وسى ءبىر قاسيەتتى تازىنىڭ تۇقىمىن ساقتاپ, سانىن كوبەيتۋ, داڭقىن دارىپتەپ, ونى ءوز ۇلتىمىزدىڭ اتىنا پاتەنتتەپ الۋعا كۇش سالۋ ماقساتىنداعى شارانى رەسپۋبليكالىق «قانسونار» قاۋىمداستىعىنا قاراستى تۇركىستان وبلىستىق وڭىرلىك فيليالى ۇيىمداستىرعان.
حالقىمىز تازىنىڭ ەڭ كۇشتىسىنە, جۇيرىگىنە, اڭ العىشىنا «ناعىز قۇماي ەكەن, قاناتتى قۇماي ەكەن» دەگەن سەكىلدى ماداق سوزدەر ايتىپ, ونىڭ ەرەكشە قابىلەتتەرىنە سۇيسىنگەن. ءوز بويىنا بىتكەن ەپتىلىك, جىلدامدىق, ادىسقويلىق, تۇلكى-قوياندى قۇيىنداي سوعاتىن, ءتىپتى ارقارعا, قاسقىرعا شاباتىن قاسيەتتەردىڭ ءبارى وسى قۇمايعا ءتان. سونداي-اق قۇماي تازى ءوزىنىڭ ىزشىلدىگىمەن, سۇلۋ مۇسىنىمەن ءوز تۇقىمداستارىنىڭ ىشىندەگى سىرتتانى, تورەسى دەپ ەسەپتەلگەن. «بۇگىندە تازا قاندى قازاقى قۇماي تازىنى تابۋ قيىن. ونىڭ تۇقىمى ازايعان. ال بار دەگەندەرىنىڭ كوپشىلىگىنىڭ قانى ارالاسىپ كەتكەن. سوندىقتان بۇگىنگى شاراعا جينالعاندار اڭشىلىق يتتەرىن ارنايى مامانداردىڭ كومەگىمەن ساراپتامادان وتكىزىپ, ونىڭ قانشالىقتى تازا تۇقىمدى ەكەندىگىن ارنايى قۇجاتتارمەن بەكىتتى. سونىمەن قاتار دارىپتەي وتىرىپ, تازى ءيتىنىڭ داڭقىن اسىرۋ, الەمگە تانىتۋ, ءارى وسى شارالاردى وتكىزە وتىرىپ شەتەلدە بولاتىن جارىستارعا دايىندالۋدى ماقسات ەتىپ وتىرمىز», دەيدى قاۋىمداستىقتىڭ وڭىرلىك وكىلدىگىنىڭ ديرەكتورى اباي بەردىبەكوۆ. كەيىنگى كەزدە تازىنى يەلەنگىسى كەلەتىن وزگە ۇلتتار دا پايدا بولا باستاعان. «جوق ولاي ەمەس. تازى قازاقتىكى. ونىڭ 3 مىڭ جىلدىق تاريحى بار. وعان ءبىزدىڭ جەردەگى تاسقا قاشالىپ تۇسكەن سۋرەتتەر دالەل», دەيدى سەلەكتسيونەر قاجىمۇرات كۇلپەشوۆ.
ورداباسى اۋدانىندا وتكەن ءىس-شاراعا وبلىستىڭ بارلىق اۋماعىنان 100-گە جۋىق تازى ءيتىنىڭ جاناشىرلارى جينالدى. ارنايى تىركەۋدەن وتكەن تازىلار اراسىندا قۇمايلار سايىسى وتكىزىلدى. اڭعا تۇسۋدەن العىرلىق تانىتىپ, جۇيرىك شىققان قۇمايلاردىڭ يەلەرىنە ارنايى ماراپاتتار تابىس ەتىلدى.
تۇركىستان وبلىسى
