قاسىنداعى ارىپتەسىمەن بىرگە كولىك دابىلىن قوسا وقيعا بولعان ايماققا قاراي جۇيتكىگەن ولار نەبارى 3 مينۋتتا كانالعا جەتتى. جاعاعا بىرنەشە ادام جينالىپ قالعان, الدەبىر بالالار ۇرەيلى داۋىسپەن ايقايلاپ ءجۇر. ال سۋدىڭ ورتا تۇسىندا تۇنشىعىپ, باتىپ بارا جاتقان بالانىڭ سۇلباسى عانا كورىنەدى. قار ەرىپ, كانالداعى سۋ ارناسىنا تولعان كەز. سۋىق سۋعا ءتۇسىپ بالانى قۇتقارىپ قالۋعا ەشكىمنىڭ باتىلى جەتپەي نەمەسە جۇزە المايتىندار جينالسا كەرەك, ايتپەسە ۇلكەنى دە, كىشىسى جاعادا تۇر. وكىنىشكە قاراي, قىزىق كورگەندەي ۇيالى تەلەفونىن الىپ بەينەتاسپاعا ءتۇسىرىپ جاتقانى دا بار. كانال جاعاسىنا جەتكەن بويدا سىرت كيىمىن تەز-تەز شەشكەن جەتىساي اپب-نىڭ انىقتاۋشىسى, پوليتسيا كاپيتانى مارات نۇرىمبەتوۆ تاستاي سۋعا قويىپ كەتتى. ودان سوڭ سۋ شەتىندە جاتقان جۇمساق رەزەڭكە شلانگتى قولىنا مىقتاپ قىسا, بالاعا قاراي بار كۇشىمەن جۇزە جونەلدى. اعىسى قاتتى سۋ دا اجەپتەۋىر تەرەڭ ەدى. ەكەۋىن دە سۋ تۇبىنە تارتىپ كەتۋ قاۋپى ۇلكەن. وسى ساتتە ماراتتا ەڭ بولماسا بالانى قولىنداعى شلانگكە وراپ, قۇتقارىپ قالايىن دەگەن وي بولدى.
ءجاسوسپىرىم بالا سۋعا ءبىر باتىپ, ءبىر شىعىپ, جانۇشىرا ايقايلاۋدا. بار كۇشىمەن ءجۇزىپ, ساناۋلى سەكۋندتىڭ ىشىندە مارات تا جەتتى. بالادا دارمەن قالماعان. سۋ جۇتىپ قويىپتى. قۇتقارۋشىنىڭ قولى جەتكەنى سول, سىلق ءتۇستى. سۋعا باتىپ بارا جاتقان ۇلدىڭ دەنەسىن جۇلقي تارتقان پوليتسيا كاپيتانى ءبىر قولىمەن قاپسىرا قۇشاقتاعان كۇيى جوعارى قاراي قۇلاش سەرمەدى. وسىلايشا بالانى قارماعان كۇيى جاعاعا قاراي جۇزە باستادى. قىرسىققاندا جاعاعا بەس مەتردەي قالعاندا, اياعىن قايىرىپ السا بولا ما. بالا بولسا, قولىندا. بار كۇشىن جيناپ, قايتا جۇزە باستادى. جاعاعا امان جەتكەن ولاردى ماراتتىڭ ارىپتەستەرى كۇتىپ الدى. بالانىڭ دەنەسى بىلق-سىلق ەتىپ, جانسىزدانىپ بارا جاتتى. ۋاقىت قىمبات, جاعاعا شىعىسىمەن جەدەل جاردەمدى كۇتپەگەن پوليتسەيلەر قىزمەتتىك كولىككە بالانى سالا اۋرۋحاناعا قاراي جىلدامداتتى. جولدا كەتىپ بارا جاتىپ بالاعا العاشقى مەديتسينالىق كومەك كورسەتۋگە كىرىسكەن مارات نۇرىمبەتوۆ ءجاسوسپىرىمنىڭ جۇتىپ قويعان سۋىن شىعارۋمەن الەكتەندى. ەس-ءتۇسسىز جاتقان ونى جاساندى جولمەن دەمالدىرىپ, سىلكىلەپ, جۇرەگىنە ماسساج جاسادى. وعان قوسا سۋىقتا توڭىپ قالعان مۇزداي دەنەسىن جىلىتايىن دەپ ۋقالاپ, بار بىلگەن مەديتسينالىق كومەكتەرىن كورسەتتى. ارىپتەسى كولىكتى بىرنەشە مينۋت ىشىندە ەمحاناعا جەتكىزدى. بالانى اق حالاتتى جانداردىڭ قولىنا تابىستاعان سوڭ عانا پوليتسەيلەردىڭ كوڭىلى ورنىنا تۇسكەندەي بولدى.
ون ەكى جاستاعى جەتكىنشەك بىردەن جانساقتاۋ بولىمىنە جاتقىزىلىپ, كەيىننەن پالاتاعا اۋىستىرىلدى. ارينە, امان قالعان بالانىڭ اتا-اناسى قۇتقارۋشى پوليتسەيگە اعىنان جارىلىپ العىستارىن ايتۋدا. توسىن وقيعانى ارىپتەسى, تۇركىستان وبلىسى پوليتسيا دەپارتامەنتىنىڭ قىزمەتكەرى گۇلنار ابدىراحمانقىزىنا تولىق بايانداپ بەرگەن پوليتسيا كاپيتانى مارات نۇرىمبەتوۆ: «بۇل مەن ءۇشىن ەرلىك ەمەس, بالانى قۇرمەت كورەيىن, تانىمال بولايىن دەپ تە قۇتقارعانىم جوق. مەنىڭ ورنىمداعى كەز كەلگەن ادام وسىلاي ىستەيدى. بار ويىم بالانى امان الىپ قالۋ بولدى», – دەيدى.
بۇل ءىسىن ەرلىك سانامايتىن, ادامي مىندەتى دەپ ەسەپتەيتىن پوليتسەي جەتىساي اۋدانىندا دۇنيەگە كەلگەن. قاتەر تونگەن شاقتا باتىلدىق تانىتىپ, بىردەن شەشىم قابىلداپ, جاس بالانى قۇتقارىپ قالعان پوليتسەيمەن ارقا سۇيەر ەلى دە ماقتانادى. ءوز ومىرىنە قاۋىپ تونسە دە ويلانباستان وزگەنىڭ ءومىرى ءۇشىن تاۋەكەلگە باس تىككەن پوليتسەيدى ارىپتەستەرى دە قۇرمەت تۇتادى.
تۇركىستان وبلىسى
