وسىعان دايىندالدىق. وڭالتۋشى, نەۆروپاتولوگ, لوگوپەد جانە باسقا دا دارىگەرلەر ءبىلىمىن شەتەلدەن جەتىلدىرىپ كەلدى. دارىگەرلەر داۋن اۋرۋى, ەپيلەپسيا, اۋتيزم ءتارىزدى اۋرۋلاردى انىقتاپ, قاجەتتى ەمدەۋ كۋرسى مەن وڭالتۋ شارالارىنا جولداما بەرەدى», دەدى ەمحانا ديرەكتورى.
ەرەكشە قاجەتتىكتەرى بار بالالارعا ءمامس جۇيەسىنىڭ بالالارعا كورسەتەتىن قىزمەتتەرىنىڭ بارلىعى تەگىن. سونداي-اق ءمامس شەڭبەرىندە ءدارى-دارمەكپەن قامتاماسىز ەتۋ قايتا قاراستىرىلىپ, سوزىلمالى اۋرۋلارمەن اۋىراتىن تۇلعالار مەن بالالارعا دا تەگىن ءدارى-دارمەك الۋ مۇمكىندىگى جۇزەگە اسىرىلادى.
سونىمەن قاتار وسى ۋاقىتقا دەيىن قىمبات تۇراتىن تەكسەرۋ قىزمەتتەرى (گەپاتيت ۆ جانە س, پتسر, گارموندارعا قان تالداۋلارى, كت, مرت اپپاراتتارى) اقىلى نەمەسە «د» ەسەپتە تۇرعان تۇلعالارعا عانا تەگىن بولدى. قازىرگى كەزدە بۇل قىزمەتتەر ساقتاندىرىلعان حالىقتىڭ بارلىعىنا تەگىن كورسەتىلەدى.
ماسەلەن, №6 قالالىق ەمحانادا مرت قىزمەتىنە بىلتىر ءبىر جىلعا 10 كۆوتا بولىنسە, بيىل تەك قاڭتار ايىندا 18 ادامعا جولداما بەرىلگەن. اقىلى بولىپ كەلگەن قان تالداۋلارى دا تەگىن جاسالادى. ءمامس اياسىندا ستاتسيونارلىق كومەكتى ۇيىمداستىرۋ دا جۇزەگە اسىرىلادى. تۇرعىندار وزدەرى تىركەلگەن ەمحانادا بارلىق قان تالداۋلارى مەن ۋدز, باسقا دا زەرتتەۋلەردەن ءوتىپ, قورتىندىسى بويىنشا جولداما ارقىلى اۋرۋحاناعا جاتقىزىلادى. جەدەل پاتسيەنتتەرگە تمككك بويىنشا, ال جوسپارلى پاتسيەنتتەرگە ءمامس بويىنشا قىزمەت كورسەتىلەدى. ءمامس-ءتىڭ اياسىندا تۇرعىنداردىڭ جەكە مەديتسينالىق ەمحانالارعا قارالۋ مۇمكىندىگى بار. ەلوردادا اتالمىش پاكەت اياسىندا پاتسيەنتتەرگە مەديتسينالىق قىزمەت كورسەتەتىن 15 جەكە كلينيكا ەسەپتەلەدى. سولاردىڭ ءبىرى – «مەديكەر» مەديتسينالىق ورتالىعى. ءمامس قورىمەن كەلىسىم شارت نەگىزىندە ورتالىقتا قاڭتار ايىندا كومپيۋتەرلىك توموگرافياعا 6 ادام, مرت-عا 4 ادام جولداما العان. ۋزد, ەكگ سياقتى قىزمەتتەردەن بولەك پەدياتر, گينەكولوگ, ماممولوگ, حيرۋرگ, ۋرولوگ جانە ستوماتولوگ دارىگەرلەردىڭ كابينەتتەرى جۇمىس ىستەپ تۇر. بۇرىن بۇل ورتالىقتا اقىلى قىزمەت الىپ جۇرگەن تۇرعىندار ەندىگى كەزەكتە ءمامس جۇيەسى ارقىلى ەمحانا كومەگىن تەگىن الىپ جاتىر.
ايتا كەتەيىك, ءمامس جۇيەسىندە تىركەلمەگەن تۇرعىندار 1 ساۋىرگە دەيىن ءوزىن ساقتاندىرۋى ءتيىس. تۇرعىندار ىڭعايى ءۇشىن مەديتسينالىق ۇيىمداردا تولەم تەرمينالدارى ورنالاستىرىلدى.
