كاچار كەنتىندە جاڭا مەشىت اشىلدى. بۇل وسىنداعى مۇسىلمان جۇرتىنىڭ قۋانىشىنا اينالدى. 100 ورىنعا ارنالعان عيماراتتىڭ ىشىمەن قاتار, سىرتى دا سۇلۋلىعىمەن كوز تارتادى.
كاچار كەنتىندە جاڭا مەشىت اشىلدى. بۇل وسىنداعى مۇسىلمان جۇرتىنىڭ قۋانىشىنا اينالدى. 100 ورىنعا ارنالعان عيماراتتىڭ ىشىمەن قاتار, سىرتى دا سۇلۋلىعىمەن كوز تارتادى. «ارحيديزاين 2008» جاۋاپكەرشىلىگى شەكتەۋلى سەرىكتەستىگىنىڭ قۇرىلىسشىلارى مەن ساۋلەتشىلەرى شاعىن مەشىتتىڭ سىرتقى كوركىمەن قاتار, وعان قولدانعان ماتەريالداردىڭ سۋىققا بەرىكتىگىنە دە ءمان بەرىپتى. مىسالى, مەشىتتىڭ كۇمبەزى فارفورمەن جابىلعان. قۇرىلىسشى مامانداردىڭ ايتۋىنشا, ەلىمىزدەگى فارفور كۇمبەزدى ءبىرىنشى مەشىت تە وسى كورىنەدى. ول ارقا جەرىنىڭ قارى مەن جەلىنە, جاڭبىرىنا ءتوزىمدى كەلەدى. سونىمەن بىرگە, مەشىتتىڭ ءىشى دە فارفورمەن بەزەندىرىلگەن.
– عيماراتتىڭ ءىشىن قولونەرشىلەر شىعارماشىلىقپەن جاسادى. قۇران سۇرەلەرى قابىرعالارعا ويىپ جازىلدى, قازاقتىڭ ويۋلارى دا ۇمىت قالعان جوق. ولار قايتا ۇندەسىپ تۇرعانداي. مەشىتتى سالۋ بارىسىندا يسلام قاعيداتتارىنىڭ بارلىق ەرەجەلەرى ەسكەرىلىپ وتىردى, – دەيدى ديزاينەر تايىر بالتاباەۆ. مەشىتتىڭ ءبىرىنشى قاباتىندا ەرلەرگە, ايەلدەرگە ارنالعان ناماز ورىندارى جانە يمامنىڭ بولمەسى ورنالاسقان. عيمارات زالىنا سالماعى 300 كيلوگرامدىق اسپا شام ىلىنگەن.
مەشىت ENRC كورپوراتسياسى مەن قوستاناي وبلىسى اكىمدىگىنىڭ اراسىنداعى الەۋمەتتىك ارىپتەستىك مەموراندۋمى شەڭبەرىندە سالىندى. يماندىلىق ءۇيى سوكولوۆ-سارىباي كەن ءوندىرۋ بىرلەستىگىنە 40 ميلليون تەڭگەگە ءتۇستى.
ءنازيرا جارىمبەتوۆا,
«ەگەمەن قازاقستان».
قوستاناي.
